ភ្នំពេញ៖ រដ្ឋលេខាធិការក្រសួងមហាផ្ទៃ លោក ងី ច័ន្ទ្រផល បានលើកទ្បើងថា លទ្ធិប្រជាធិបតេយ្យពិតជាមានសារៈសំខាន់ក្នុងការរួមចំណែកលើកកម្ពស់សិទ្ធិមនុស្ស ហើយដើម្បីធ្វើឱ្យប្រទេសមានលទ្ធិប្រជាធិបតេយ្យ គឹត្រូវមានការចូលរួមពីគ្រប់ភាគីពាក់ព័ន្ធ ជាពិសេសតាមរយៈការបោះឆ្នោតជ្រើសរើសតំណាងដែលខ្លួនពេញចិត្ត ។
ប៉ុន្តែលោកថាការបោះឆ្នោតតែមួយ ក៏មិនអាចធ្វើឱ្យប្រទេសនោះ មានលទ្ធិប្រជាធិបតេយ្យបាននោះដែរ ។ ការថ្លែងបែបនេះធ្វើទ្បើងនៅក្នុងសិក្ខាសាលាថ្នាក់ជាតិស្តីពី «អភិបាលកិច្ច និងការបោះឆ្នោត ដើម្បីលើកកម្ពស់សិទ្ធិមនុស្ស និងលទ្ធិប្រជាធិបតេយ្យនៅកម្ពុជា » នាព្រឹកថ្ងៃទី ២៥ ខែមិថុនា ឆ្នាំ២០១៦នេះ នៅភោជនីយដ្ឋានទន្លេបាសាក់២ រាជធានីភ្នំពេញ ។
ដើម្បីឱ្យប្រទេសកម្ពុជាមានលទ្ធិប្រជាធិបតេយ្យគ្រប់ជ្រុងជ្រោយនោះ លុះត្រាតែមានការចូលរួមពីគ្រប់ភាគី ទាំងស្ថាប័នសាធារណៈ អង្គការសង្គមស៊ីវិល និងប្រជាពលរដ្ឋផ្ទាល់តែម្តង ជាពិសសេសការបង្កើតឱ្យមានច្បាប់បោះឆ្នោត និងច្បាប់ពីការរៀបចំនៃការប្រព្រឹត្តិទៅរបស់គណៈកម្មការរៀបចំការបោះឆ្នោតហៅកាត់ថា គ.ជ.ប ។ នេះជាការលើកឡើងរបស់លោក លោក ងី ច័ន្ទ្រផល រដ្ឋលេខាធិការក្រសួងមហាផ្ទៃ ។
រដ្ឋលេខាធិការក្រសួងមហាផ្ទៃ បានផ្តល់បទសម្ភាសន៍ជាមួយអ្នកសារព័ត៌មាន នៅថ្ងៃ សៅរ៍នេះថា លទ្ធិប្រជាធិបតេយ្យនៅកម្ពុជាគឺមានលក្ខណៈល្អប្រសើរច្រើនជាងមុន ហើយក្រសួងនឹងបន្តលើកកម្ពស់លទ្ធិប្រជាធិបតេយ្យ ឱ្យកាន់តែមានភាពល្អប្រសើរថែមទៀត ។
លោក ងី ច័ន្ទ្រផល បន្តថា ដើម្បីឱ្យប្រទេសកម្ពុជាអាចឈានទៅរកលទ្ធិប្រជាធិបតេយ្យគ្រប់ជ្រុងជ្រោយបាននោះ គឺត្រូវមានកិច្ចសហការពីប្រជាពលរដ្ឋ និងដៃគូរពាក់ព័ន្ធទាំងអស់ជាពិសេសតាមរយៈការបោះឆ្នោត ។
លោក ងី ច័ន្ទ្រផល សង្កត់ធ្ងន់ថា ទោះបីការបោះឆ្នោតមានសារៈសំខាន់ក្នុងការរួមចំណែកលើកកម្ពស់លទ្ធិប្រជាធិបតេយ្យក៏ដោយ ប៉ុន្តែបើមានតែការបោះឆ្នោតតែមួយនោះមិនអាចកំណត់បានថាប្រទេសមានលទ្ធិប្រជាធិបតេយ្យនោះទេ មានន័យថា ត្រូវមានធាតុផ្សំផ្សេងទៀតរួមមាន ៖ «ការបោះឆ្នោតតែមួយគត់មិនអាចកំណត់ថាប្រទេសហ្នឹងមានលទ្ធិប្រជាធិបតេយ្យនៅទ្បើយនោះទេ ប្រជាធិបតេយ្យគឺអាស្រ័យទៅលើការងារដែលខ្ញុំថាមិញហ្នឹង ការបោះឆ្នោតមួយ ប៉ុន្តែត្រូវមានអភិបាលកិច្ច ត្រូវមានគណនេយ្យភាពសង្គម ត្រូវមានការ ផ្តល់សេវាសាធារណៈគ្រប់គ្រាន់ យុត្តិធម៌ស្អីៗអស់ហ្នឹងសុទ្ធតែជាផ្នែកមួយនៃហេដ្ឋារចនា សម្ព័ន្ធលទ្ធិប្រជាធិបតេយ្យ…» ។
ជាមួយគ្នានេះដែរ អ្នកសម្របសម្រួលកម្មវិធីរបស់អង្គការយុវជនខ្មែរ និងការអភិវឌ្ឍសង្គមហៅកាត់ថា KYSD លោក ឈាន ចាន់ហៀង បានលើកទ្បើងថា ការចូលរួមបោះឆ្នោតរបស់ប្រជាពលរដ្ឋពិតជាមានសារៈសំខាន់ក្នុងការលើកកម្ពស់លទ្ធិប្រជាធិបតេយ្យនៅកម្ពុជា។ ប៉ុន្តែលោកទទួលស្គាល់ថា ការបោះឆ្នោតតែមួយពិតជាមិនអាចលើកកម្ពស់លទ្ធិប្រជាធិបតេយ្យឱ្យបានពេញលេញនោះទេ គឺត្រូវមានកត្តាផ្សេងៗទៀតរួមផ្សំ។
លោក ចាន់ ហៀង លើកទ្បើងដូច្នេះថា «គ្រាន់តែបោះឆ្នោតមួយមិនទាន់ពេញលេញដូចអ្វីដែលគាត់បានលើកទ្បើងគឺសំខាន់នៅក្នុងហ្នឹង យើងជាប្រជាពលរដ្ឋក៏ដូចជាអ្នកទទួលលខុសត្រូវក្នុងការដឹកនាំនៅក្នុងតំបន់របស់គាត់ហ្នឹងត្រូវមានការចូលរួម ហើយនឹងសហការគ្នាឱ្យវាមានភាពល្អប្រសើរជាងនេះទ្បើងដោយសាររាល់ថ្ងៃយើងឃើញថា ថ្នាក់ដឹកនាំមួយចំនួនគឺនៅមានការខ្វះខាតដែលទាក់ទងនឹងប្រាស្រ័យទាក់ទងនឹងការគ្រប់គ្រង ធ្វើយ៉ាងណាដំណើរឱ្យមានអភិបាលកិច្ចមានភាពល្អប្រសើរទ្បើង…»។
ចំណែកលោក ទូច ភីន ជំទប់ទី០១ នៅក្នុងឃុំដារ ខេត្តក្រចេះ យល់ថា ការចុះឈ្មោះបោះឆ្នោតគឺជារឿងសំខាន់ក្នុងការបង្ហាញអំពីលទ្ធិប្រជាធិបតេយ្យ ។ ដូច្នេះប្រជាពលរដ្ឋត្រូវចូលរួមបោះឆ្នោតឱ្យបានគ្រប់ៗគ្នា ។«ខ្ញុំយល់ថាតាំងពីឆ្នាំមុនៗរហូតមកដល់កិច្ចដំណើរការនេះ លទ្ធិប្រជាធិបតេយ្យមានគ្រប់គ្រាន់ហើយ ព្រោះយើងធ្វើតម្លាភាពទាំងអស់ ទាំងដំណើរការបោះឆ្នោត ទាំងការចុះបោះឆ្នោត ទាំងបោះឆ្នោតជាដើម »។
សូមជំរាបថា ការរៀបចំសិក្ខាសាលាថ្នាក់ជាតិស្តីពី «អភិបាលកិច្ច និងការបោះឆ្នោត ដើម្បីលើកកម្ពស់សិទ្ធិមនុស្ស និងលទ្ធិប្រជាធិបតេយ្យនៅកម្ពុជា » ធ្វើទ្បើងក្នុងគោលបំណងដើម្បីផ្តល់ឱកាសដល់យុវជន សហគមន៍ និងអាជ្ញាធរមូលដ្ឋានបានស្វែងយល់ និងចែករំលែកពីការធ្វើអត្តសញ្ញាណប័ណ្ណប្រជាពលរដ្ឋ ការចុះឈ្មោះបោះឆ្នោត និងផ្តល់អនុសាសន៍កែលំអរពីការចុះឈ្មោះ និងការបោះឆ្នោតនាពេលខាងមុខឱ្យប្រសើរទ្បើង ដែលមានអ្នកចូលរួមសរុបប្រមាន១០០នាក់ ៕