ក្រុងប៉េកាំងៈ អគ្គលេខាធិការអង្គការសហប្រជាជាតិលោក បាន គីមូន និយាយនៅថ្ងៃព្រហស្បតិ៍ ទី០៧ កក្កដា ដោយលោកសង្កត់ធ្ងន់ថា ប្រទេសចិនចាំបាច់ ដោះស្រាយបញ្ហាសមុទ្រខាងត្បូងដោយសន្តិវិធី។
ការទទូចរបស់អគ្គលេខាធិការអង្គការសហប្រជាជាតិ គឺស្របពេលដែលចិនកំពុងធ្វើសមយុទ្ធយោធានៅក្បែរសមុទ្រចិនខាងត្បូង ខណៈសាលក្រមរបស់មជ្ឈឹត្តការអន្តរជាតិក្រុងឡាអេ រវាងហ្វីលីពិន និងចិនជិតដល់ថ្ងៃប្រកាស ពោលគឺនៅថ្ងៃទី ១២ កក្តដាខាងមុខនេះ។
លោក បាន គីមូន ថ្លែងបែបនេះនៅក្នុងសន្និសីទកាសែតមួយ នាទីក្រុងប៉េកាំង គឺជាមួយនិងរដ្ឋមន្ត្រីការបរទេសចិន លោក វ៉ាង យី។
លោក វ៉ាង យី បានហៅពាក្យឯកតោភាគីរបស់ហ្វីលីពីនថា ខុសច្បាប់ ហើយក៏ប្រឆាំងនឹងច្បាប់អន្ដរជាតិផងដែរ។ នេះបើយោងតាមទូរទស្សន៍ក្នុងស្រុក CCTV ដែលបានចាក់ផ្សាយសម្តីរបស់លោក វ៉ាង យី ក្នុងអំឡុងពេលកិច្ចប្រជុំ នៅថ្ងៃព្រហស្បតិ៍ទី០៧ជាមួយលោក បាន គីមូន។
ភាពតានតឹងកំពុងបន្តកើនឡើង នៅមុនការចេញសេចក្តីសម្រេចរបស់តុលាការមជ្ឈឹត្តការ នៅថ្ងៃទី១២ នៅទីក្រុងឡាអេ ប្រទេសហូឡង់ រវាងចិន និងហ្វីលីពីន ជុំវិញជម្លោះដណ្តើមដែនកោះក្នុងសមុទ្រចិនខាងត្បូង ។
យ៉ាងណាមិញប្រទេសចិនបានប្រកាសថា តុលាការនេះ មិនមានយុត្តាធិការគ្របដណ្តប់លើជំលោះនេះទេ ហើយចិននឹងមិនចូលរួមទទួលស្គាល់ការសម្រេចចិត្តណាមួយចំពោះរឿងក្តីនេះដែរ៕ ប្រភព- Reuters
