ភ្នំពេញ៖ ក្រុមយុវជនស្ម័គ្រចិត្ត « យុវជនដើម្បីយុវជន» ឬហៅថា YFY ត្រៀមរៀបចំកម្មវិធីជំនួបយុវជនឆ្នើមដ៏ធំមួយ ក្រោមប្រធានបទ « គន្លឹះកសាងខ្លួនជាយុវជនឆ្នើមសតវត្សទី២១» ប្រព្រឹត្តទៅនៅព្រឹកថ្ងៃទី ២៦ ខែកក្កដា ឆ្នាំ២០១៥ ខាងមុននៅសាកលវិទ្យាល័យបញ្ញាសាស្ត្រ។ កម្មវិធីជំនួបយុវជនឆ្នើមនេះ មានគោលបំណងចែករម្លែកចំណេះដឹងនិងបទពិសោធន៍ក្នុងការសិក្សាដល់យុវជនពីយុវជនឆ្នើមដែលជោគជ័យក្នុងការសិក្សា មានឆន្ទៈក្នុងការសិក្សា និងគោលដៅការងារច្បាស់លាស់។ តាមការគ្រោងទុកកម្មវិធីនេះ នឹងអនុញ្ញាតឱ្យយុវជនចូលរួមប្រមាណជាង ៦០០ នាក់។
យុវជន ទីន សុខលឹម ជាប្រធានក្រុមយុវជន YFY ជាអ្នកដឹកនាំការរៀបចំកម្មវិធីបាននិយាយថា គោលបំណងនៃការរៀបចំកម្មវិធីជំនួបយុវជនឆ្នើមនេះ មាន ៣ ចំណុចសំខាន់ៗ ដែលនឹងផ្តល់ឱ្យយុវជន។ ទី១ ផ្តល់កសាងទំនុកចិត្ត និងភាពច្បាស់លាស់ក្នុងការរៀបចំគោលដៅនិងផែនការនៅក្នុងជីវិតទៅដល់យុវជន។ ទី២ ធ្វើឱ្យយុវជនរៀនស្វែងយល់ពីខ្លួងឯង ដើម្បីលើកកម្ពស់ការយល់ដឹងពីតួនាទីរបស់ខ្លួនក្នុងសង្គម និងទី៣ ជំរុញឱ្យយុវជនចូលរួមយ៉ាងសកម្មនៅក្នុងការសិក្សា ការធ្វើការងារស័្មគ្រចិត្ត និងការងារសង្គមផ្សេងៗ ដើម្បីឱ្យសង្គមជាតិមានការអភិវឌ្ឍន៍ឆ្ពោះទៅមុខ។
យុវជនរូបនេះ បានឱ្យដឹងថា៖ « យុវជនកម្ពុជាក្នុងពេលបច្ចុប្បន្នកំពុងត្រូវការចំណេះដឹងបន្ថែមទៀត លើចំណេះដឹងដែលពួកគាត់មានស្រាប់ ដូចគន្លឹះនៃការគិត គន្លឹះជោគជ័យក្នុងការសិក្សា និងការកំណត់គោលដៅជីវិតជាដើម។ កម្មវិធីយើងនឹងធ្វើឱ្យពួកគាត់ទទួលបានចំណេះដឹងទាំងនេះ ហើយយុវជនអាចចាប់ផ្តើមអនុវត្តចំណេះដឹងដែលពួកគាត់ទទួលបានដើម្បីឱ្យការសិក្សា ការងារ និងក្តីសុបិនរបស់ខ្លួនក្លាយជាការពិតនៅថ្ងៃអនាគត»។
ប្រធានក្រុមយុវជនដឹកនាំកម្មវិធី វ័យ ២០ ឆ្នាំរូបនេះ បានឱ្យដឹងបន្ថែមទៀតថា កម្មវិធីដែលក្រុមយុវជន YFY រៀបចំឡើងនេះ មានការចូលរួមចែករម្លែកបទពិសោធន៍ពីយុវជនឆ្នើមរបស់កម្ពុជាចំនួន ៣ រូបរួមមាន កញ្ញា តោ គឹមស៊ី សិស្សនិទ្ទេស A តែម្នាក់គត់ប្រឡងយកសញ្ញាបត្រទុតិយភូមិឆ្នាំ ២០១០ និងជានិស្សិតឆ្នើមផ្នែកគណិតវិទ្យាសាកលវិទ្យាល័យ Manhattan សហរដ្ឋអាមេរិក។ ក្តីស្រមៃរបស់ គឹមស៊ី គឺចង់ក្លាយជារដ្ឋមន្រ្តីក្រសួងអប់រំនៅកម្ពុជា។ កញ្ញា អៀង លីនដា ជ័យលាភីលេខ ១ នៃកម្មវិធី « អ្នកបន្តវេន » ឆ្នាំ ២០១៥ រៀបចំឡើងដោយវិទ្យាស្ថានសាធារណរដ្ឋអន្តរជាតិ (IRI) និងប្រធានសភានិស្សិតសាកលវិទ្យាល័យបញ្ញាសាស្រ្ត។ លោក ប៊ិន យ៉ាន ជានិស្សិតឆ្នើមនៅសាកលវិទ្យាល័យបញ្ញាសាស្រ្ត មានបំណងចង់ក្លាយជានាយករដ្ឋមន្រ្តីនៃប្រទេសកម្ពុជានាពេលអនាគត។
សូមបញ្ជាក់ថា ការរៀបចំកម្មវិធី « គន្លឹះកសាងខ្លួនជាយុវជនឆ្នើមសតវត្សទី២១ » មានរៀបចំឡើងដោយយុវជនស្ម័គ្រចិត្តចំនួន ៦០ នាក់ មកពីបណ្តាសាកលវិទ្យាល័យនានានៅរាជធានីភ្នំពេញ។ កម្មវិធីចាប់ផ្តើមនៅថ្ងៃទី ២៦ ខែកក្កដា ឆ្នាំ២០១៥ ចាប់ពីម៉ោង ៧ : ៣០ នាទីព្រឹក ដល់ម៉ោង ១១ : ៣០នាទីព្រឹក៕
