កោះកុង៖ ប្រជាពលរដ្ឋប្រមាណ ៣២ គ្រួសារបានដាក់លិខិតតាមរយៈអាជ្ញាធរថ្នាក់មូលដ្ឋាន ដើម្បីស្នើសុំឲ្យក្រុម ហ៊ុនស្ករអំពៅចំនួន ២ ស្ថិតនៅក្នុងខេត្តកោះកុង ឲ្យបញ្ឈប់ការសាងសង់របងបិទផ្លូវលំ ២ខ្សែ។ ប្រជាពលរដ្ឋអះអាងថា ការបិទផ្លូវនេះធ្វើប៉ះពាល់ដល់ការធ្វើដំណើរដឹកជញ្ជូនកសិផលយកទៅលក់នៅទីផ្សារ ។
ការស្នើសុំនេះ ធ្វើឡើងបន្ទាប់ពីក្រុមហ៊ុនស្ករអំពៅ ស៊ូហ្គើអ៊ិន ដាល់ស្ទ្រី ខមភេនីលីមីតធីត និង ក្រុមហ៊ុនកោះកុង ផ្លេនថេសិន ខមភេនីលីមីធីត ធ្វើរបងលួសបិទកាលពីខែមេសា ឆ្នាំ ២០១៦ កន្លងទៅ ស្ថិតនៅក្នុងភូមិ ត្រពាំងកណ្តោល ស្រុកស្រែអំបិល ខេត្តកោះកុង។
បើតាមម្ចាស់ចំការម្នាក់ឈ្មោះ កាន់ នាង បានឲ្យដឹងថា ចាប់តាំងពីក្រុមហ៊ុនទាំងពីរនេះ ធ្វើរបបដែកលួសបិទផ្លូវចេញចូល គឺ ធ្វើឲ្យប៉ះពាល់ដល់ពលរដ្ឋចំនួន ២គ្រួសារ មិនអាចធ្វើដំណើរចេញចូលដឹកជញ្ជូនដំណាំក្នុងចំការសាវម៉ាវ និងចំការធូរ៉ែន យកទៅលក់នៅទីផ្សារបាននោះទេ។ ម្យ៉ាងទៀត ក៏ធ្វើឱ្យប៉ះពាល់ដល់ប្រជាពលរដ្ឋប្រមាណ ៣២គ្រួសារផ្សេងទៀត មិនអាចទៅមើលថែទាំ ដាក់ជីដំណាំស្រូវបានផងដែរ ព្រោះក្រុមហ៊ុនបានបិទផ្លូវទៅហើយ។
អ្នកស្រី កាន់ នាង បញ្ជាក់ថា សាវម៉ាវ និងធូរ៉ែន មួយចំនួនបានងាប់ដោយសារគ្មានផ្លូវសម្រាប់ដឹកជញ្ជូនជីដើម្បីដាក់ដំណាំ។ ម្ចាស់ចំការូបនេះ បានស្នើឲ្យក្រុមហ៊ុនអនុញ្ញាតឲ្យប្រជាពលរដ្ឋអាចធ្វើទ្វារដែកដើម្បីអាចចេញចូលនៅលើដីចំការនោះ ប៉ុន្តែអ្នកស្រីថា ភាគីក្រុមហ៊ុនមិនទាន់ឆ្លើយតបយ៉ាងណានៅឡើយទេ។ អ្នកស្រី កាន់ នាង៖«ចំការខ្ញុំបេះផ្លែហើយតែខ្ញុំត្រូវយកជីមកដាក់អត់មានផ្លូវចូលដឹកជី ខ្ញុំអត់ទូលមករួចទេ ក៏ខូចសៅម៉ៅខ្ញុំងាប់អស់ដែរ កំពុងតែងាប់ហើយនិង ហើយពូមួយចំការជាប់ខ្ញុំដែរ ប្រើប្រាស់ផ្លូវនិងដែរ សៅម៉ៅគាត់ទុំពេញដើម គេបិទផ្លូវជិត ឡានអត់ចូលរួច គេអត់មកទិញគាត់សៅម៉ៅជ្រុះពេញដី»។
ជុំវិញទំនាស់ដីធ្លីរវាងពលរដ្ឋ និង ក្រុមហ៊ុនស្កអំពៅទាំងពីរស្ថិតនៅក្នុងខេត្ដកោះកុងនេះដែរ លោក ជា អ៊ុយ ដែលជាមេភូមិត្រពាំងកណ្ដោល បានថ្លែងប្រាប់វិទ្យុស្ដ្រីថា មូលហេតុដែលក្រុមហ៊ុនបានបិទរបងលួសកាត់ទទឹងផ្លូវដូច្នេះ ដោយសារកាលពីពេលកន្លងមកមានគោ ក្របី អ្នកភូមិ ចូលទៅស៊ីដំណាំរបស់ក្រុមហ៊ុន ទើបក្រុមហ៊ុនស្ករអំពៅ Sugar industry company limited និងក្រុមហ៊ុនស្ករអំពៅ Koh kong Plantation company limited ទាំងពីរនេះបិទផ្លូវដូច្នេះ។ ប៉ុន្ដែមេភូមិរូបនេះ យល់ថាការបិទរបងដូច្នេះ គឺមិនត្រឹមត្រូវនោះឡើយ។ លោកថា ពលរដ្ឋរស់នៅគឺពឹងផ្អែកលើផ្លូវដើម្បីដឹកកសិផលយកទៅលក់លើទីផ្សារ ប្រសិនជាក្រុមហ៊ុនបិទដូចនេះ តើពលរដ្ឋនឹងត្រូវពឹងលើអ្វីដើម្បីប្រមូលកសិផល ។
លោក ជា អ៊ុយ ថ្លែងថា តាំងតែពីខែឧសភាមក ពលរដ្ឋបានផ្ដិតមេដៃស្នើឲ្យក្រុមហ៊ុនបើកផ្លូវសម្រាប់ពលរដ្ឋធ្វើដំណើរដឹកដំណាំកសិផល នឹងធ្វើទ្វារបិទចាក់សោរឲ្យក្រុមហ៊ុនវិញ ប៉ុន្ដែក្រុមមិនមានការឆ្លើយតបយ៉ាងណាទេ ។ លោកបានអំពាវនាវសុំឲ្យអង្គការសង្គមស៊ីវិល និង ថ្នាក់ដឹកនាំរដ្ឋាភិបាលជួយដល់ពលរដ្ឋផង ព្រោះតែលោកព្យាយាមចរចាជាមួយក្រុមហ៊ុនដែល តែក្រុមហ៊ុនហាក់មិនឆ្លើយនោះទេ ។ លោក ជា អ៊ុយ៖«ខ្ញុំសូមសំណូមពរដល់អង្គការឲ្យជួយដោះស្រាយដល់អ្នកភូមិផង ហើយបើកាលណាអត់ផ្លូវប្រជាជនដឹកផលដំណាំម ដឹកស្រូវដឹកឪឡឹកអីទៅតាមណាបើបិតផ្លូវគាត់អស់ហើយហ្នឹង ហើយផ្លូវហ្នឹងមិនមែនទើបមានឯណា មានយួហើយហ្នឹង»។
វិទ្យុស្ត្រីមិនទាន់អាចសុំការបំភ្លឺពីភាគីក្រុមហ៊ុនស្ករអំពៅទាំងពីរខាងលើបាននៅឡើយទេ។ តែបើតាមការឱ្យដឹងពីមេឃុំ និងម្ចាស់ចំការអ្នកស្រី កាន់ នាង ភាគីក្រុមហ៊ុននឹងផ្តល់ដំណឹងតបតាមស្នើធ្វើទ្វារដែកលើផ្លូវចេញចូលចំការរបស់ប្រជាពលរដ្ឋនៅថ្ងៃចន្ទសប្តាហ៍នេះ។
