ភ្នំពេញ៖ នៅក្នុងកម្មវិធីអបអរសាទរនិស្សិតជាប់អាហារូបករណ៍ទៅសិក្សានៅប្រទេសបារាំង កាលពីលា្ងចថ្ងៃពុធ ទី៦ ខែ កក្កដា ឆ្នាំ២០១៦ នៅវិទ្យាស្ថានបារាំង ឯកអគ្គរដ្ឋទូតបារាំង លោក ហ្សង់ ក្លូដ ពាំបឺហ្វ បានឱ្យដឹងថា នៅឆ្នាំ២០១៦នេះ និស្សិតកម្ពុជាចំនួន៥១រូបបានទៅសិក្សានៅប្រទេសបារាំង លើមុខវិជ្ជា សេដ្ឋកិច្ច នីតិសាស្ដ្រ វិទ្យាសាស្ដ្រវិស្វករ ចិត្តវិទ្យា និងមុខវិជ្ជា ភាសាបារាំង។
លោក ហ្សង់ ក្លូដ ពាំបឺហ្វ ឯកអគ្គរដ្ឋទូតបារាំងប្រចាំកម្ពុជា ដែលថ្លែងតាមរយៈការបកប្រែរបស់លោករដ្ឋមន្ដ្រីក្រសួងអប់រំ លោក ហង់ ជួនណារ៉ុន បានឱ្យដឹងបន្ថែមថា កន្លងមកនេះ ស្ថានទូតបារាំងបានផ្ដល់អាហារូបករណ៍ដល់និស្សិតកម្ពុជាទៅបន្ដការសិក្សា ខាងផ្នែកច្បាប់ ខាងផ្នែកសេដ្ឋកិច្ច ក៏ដូចជាខាងពេទ្យ ។ ប៉ុន្ដែឥឡូវនេះស្ថានទូតបារាំងក៏ចង់ពង្រីកមុខជំនាញទាំងនេះ ដោយបន្ថែមអាហារូបករណ៍ឲ្យបានច្រើនទៅលើមុខវិជ្ជាវិទ្យាសាស្ដ្រវិស្វករ ផងដែរ។
លោក ហ្សង់ ក្លូដ ពាំបឺហ្វ ថ្លែងបញ្ជាក់ថា ៖ «ក៏ប៉ុន្ដែ គឺថាដើម្បីអាចជ្រើសរើសយកបាន គឺសំខាន់ គឺថាពិន្ទុដែលនិស្សិតដែលត្រូវទទួលបាន គឺសំខាន់ បានន័យថា បានទៅសិក្សានៅប្រទេសបារាំងនៅសាលាល្អៗ ទាល់តែមានពិន្ទុខ្ពស់»។
បើតាម លោក ហ្សង់ ក្លូដ ពាំបឺហ្វ ឯកអគ្គរដ្ឋទូតបារាំងប្រចាំកម្ពុជា គឺអាហារូបករណ៍ដែលបានផ្ដល់នេះ គឺលោកមិនទាន់បានបញ្ជាក់ថា នឹងជ្រើសរើសប៉ុន្មានលើមុខវិជ្ជាវិទ្យាសាស្ដ្រវិស្វករនោះទេ គ្រាន់តែថ្ងៃខាងមុខស្ថានទូតបារាំងនិងជម្រុញលើមុខវិជ្ជាមួយនេះ ឱ្យមានការកើនឡើង។
លោក ហ្សង់ ក្លូដ ពាំបឺហ្វ៖ «ចឹងគឺគាត់មិនបានចាំលេខអស់ទេ ប៉ុន្ដែគឺជានិន្នាការមួយដែរ ព្រោះកន្លងមកនេះ បារាំង បណ្ដុះបណ្ដាលច្រើន ខាងផ្នែកនីតិសាស្ដ្រ ខាងផ្នែកសេដ្ឋកិច្ច ឬក៏ខាងផ្នែកពេទ្យអី ប៉ុន្ដែឥលូវនេះ គឺថាគេឃើញមាននិន្នាការកើនឡើង ខាងផ្នែវិទ្យាសាស្ដ្រ និងខាងផ្នែកវិស្វកម្ម» ។
គួរបញ្ជាក់ដែរថា ជារៀងរាល់ឆ្នាំ ស្ថានទូតបារាំងប្រចាំកម្ពុជាតែងតែផ្ដល់អាហារូបករណ៍ដល់និស្សិតកម្ពុជា ដែលមានបំណងចង់ទៅបន្ដការសិក្សាថ្នាក់បរិញ្ញាបត្រជាន់ខ្ពស់ ឬថ្នាក់អនុបណ្ឌិតនៅប្រទេសបារាំង។ ឆ្នាំនេះ និស្សិតកម្ពុជា៥១រូប គឺភាគច្រើនសិក្សាថ្នាក់ភាសាបារាំងនៅតាមសាកលវិទ្យាល័យ ដែលទ្រទ្រង់ដោយសហប្រតិបត្តិការបារាំង ត្រូវបានជ្រើសរើសអោយទៅសិក្សានៅបារាំង។
ក្រៅពីនេះ ស្ថានទូតបារាំងក៏គាំទ្រផងដែរដល់កម្មវិធីផ្ដល់អាហារូបករណ៍ផ្សេងទៀត ដូចជា អាហារូបករណ៍របស់ទីភ្នាក់ងារសាកលវិទ្យាល័យដែលប្រើប្រាស់ភាសាបារាំង (AUF) ឬរបស់ សហភាពអ៊ឺរ៉ុប កម្មវិធីអាហារូបករណ៍ Erasmus+ ។
ឆ្នាំនេះកម្មវិធី Erasmus+ ផ្ដល់ឱកាសអោយនិស្សិតកម្ពុជា១១រូបទៅបន្ដការសិក្សានៅតាមគ្រឹះ ស្ថានឧត្ដមសិក្សាបារាំង។ ជាងនេះទៅទៀតលទ្ធផលអាហារូបករណ៍ដល់និស្សិតកម្ពុជាផ្នែក វេជ្ជសាស្ដ្រទៅបន្ដការសិក្សារបស់ពួកគេជារៀងរាល់ឆ្នាំនៅប្រទេសបារាំង នឹងត្រូវប្រកាស អោយដឹងនៅពាក់កណ្ដាលខែកក្កដា។ ជាមធ្យម និស្សិតពេទ្យជាង២០នាក់ ទទួលបានអាហារូបករណ៍ពីកម្មវិធីនេះ ក្នុងមួយឆ្នាំ។
កាលពីខែវិច្ឆិកា ឆ្នាំ២០១៥ ស្ថានទូតបារាំង និងវិទ្យាស្ថានបារាំងនៅកម្ពុជា បានដាក់អោយដំណើរការ ប្រកបដោយជោគជ័យនូវបណ្ដាញអតីតនិស្សិតកម្ពុជា មកពីប្រទេសបារាំង ដែលប្រមូលផ្ដុំអតីតនិស្សិតកម្ពុជា៥០០នាក់ ដែលបានទៅសិក្សានៅសាកលវិទ្យាល័យបារាំង លើ មុខជំនាញដូចជា នីតិសាស្ដ្រ វិទ្យាសាស្ដ្រវិស្វករ វេជ្ជសាស្ដ្រ សេដ្ឋកិច្ច ស្ថាបត្យកម្ម ទេសចរណ៍។
ជារៀងរាល់ឆ្នាំ ប្រទេសបារាំងទទួលនិស្សិតកម្ពុជាជាង៦៦នាក់អោយទៅសិក្សា ដែលធ្វើអោយប្រទេសបារាំងក្លាយជាប្រទេសទិសដៅទីបី ដែលនិស្សិតកម្ពុជាចូលចិត្តទៅសិក្សាបំផុត។
នៅលើពិភពលោក ប្រទេសបារាំងជាប្រទេសទិសដៅទី៤ ដែលនិស្សិតបរទេសចូលចិត្តទៅសិក្សាបំផុត ដោយទទួលនិស្សិ៣សែននាក់ អោយទៅសិក្សាជារៀងរាល់ឆ្នាំ៕
