ភ្នំពេញ៖ សមាជីកព្រឹទ្ធសភាម្នាក់មកពីគណបក្ស សម រង្ស៊ី លោក ហុង សុខហួរ នៅព្រឹកថ្ងៃទី ១៧ ខែ មិថុនានេះ ត្រូវ បានអនុរក្សពន្ធធាគារព្រៃស នាំខ្លួនមកសាលាដំបូងរាជធានីភ្នំពេញ ដើម្បីសាកសួរក្នុងនាមជាសាក្សី ក្នុង សំនុំរឿងលោក សម រង្ស៊ី បង្ហោះឯកសារផែនទីជាមួយប្រទេសកម្ពុជា វៀតណាម ។ តែអ្នកតាមដានបញ្ហា សង្គមគិតថា សំនុំរឿងព្រំដែន គឺជារឿងនយោបាយ ហើយជនជាប់ចោទគឺជាមនុស្សប្រើស្មារតីជាតិ ដែល មិនគួរមានទោសពីរឿងនេះទេ ។ លោក ធូ វិរៈ រាយការណ៍ព័ត៌មាននេះ ៖
សំនុំរឿង លោក សម រង្ស៊ី បង្ហោះឯកសារផែនទីកម្ពុជា វៀតណាម នៅលើទំព័រហ្វេសប៊ុករបស់លោក ហើយ ត្រូវបានរាជរដ្ឋាភិបាល ប្ដឹងចោទថា មេបក្សប្រឆាំងរូបនេះបានប្រើប្រាស់ផែនទីក្លែងក្លាយ បានក្លាយជា ករណីព្រហ្មទណ្ឌ ហើយផ្ដើមឱ្យតុលាការ កោះហៅ អ្នកពាក់ព័ន្ធមកសាកសួរ ។ លោក ហុង សុខហួរ សមាជិកព្រឹទ្ធសភាមកពីគណបក្សសម រង្ស៊ី ដែលមានរឿងក្ដីករណីនេះ រួចហើយនៅថ្ងៃនេះ ត្រូវបាន តុលាការាជធានីភ្នំពេញនាំខ្លួនមកសាកសួរលោកពាក់ព័ន្ធសំនុំរឿងលោក សម រង្ស៊ី ហើយក្រោយពីសាកសួរ មន្ត្រីនាំពាក្យតុលាការនិយាយថាមានបុគ្គលមួយចំនួនទៀតនឹងត្រូវដាក់ឱ្យស្ថិតនៅក្រោមការស៊ើបអង្កេត ។
លោក លី សុផាណា អ្នកនាំពាក្យសាលាដំបូងរាជធានីភ្នំពេញ បានមានប្រសាសន៍ថា ចៅក្រមស៊ើបសួរ សាលាដំបូងរាជធានីភ្នំពេញ លោក កោ វណ្ឌី កោះហៅ លោក ហុង សុខហួរ សមាជិកព្រឹទ្ធសភា មកពី គណបក្សប្រឆាំងមកស្តាប់ចម្លើយក្នុងនាមជាសាក្សីក្នុងសំនុំរឿងបង្ហោះឯកសារក្លែង លើបណ្តាញសង្គមហ្វេសប៊ុក ពីបទក្លែងឯកសារសាធារណៈ និងញុះញង់បង្កឲ្យភាពវឹកវរដល់សន្តិសុខសង្គម ។
លោក លី សុផាណា បន្ថែមថា ការស្តាប់ចម្លើយនេះ ជាដំណាក់កាលស៊ើបសួរទៅលើ អ្នកដែលពាក់ព័ន្ធ ផ្សេងទៀត និងនៅលើភស្តុតាំងមួយចំនួនទៅលើរឿងក្តីនេះ ។ លោក លី សុផាណា៖«ចៅក្រមស៊ើបសួរ បន្ត កិច្ច សើបសួរទៅលើបុគ្គលដែលពាក់ព័ន្ធ និងពិនិត្យទៅលើភស្តុតាំងនានា នៅក្នុងរឿងក្តីនេះ» ។
នៅពេលសមត្ថកិច្ចបណ្តើចូលរថយន្តដឹកត្រឡប់ពន្ធធាគារព្រៃសវិញ លោក ហុង សុខហួរ បានមានប្រសាសន៍ប្រាប់អ្នកសាព័ត៌មានថា តុលាការសាកសួរក្នុងសំនុំ រឿងប្រធានគណបក្សសង្គ្រោះជាតិ លោក សម រង្ស៊ី ។ លោក ហុង សុខហួរ៖«ក្នុងនាមជាសាក្សីរឿង សម រង្ស៊ី» ។
ចំណែកមេធាវីការពារក្តី លោក ហុង សុខហួរ គឺ លោក ជួង ជូងី មានប្រសាសន៍ថា លោកពុំដឹងថាកូនក្ដីត្រូវបាននាំខ្លួនមកសាកសួរនៅថ្ងៃនេះទេ ។ ប៉ុន្តែលោកដឹងតាមរយៈសារព័ត៌មានប៉ុណ្ណោះ ។
លោកបន្តថា ប្រសិនប្រើចៅក្រមស៊ើបសួរនាំខ្លួនកូនក្តីរបស់លោកមកស្តាប់ចម្លើយក្នុងនាមជាសាក្សីគឺ មិនខុសទាស់អ្វីទេ ។ ប៉ុន្តែបើក្នុងនាមជាជនត្រូវចោទ តុលាការត្រូវតែជូនដំណឹងឲ្យមេធាវីឲ្យបានដឹងជាមុន ។
លោក ជួង ជូងី ថ្លែងថា៖«ខ្ញុំក៏មិនច្បាស់១០០ភាគរយថាតើគេនាំខ្លួនគាត់ទៅក្នុងនាមអ្វីទេ ។ បើគេនាំក្នុងនាមជនត្រូវចោទ តុលាការត្រូវអញ្ចើញខ្លួនខ្ញុំទៅទើបត្រឹមត្រូវ ហើយនាំខ្លួនក្នុងនាមជនជាប់ចោទមិនអញ្ចើញមេធាវីចូលរួមខុសហើយ ប៉ុន្តែនាំគាត់ទៅក្នុងបំភ្លឺជាសាក្សី អត់មានបញ្ហាអ្វីទេ» ។
តែបែបនេះក្ដី អ្នកតាមដានបញ្ហាសង្គម លោក បណ្ឌិត មាសនី គិតថាករណីគណបក្សប្រឆាំងដែលមិន ចេះចប់នេះ គឺជាយុទ្ធសាស្ត្រមួយ គាប់សង្កត់ លើបក្សប្រឆាំងនេះ ។ លោក យល់ថា ដើម្បីបញ្ចប់រឿងនយោបាយនេះ គឺ គេត្រូវមានដំណោះស្រាយ ដោយការយោគយល់គ្នា ។
លោក មាស នី៖ «អ្នកនយោបាយគួរតែរៀនសូត្រពិចារណាឡើងវិញអ្វីដែល យើងបានលូករហូតមកដល់ពេលថាតើវារលាក វាក្តៅប៉ុណ្ណា នេះលើកលែងតែក្នុងករណីមួយដែលគេដើរតាមខ្សែបន្ទាប់កាលពីឆ្នាំ ៩៧ គេមានបំណងជាក់លាក់អ្វីមួយ ដើម្បីធ្វើឲ្យដល់ទិសដៅមួយដែលគេចង់បាន យើងមិនហ៊ានថា បោះបីធ្វើយ៉ាងណាក៏អត់ត្រូវដែរ» ។
លោក ហុង សុខហួរ ត្រូវបានសមត្ថកិច្ចចាប់ខ្លួន កាលថ្ងៃទី១៥ ខែសីហា ឆ្នាំ២០១៥ បន្ទាប់ពីលោកបានបង្ហោះ ឯកសារសន្ធិសញ្ញាព្រំដែនកម្ពុជា-វៀតណាម លើគណនេយ្យ Facebook របស់លោក សម រង្ស៊ី ។ ចំណែក លោក សម រង្ស៊ី ដែលកំពុងនិរទេសខ្លួន ត្រូវបានរដ្ឋាភិបាលប្ដឹង ករណីដូចលោក ហ៊ុង សុខហួរ ដែរ ដោយសារលោក បង្ហោះ ឯកសារផែនទី របស់លោកហើយលោក ហុង សុខហួរ ជាអ្នកបកស្រាយរឿងនេះ ត្រូវបានចោទប្រកាន់ ឃុំពីបទក្លែងឯកសារ និងញុះញុងបង្កអស្ថេរភាពសង្គម ៕
