ភ្នំពេញ៖ លោក សុន ឆ័យ ប្រធានក្រុមតំណាងរាស្ដ្រគណបក្សសង្គ្រោះជាតិមានប្រសាសន៍ថា កំហុសរបស់លោក ហុង សុខហួរ គឺជាកំហុសអចេតនា របស់លោកតែប៉ុណ្ណោះគឺសមាជិកព្រឹទ្ធសភារូបនេះ គ្មានបំណងដើម្បី វាយប្រហារ គណបក្សនយោបាយណាមួយនោះឡើយ ហើយលោកពិតជាពុំបានដឹងថា ផែនទីនោះក្លែងក្លាយទេ ។ លោក សុន ឆ័យ ថាលោក ហុង សុខហួរ គួរតែត្រូវទទួលបានការដោះលែង ឱ្យមានសេរីភាពឡើងវិញ ។
ផ្ទុយទៅវិញអ្នកនាំពាក្យបក្សកាន់អំណាច ចាត់ទុកការលើកឡើងរបស់លោក សុន ឆ័យ គឺជារឿងចង់សើច ។ លោកថា លោក ហុង សុខហួរ ជាបញ្ញាជនហេតុអ្វីលោកមិនស្គាល់ អ្វីជាទោស នាំឱ្យមានកំហុស ។
អ្នកវិភាគយល់ថា ការប្រព្រឹត្ដិរបស់លោក ហុង សុខហួរ មិនមែនដល់ថ្នាក់ មិនអាចនិយាយគ្នាបាននោះទេ ហើយរាជរដ្ឋាភិបាលគួរពិរណាសំណើរសុំនេះឡើងវិញ ។ លោក លៀ ស៊ីណា ជូនសេចក្តីរាយការណ៍ ៖
លោក ហុង សុខហួរ សមាជិកព្រឹទ្ធសភាគណបក្ស សម រង្ស៊ី ដែលត្រូវអាជ្ញាធរចាប់ខ្លួន ដោយចោទពីបទក្លែងឯកសារផែនទី លោកបានផ្ដាំផ្ញើពាក្យសម្ដីតាមរយៈលោក សុន ឆៃ ប្រធានក្រុមតំណាងរាស្ដ្រគណបក្សសង្គ្រោះជាតិ នៅព្រឹកថ្ងៃ ពុធ ទី ២២ ខែ មិថុនា ថា លោកគ្មានចេតនាអ្វីដែលចង់បង្កជា អំពើរអស្ថេរភាពក្នុងសង្គមនោះឡើយ ។
លោក សុន ឆ័យ បញ្ជាក់ថា ចំពោះឯកសារសន្ធិសញ្ញាព្រំដែន ដែលលោក ហុង សុខហួរ បានយកទៅបង្ហោះនិងធ្វើសេចក្ដីថ្លែងការណ៍ កាលនោះព្រោះលោកស្មានថាវាជាឯកសារ ពិតប្រាកដ ព្រោះលោកបានឃើញវានៅក្នុងគេហទំព័រមួយ យូរមកហើយ ។
លោក សុន ឆ័យ បានថ្លែងថា លោក ហុង សុខហួរ គ្មានបំណងអាក្រក់ប្រឆាំងរដ្ឋាភិបាលទេ តែលោកថា គឺជារឿងអចេតនា របស់លោកសមាជិកព្រឹទ្ធសភារូបនេះតែប៉ុណ្ណោះ ។
លោក សុន ឆៃ៖ «ការដែរឯកឧត្ដម ហុង សុខហួរ បង្ហោះឯកសារកាលពីពេលមុន និង ការថ្លែងការណ៍ផង គឺជាកំហុសអចេតនា ហើយការចោទប្រកាន់ថា គាត់ទៅកកូកកាយទៅវាយប្រហារគណបក្សណាៗ ដែលនាំឲ្យមានការបាត់បង់ប្រជាប្រិយ៍ភាពទេ ក្នុងនាមគាត់ជាសមាជិកព្រឹត្ដសភា ហើយក៏ជាប្រធានគណកម្មាការប្រឆាំងអំពើរពុករលួយទៅទៀត នេះជាចំណុមួយដែលគាត់ផ្ដាំផ្ញើរ មក ហើយគាត់សង្ឃឹមថា និង មានការយោគយល់ពីគណបក្សកាន់អំណាច ជួយសម្រួលដល់តុលាការដែលអាចឲ្យគាត់នៅក្រៅឃុំបានផង» ។
ការថ្លែងរបស់លោក សុន ឆ័យ ធ្វើឡើងក្នុងពិធីធ្វើសេចក្ដីថ្លែងការណ៍ ប្រចាំថ្ងៃ នៅស្នាក់ការគណបក្សសង្គ្រោះជាតិ នៅចាក់អង្រែលើ កាលពីព្រឹកថ្ងៃពុធទី២២ មិថុនានេះ ។
ប៉ុន្ដែលោក សុខ ឥសាន្ដ អ្នកនាំពាក្យគណបក្សប្រជាជនកម្ពុជា មានប្រសាសន៍ជាមួយវិទ្យុស្ដ្រីFM102 នៅថ្ងៃ ពុធ ទី ២២ មិថុនា នេះថា លោក ហុង សុខហួរ ជាអ្នកចេះដឹងដែលតែងតែអួតថា ខ្លួនមានសញ្ញាបត្រមកពីក្រៅប្រទេស ។
លោកថា សម្ដីរបស់លោក ហុង សុខហួរ នេះគឺជា សម្ដីដោះសារដើម្បីគេចពីការទទួលខុសត្រូវនូវទង្វើររបស់ខ្លួន ។
អ្នកនាំពាក្យបក្សកាន់អំណាចបន្ថែមថា ទោះជាសំណើរបស់លោក ហុង សុខហួរ យ៉ាងណាក៏គណបក្សមិនយកមកពិចារណាទេ ព្រោះទង្វើដែលបានធ្វើមក គឺជាការប្រមាថដល់កិត្ដិយស់គណបក្សប្រជាជន និង មានគំនិតទុច្ចរិតចង់បំភ័ន្ដ ធ្វើឲ្យប្រជាពលរដ្ឋឲ្យស្អប់រាជរដ្ឋាភិបាលហើយ ដើម្បីសំលាប់ជីវិតនយោបាយបក្សប្រជាជន ។
លោក សុខ ឥសាន្ដ បញ្ជាក់ថា រាជរដ្ឋាភិបាលនៅតែប្រកាន់ជំហររបស់ខ្លួនគឺមិនលូកដៃចូលរឿងកិច្ចការរបស់តុលាការដែលជា ស្ថានប័ណ្ណឯករាជ្យនោះឡើយ ។
លោក សុខ ឥសាន្ដ៖ «ប្រការនេះគឺជានិយាយដោះសារឬការនិយាយយករួចខ្លួនដើម្បីសម្រាលទោសរបស់ខ្លួនតែប៉ុណ្ណោះ យើងមើលឃ្លាំវីដេអូគាត់ គាត់ពន្យល់យុវជន ហើយគាត់បំផុសយុវជន ថារដ្ឋាភិបាលបានចុះកិច្ចព្រមព្រៀងដើម្បីរំលាយខ្សែបន្ទាត់ព្រំដែន វៀតណាមតើខ្លឹមសារហ្នឹងមានន័យយ៉ាងម៉េច ខ្ញុំយល់ថានេះជាឧបាកលដ៏ទុច្ចរិតមួយដែលចង់បំបាក់ស្មារតីពលរដ្ឋ ហើយចង់សំលាប់ជីវិតនយោបាយគណបក្សប្រជាជនកម្ពុជា» ។
រឿងក្ដីរបស់លោក ហុង សុខហួរ ត្រូវបាន អ្នកសង្កេតការណ៍មួយចំនួន ចាត់ទុកជារឿងនយោបាយ ។ អ្នកវិភាគខ្លះ ចាត់ទុកលោក ហុខ សុខហួរ ជាអ្នកស្នេហាជាតិ ចេះភ័យខ្លាចពីការបាត់ទឹកដីទៅប្រទេស ជិតខាង ។
លោកបណ្ឌិត មាស នី អ្នកស្រាវជ្រាវពីការអភិវឌ្ឍន៍សង្គមយល់ឃើញថា ពលរដ្ឋក្នុងប្រទេសកាន់របបលទ្ធិប្រជាធិបតេយ្យ គឺត្រូវតែមានសិទ្ធិក្នុងការបញ្ចេញមតិដែលជាការយល់ឃើញរបស់ពួកគេ ។
លោកថា សម្រាប់ករណីលោក ហុង សុខហួរ នេះគឺជារឿងអយុត្ដិធម៍ ព្រោះតែលោកបញ្ចេញមតិក្នុងនាមជាពលរដ្ឋមួយរូបដែល គិតគួរពីទឹកដីប្រទេសប៉ុណ្ណោះ ។ លោកថា ប្រសិនជាពលរដ្ឋក្នុងប្រទេសប្រជាធិបតេយ្យ មិនមានសិទ្ធិក្នុងសម្ដែងចេញពីអ្វីដែលខ្លួនយល់ឃើញថា មិនត្រឹមត្រូវ ហើយរដ្ឋាភិបាលបិត ការបញ្ចេញមតិនោះមានន័យថា រដ្ឋាភិបាលមិនបានចាត់ទុកពលរដ្ឋខ្លួនឯងជាម្ចាស់ប្រទេសទេ ។
អ្នកស្រាវជ្រាវពីការអភិវឌ្ឍន៍សង្គមរូបនេះបន្ដថា ប្រសិនជាគណបក្សកាន់អំណាចយល់ថា ទង្វើរបស់លោក ហុង សុខហួរ មានការប៉ះពាល់ដល់កិត្ដិយស់គណបក្សធ្ងន់ធ្ងរ គណបក្សគួរឲ្យលោក ហុង សុខហួរ កែតម្រូវ ហើយគណបក្សគួរតែចុះទៅជួបពលរដ្ឋតាមព្រំដែនដើម្បីពន្យល់ ឲ្យយល់ ពីរឿងព្រំដែននេះឲ្យបានច្បាស់លាស់ ។
លោកបណ្ឌិត មាស នី បញ្ជាក់ថា ប្រសិនជាអ្នកនយោបាយនៅកម្ពុជា ចេះតែឈ្លោះគ្នាមិនព្រមផ្សះផ្សាគ្នាបែបនេះ នោះនឹងនាំពលរដ្ឋខ្មែរ កាន់តែរងទុក្ខបន្ថែមពុំខាន ។
លោក មាស នី៖ «ខ្ញុំគិតថា ប្រសិនជាគណបក្សកាន់អំណាចសព្វថ្ងៃ គាត់មានការប្រុងប្រយ័ត្នមែន សម្រាប់ពលរដ្ឋនៅតាមព្រំដែនស្វាយរៀង ព្រៃវែង អីរដ្ឋាភិបាលគួរតែចុះទៅមើលពលរដ្ឋដើម្បីពន្យល់គាត់ ឲ្យបានយល់ ថា វាយ៉ាងម៉េច ក៏ប៉ុន្ដែបើមិនអាចចុះទៅមើលបាន ពន្យល់បាន វាទៅជារឿងឆ្ងល់វិញ ថារឿងព្រំ ដែលខ្មែរទាំងអស់គ្នាម្ដេចមិនអាចចុះទៅមើលបាន ចុះទៅសម្របសម្រួលបានទៅវិញ» ។
លោក ហុង សុខហួរ ត្រូវបានសមត្ថកិច្ចចាប់ខ្លួន កាលពីថ្ងៃទី១៥សីហា ឆ្នាំ២០១៥ គឺភ្លាមៗ បន្ទាប់ពីសម្ដេច ហ៊ុន សែន ថ្លែងរិះគន់វាយប្រហារលោកធ្ងន់ៗលើលោក ហើយ សម្ដេច ចោទលោកថាប្រព្រឹត្តអំពើក្បត់ជាតិ ករណី លោក បកស្រាយឯកសារមួយ ដែលគេថាក្លែងក្លាយ ហើយឯកសារនេះនិយាយពី សន្ធិសញ្ញាព្រំដែនកម្ពុជា វៀតណាម ឆ្នាំ១៩៧៩ ។ លោក ហុង សុខហួរ បានព្យាយាមប្ដឹងសុំនៅក្រៅឃុំ តែត្រូវបានបដិសេធ ៕
