ភ្នំពេញ៖ មេបក្សប្រឆាំងនិរទេសខ្លួនគឺលោក សម រង្ស៊ី បានអះអាងថា លោកពិតជាវិលត្រលប់ចូលប្រទេសវិញ ជា មួយនឹងការយល់ព្រមពីសម្ដេចនាយករដ្ឋមន្ត្រី គឺប្រហែលនៅខែឧសភា ឆ្នាំ២០១៧។ លោកថា វត្តមានរបស់លោកសំខាន់ណាស់ដើម្បីបញ្ជាក់ថា ការបោះឆ្នោតមានភាពសេរី និងត្រឹមត្រូវ ហើយបើពុំនោះទេ សហគមន៍អន្តរជាតិ នឹងមិនទទួលស្គាល់លទ្ធផលបោះឆ្នោតនោះទេ បើលោកមិនអាចចូលប្រទេសវិញបាននោះ។
តែបែបនេះក្ដីអ្នកនាំពាក្យគណបក្សប្រជាជនកម្ពុជាថា លោក សម រង្ស៊ី នឹងមកដេកនៅសណ្ឋាគារព្រៃស បើហ៊ានមកជាន់ដីកម្ពុជាវិញនោះ។
លោក សម រង្ស៊ី ជាមេដឹកនាំបក្សប្រឆាំងដែលកំពុងរស់នៅនិរទេសខ្លូនបានអះអាងថា លោកនឹងវិលចូលប្រទេសវិញនៅមុនខែមិថុនា ឆ្នាំ២០១៧ គឺមុនការបោះឆ្នោតក្រុមប្រឹក្សាឃុំ សង្កាត់ ដែលនឹងប្រព្រឹតទៅនៅថ្ងៃទី៤ មិថុនា ឆ្នាំ២០១៧។
លោក សម រង្ស៊ី បញ្ជាក់ដូចនេះនៅក្នុងបទសម្ភាសន៍មួយ ជាមួយទីភ្នាក់ងារសារព័ត៌មាន Reuters នៅទីក្រុងម៉ានីល ទីដែលលោកបានជួបប្រជុំជាមួយថ្នាក់ដឹកនាំរបស់លោក ដើម្បីវាយតម្លៃសភាពការណ៍នយោបាយនៅកម្ពុជា។ ក្នុងបទសម្ភាសន៍នេះ លោកបង្ហាញជំនឿចិត្តថា សម្ដេច ហ៊ុន សែន នឹងអនុញ្ញាតឱ្យលោកវិលចូលកម្ពុជាវិញ ដើម្បីដឹកនាំបក្សប្រឆាំងនៅក្នុងការបោះឆ្នោតក្រុមប្រឹក្សាឃុំ សង្កាត់ ឆ្នាំ២០១៧។
តែបែបនេះក្ដី លោក សមរង្ស៊ី បានលើកឡើងច្រើនទៀត ដោយវាយប្រហារសម្ដេចនាយករដ្ឋមន្ត្រី ។ លោកបានចោទសម្ដេច ហ៊ុន សែន ថាមានចេតនាចង់ធ្វើឱ្យខូចការបោះឆ្នោតឆ្នាំ២០១៨ ដែលលោកអះអាងថាគណបក្សសង្គ្រោះជាតិរបស់លោកនឹងឈ្នះឆ្នោត ។ លោក សម រង្ស៊ី៖«ខ្ញុំគិតថា លោក ហ៊ុន សែន ពិតជាបានដឹងថា ពិភពលោកមានការផ្លាស់ប្ដូរ ហើយលោក ហ៊ុន សែន មិនអាចច្បាមអំណាច បានទៀតឡើយ ហើយមេដឹកនាំផ្ដាច់ការជាច្រើនហើយបានចុះចេញពីតំណែង» ។
តែបែបនេះក្ដីលោក សុខ ឥសាន្ត អ្នកនាំពាក្យគណបក្សប្រជាជនកម្ពុជា បានផ្ដល់បទសម្ភាសន៍ជាមួយវិទ្យុស្ត្រីថា គ្មានការស្វា គមន៍លោក សម រង្ស៊ី ទេ។ លោកបញ្ជាក់ថា មានតែគុកទេ រង់ចាំស្វាគមន៍មេបក្សប្រឆាំងរូបនេះ ។ លោក សុខ ឥសាន្ត៖«សូមស្វាគមន៍គាត់ កាលណាគាត់អញ្ជើញចូលមក ព្រោះកន្លងទៅយើងមិនបានដេញគាត់ ហើយក៏មិនដែលហាមឃាត់គាត់ មិនឱ្យចូលដែរ។ ..វាច្បាស់ហើយពីព្រោះគាត់មានដីការ ស្ថាពររបស់តុលាការហើយ អញ្ចឹងពេលដែលគាត់ចូលមក គឺគាត់ទៅនៅសណ្ឋាគារព្រៃសរ»។
តែបែបនេះក្ដីអ្នកនាំពាក្យគណបក្សប្រជាជនកម្ពុជារូបនេះអះអាងថា ទោះជាលោក សម រង្ស៊ី ត្រូវបាននាំខ្លួនចូលពន្ធនាគារ តែការបោះឆ្នោតនៅតែដំណើរការតាមការកំណត់។
លោក សម រង្ស៊ី បានចាកចេញពីប្រទេសកម្ពុជានៅចុងឆ្នាំ ២០១៥ បន្ទាប់ពីសាលាឧទ្ធរណ៍ចេញដីកាចាប់ខ្លួនលោកពាក់ព័ន្ធសំណុំរឿងរបស់លោក ហោ ណាំហុង ប្ដឹងលោកពីបទបរិហារកេរ្តិ៍។ ក្រោយមកទៀតមេបក្សប្រឆាំងរូបនេះ ទទួលរងដីកាកោះ ហៅឱ្យចូលតុលាការពីបទបរិហារកេរ្តិ៍ និងករណីបង្ហោះផែនទីព្រំដែនមានចំនួន ៥ បទចោទ ។ តែបែបនេះក្ដីលោក សម រង្ស៊ី នៅតែអះអាងថា លោកនឹងត្រូវតែត្រឡប់មកប្រទេសកម្ពុជាវិញ ទោះកាលៈទេសៈណាក៏ដោយ ។
លោក គល់ បញ្ញា នាយកប្រតិបត្តិអង្គការខមហ្វ្រែលយល់ថា ប្រសិនបើលោក សម រង្ស៊ី វិលត្រលប់មកកម្ពុជានៅមុនការបោះឆ្នោតឃុំ សង្កាត់ ឆ្នាំ២០១៧ ហើយមានការចាប់ខ្លួននោះ នោះនឹងធ្វើឱ្យប៉ះពាល់ដល់ដំណើរការបោះឆ្នោត។
លោកមានប្រសាសន៍ថា ប្រសិនបើមានវត្តមានលោក សម រង្ស៊ី ចូលរួមបោះឆ្នោតឃុំសង្កាត់ឆ្នាំក្រោយ នោះនឹងធ្វើឱ្យមានការប្រកួតប្រជែងរវាងគណបក្សកាន់អំណាច និងគណបក្សប្រឆាំងបានពេញលេញ និងសេរី ហើយក៏ជួយឱ្យការបោះឆ្នោតកាន់ តែមានអត្ថន័យផងដែរ។ លោក គល់ បញ្ញា ៖«ការប្រកួតប្រជែងរបស់គណបក្សសំខាន់គឺមេដឹកនាំគណបក្សហ្នឹងឯង ដែលត្រូវតែមានវត្តមានចូលរួម ក្នុងការគាំទ្រជួយធ្វើយុទ្ធការឱ្យគណបក្សនយោបាយហ្នឹង។ ប្រជាពលរដ្ឋមួយចំនួនក្រៅតែពីមើលគោលនយោបាយរបស់គណបក្ស រចនាសម្ព័ន្ធរបស់គណបក្ស គេមើលអ្នកដឹកនាំគណបក្សដែរ អញ្ចឹងវត្តមានរបស់មេដឹកនាំគណបក្សនយោបាយហ្នឹងសំខាន់ណាស់ ជាពិសេសគណបក្សសំខាន់ៗដែលមានកម្លាំងប្រកួតប្រជែងគ្នា»។
នាយកប្រតិបត្តិអង្គការខមហ្វ្រេលរូបនេះ បានទទូចឱ្យគណបក្សធំៗទាំងពីរ គួរតែមានការសម្របសម្រួលនយោបាយមុនការបោះឆ្នោត និងបើកលទ្ធភាពឱ្យមានការប្រកួតប្រជែងឱ្យបានពេញ ដើម្បីឱ្យមេដឹកនាំ ឬអ្នកនយោបាយគណបក្សប្រឆាំង បានចូលរួមប្រកួតប្រជែងបានពេញលេញ និងគ្មានការបំភិតបំភ័យ។
លោក សម រង្ស៊ី ធ្លាប់និរទេសខ្លួនដូចនេះ ចំនួន ៤ លើកមកហើយ ប៉ុន្តែតែងតែបានចូលប្រទេសវិញមុនការបោះឆ្នោត ហើយធ្វើឡើងតាមរយៈការលើកលែងទោសពីព្រះមហាក្សត្រ តាមសំណើរបស់នាយករដ្ឋមន្ត្រី។
ប៉ុន្តែលោក សម រង្ស៊ី បានវិលចូលប្រទេសវិញ នៅមុនការបោះឆ្នោតឆ្នាំ២០១៣ ដោយមានអ្នកគាំទ្រ ប្រហែលមួយលាននាក់ទៅទទួលលោក ពីអាកាសយានដ្ឋានភ្នំពេញអន្តរជាតិ គឺបន្ទាប់ពីលោកប្ដេជ្ញាដើរ ចូលពន្ធនាគារ បើមានការចាប់ខ្លួនលោក តែប៉ុន្មានថ្ងៃក្រោយមកមានលិខិតលើកលែងទោសលោក ចេញដោយព្រះមហាក្សត្រ និងតាមសំណើរបស់សម្ដេចហ៊ុនសែន ។
តែយ៉ាងណាក្តីសម្ដេច ហ៊ុន សែន ធ្លាប់ស្បថថានឹងកាត់ដៃស្តាំក្រវែងចោលបើសម្ដេចចុះហត្ថលេខា ស្នើសុំព្រះមហាក្សត្រលើកលែងទោសឱ្យលោក សម រង្ស៊ី ជាថ្មីទៀតនោះ៕
