ភ្នំពេញ៖ ក្រសួងសុខាភិបាលយល់ឃើញថា គណៈវិជ្ជាជីវៈទាំងអស់មិនទាន់មានមូលដ្ឋានច្បាប់ និងធនធានគ្រប់គ្រាន់ ក្នុងការគ្រប់គ្រងសមាជិករបស់ខ្លួនឱ្យបានល្អប្រសើរនៅទ្បើយ។ ក្នុងបរិបទនេះចាំបាច់ណាស់ត្រូវពង្រឹង និងបង្កើតរាល់លិខិតបទដ្ឋានគតិយុត្តសម្រាប់គ្រប់គ្រងអ្នកមានវិជ្ជាជីវៈសុខាភិបាល។
ការលើកទ្បើងនេះខណៈគណៈរដ្ឋមន្ត្រីបើកកិច្ចប្រជុំពេញអង្គ ពិភាក្សាអំពី «សេចក្តីព្រាងច្បាប់ស្តីពីការគ្រប់គ្រងអ្នកប្រកបវិជ្ជាជីវៈវិស័យសុខាភិបាល»។ នេះបើយោងតាមការបង្ហោះនៅលើទំព័រហ្វេសប៊ុក របស់អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន ព្រឹកថ្ងៃទី ០៨ ខែកក្កដា ឆ្នាំ២០១៦នេះ។
លោក ផៃ ស៊ីផាន បន្តថាក្រសួងបានពិភាក្សាជាបន្តបន្ទាប់ជាមូយនាយកដ្ឋានជំនាញ និងគណៈវិជ្ជាជីវៈពាក់ព័ន្ធទាំងអស់ដើម្បីបង្កើតជាមូលដ្ឋានច្បាប់ សម្រាប់ការអភិវឌ្ឈប្រព័ន្ធផ្តល់អាជ្ញាបណ្ណ័ប្រកបវិជ្ជាជីវៈនៅព្រះរាជាណាចក្រកម្ពុជា។
តាមប្រភពដដែលបន្ថែមទៀតថា គណៈរដ្ឋមន្ត្រីបានបើកកិច្ចប្រជុំពេញអង្គ ពិភាក្សាអំពី "សេចក្តីព្រាងច្បាប់ស្តីពីការគ្រប់គ្រង អ្នកប្រកបវិជ្ជាជីវៈវិស័យសុខាភិបាល" ច្បាប់ស្តីពីការគ្រប់គ្រងលើការប្រកបវិជ្ជាជីវៈឯកជនក្នុងវិស័យវេជ្ជសាស្ត្រអមវេជ្ជសាស្ត្រ និងជំនួយវេជ្ជសាស្ត្រដែលបច្ចុប្បន្នត្រូវបានយកមកប្រើ ធ្វើជាទម្រង់ក្នុងការអភិវឌ្ឈនិងការដាក់ឲ្យអនុវត្តនូវបទដ្ឋានស្តីពីវិជ្ជាជីវៈសុខាភិបាល។
ច្បាប់ថ្មីនេះមានគោលបំណងពង្រឹងរាល់លិខិតបទដ្ឋានគតិយុត្ត ដោយផ្តោតសំខាន់លើការធានាទាំងគុណភាពនិងសុវត្ថិភាពរបស់ប្រព័ន្ធសុខាភិបាលទាំងសាធារណៈ និងឯកជន ដើម្បីផ្តល់សេវាសុខាភិបាលជូនប្រជាពលរដ្ឋ ប្រកបដោយប្រសិទ្ធិភាព និងក្រមសីលធម៌។
គួរបញ្ជាក់ថាច្បាប់ថ្មីនេះមានគោលបំណងការពារសុខភាព និងសុវត្ថិភាពរបស់ប្រជាជន តាមរយៈការផ្តល់នូវយន្តការធានាថា អ្នកប្រកបវិជ្ជាជីវៈសុខាភិបាលទាំងអស់មានសមត្ថភាព និងសម្បទានគ្រប់គ្រាន់ក្នុងការប្រកបវិជ្ជាជីវៈរបស់ខ្លួនជាដើម។
ចំណែកគោលដៅនៃច្បាប់នេះ មានគោលដៅកំណត់អំពីវិធាន និងនីតិវិធីសម្រាប់គ្រប់គ្រងអ្នកប្រកបវិជ្ជាជីវៈសុខាភិបាល និងការប្រកបវិជ្ជាជីវៈសុខាភិបាល នៅក្នុងវិសាលភាពច្បាប់នេះមានវិសាលភាពអនុវត្តចំពោះអ្នកប្រកបវិជ្ជាជីវៈសុខាភិបាល ទាំងអស់នៅក្នុងព្រះរាជាណាចក្រកម្ពុជា៕
