ភ្នំពេញ៖ សាលារាជធានីភ្នំពេញគ្រោងនឹងបង្កើតសង្កាត់ចំនួន ៩ ឲ្យបានមុនការបោះឆ្នោតក្រមព្រឹក្សា/ឃុំសង្កាត់ ដើម្បីធានាការផ្តល់សេវាសាធារណៈដល់ប្រជាពលរដ្ឋកាន់តែមានភាពល្អប្រសើរថែមទៀត។
ការថ្លែងរបស់លោក ប៉ា សុជាតិវង្ស អភិបាលរាជធានីភ្នំពេញនេះ ធ្វើឡើងក្នុងពិធីបើកការដ្ឋានស្ថាបនាផ្លូវ នៅក្នុងខណ្ឌមាន ជ័យ កាលពីថ្ងៃទី៣០ ខែមិថុនា ឆ្នាំ២០១៦ ។ នេះបើតាមសារព័ត៌មាន AKP
បើតាម AKP ដដែលបានបញ្ជាក់ថា សំណើសុំបំបែកសង្កាត់ថ្មី នៅក្នុងក្រុងភ្នំពេញនេះ កំពុងតែស្ថិតនៅក្នុងដៃក្រសួងមហាផ្ទៃ ហើយក្រសួងមហាផ្ទៃនឹងដាក់ជូនទៅប្រមុខរាជរដ្ឋាភិបាលអនុម័តនៅពេលឆាប់ៗនេះ។
លោកអភិបាលរាជធានីភ្នំពេញ ប៉ា សុជាតិវង្ស បានថ្លែងថា ការបំបែកសង្កាត់មួយចំនួននេះ គឺដើម្បីបម្រើសេវាសាធារណៈប្រជាពលរដ្ឋឲ្យទាន់ពេលវេលា ស្របពេលដែលចំនួនប្រជាពលរដ្ឋមានតម្រូវការកើនឡើងពីជាង ១០ម៉ឺននាក់ ទៅ២០ម៉ឺននាក់។
ជាមួយគ្នានេះ ក្រៅពីគម្រោងបំបែកសង្កាត់ថ្មីក្នុងរាជធានីភ្នំពេញ ពី៩៦ សង្កាត់ ទៅ ១០៥សង្កាត់ អាជ្ញាធរក៏មានផែនការបំបែកភូមិថ្មីចំនួន ៣៧ បន្ថែមទៀត ក្នុងខណ្ឌចំនួន ៤ រួមមាន ខណ្ឌមានជ័យ ខណ្ឌសែនសុខ ខណ្ឌឫស្សីកែវ និងខណ្ឌពោធិសែនជ័យ ក្នុងចំណោមខណ្ឌទាំង១២ របស់រាជធានីភ្នំពេញ៕
ប្រភព៖ AKP
