ភ្នំពេញ៖ អ្នកដឹកនាំគ្រប់រូបរួមទាំងថ្នាក់ដឹកនាំប្រទេសជាតិ ស្ថាប័នរដ្ឋ ឯកជន អង្គការសង្គមស៊ីវិល គឺជាបុគ្គលដ៏សំខាន់ដែលជាអ្នកកំណត់វាសនាប្រទេស ឬសា្ថប័នទាំងនោះថាមានភាពរីចំរើនឬថយចុះ។
កន្លងមកគេបានលើកឡើងថាក្នុងនាមជាអ្នកដឹកនាំត្រូវប្រកាន់យក ទសពិធរាជធម៌។ តើទសពិធរាជធម៌ឬធម៌ទាំង១០ដែលអ្នកដឹកនាំត្រូវប្រតិបត្តមានអ្វីខ្លះ។ តទៅនេះសូមលើកយកការព្យល់ពាក្យថា«ទសពិធរាជធម៌»នៅក្នុងវចនានុក្រមខ្មែរដូចតទៅ៖
ទសពិធរាជធម៌ (ទៈ សៈពិធៈរាជៈ ធ័រ, ឬតាមទម្លាប់ថា ទស់សៈពិត–)
ន. (បា. ទសវិធ + រាជធម្ម) រាជធម៌ ១០យ៉ាង គឺធម៌ ១០ ប្រការ សម្រាប់ព្រះរាជាទ្រង់ប្រព្រឹត្ត ព្រមទាំងណែនាំពួកសេនាបតីមន្ត្រីធំតូចនិងពួករាស្ត្រប្រជាឲ្យប្រព្រឹត្តផង។ គេច្រើនប្រើកាត់ខ្លីត្រឹមតែ ទសពិធ ឬ ទសពិធធម៌។
ទសពិធរាជធម៌នៃអ្នកដឹកនាំមានដូចជា៖
១-ទានៈ គឺ ការធ្វើអំណោយ
២-សីលៈ គឺការរក្សាសីល ៥ ជានិច្ច ឬរក្សាសីល ១០ មួយដងមួយកាល
៣-បរិច្ចាគៈ គឺ ការចំណាយព្រះរាជទ្រព្យទំនុកបម្រុងប្រទេសជាតិ
៤-អាជ្ជវៈ គឺ មានសេចក្ដីត្រង់
៥-មទ្ទវៈ គឺ មានសេចក្ដីទន់ភ្លន់ស្លូតសុភាពរាបសា
៦-តបៈ គឺ ការកាន់ឧបោសថសីលតាមកាលកំណត់ម្ដងៗ (ម. ព. តបៈ ឬ តបះ ផង)
៧-អក្កោធនៈ គឺ ការមិនកម្ដៅក្រហាយអ្នកដទៃ
៨-អវិហឹសា គឺ ការមិនបៀតបៀនអ្នកដទៃ
៩-ខន្តី គឺការមានសេចក្ដីអត់ធន់
១០-អវិរោធនៈ គឺការមិនបំពានលើធម៌លើច្បាប់ ។
