ប្រធានាធិបតីថ្មីនៃប្រទេសហ្វីលីពីននិយាយថា ទីក្រុងម៉ានីល ត្រៀមខ្លួនរួចជាស្រេចហើយ ដើម្បីចរចាជាមួយទីក្រុងប៉េកាំង បើទោះជា សាលដីការ នៃតុលាការមជ្ឈិតការអន្ដរជាតិ ឲ្យខ្លួនឈ្នះក្ដី ឬក៏មានប្រៀបលើទីក្រុងប៉េកាំងក៏ដោយ។
ប្រធានាធិបតី Rodrigo Duterte បាននិយាយថា សាលដីការ នឹងធ្វើឱ្យទីក្រុងម៉ានីលពេញចិត្ត ហើយ បើទោះបីមិនផ្ដល់ឱ្យទីក្រុងម៉ានីលឈ្នះក្ដីក៏ដោយ គឺខ្លួននៅតែប្រកាន់ភ្ជាប់ថា ខ្លួននិងចរចា ជាមួយនិងទីក្រុងប៉េកាំង។
លោកប្រធានាធិបតី បានបញ្ជាក់ថា យើងមិនត្រៀមខ្លួនដើម្បីធ្វើសង្គ្រាមទេ ព្រោះវាបង្ករឱ្យមានការឈឺចាប់ខ្លាំងណាស់។ ហើយពាក្យថាសង្គ្រាម គឺមិនអាចទទួលយកបានទេ ព្រោះ ពាក្យនេះ អាក្រក់ខ្លាំងណាស់។ យ៉ាងណាក៏ដោយ លោក Rodrigo Duterte ប្រទេសរបស់លោកនឹងសម្របសម្រួលដើម្បីឱ្យភាគីជាប់ពាក់ព័ន្ធ ទទួលស្គាល់សេចក្ដីសម្រេចរបស់តុលា ការអន្ដរជាតិនេះ។
តាមសេចក្ដីរាយការណ៍ តុលាការមជ្ឈិតការអន្ដរជាតិរបស់អង្គការសហប្រជាជាតិ ដែលមាន មូលដ្ឋាន នៅទីក្រុងឡាអេ និងធ្វើការផ្សព្វផ្សាយសាលដីការរបស់ខ្លួន លើករណីជម្លោះសមុទ្រចិនខាងត្បូង នៅថ្ងៃទី១២ កក្កដា។
សូមជម្រាបថា ប្រទេសដែលមានជម្លោះជាមួយចិនករណីសមុទ្រចិនខាងត្បូង មានប្រទេស វៀតណាម ភីលីពីន ម៉ាឡេស៊ី ប្រុយណេ និងកោះតៃវ៉ាន់ ៕
