រដ្ឋមន្ត្រីការបរទេសចិន និងសមភាគីនៃសមាគមអាស៊ីអាគ្នេយ៌ បានជួបប្រជុំគ្នានៅទីក្រុង យូ ស៊ី (YUXI) ប្រទេសចិនចំពេលក្រុងប៉េកាំង ព្យាយាមបង្វែងការព្រួយបារម្ភ ករណីជម្លោះនៃសមុទ្រខាងត្បូង ដែលចិនបានចូលលុកលុយផ្នែកខ្លះរួចហើយ ។
តាមទីភ្នាក់ងារសារព័ត៌មាន AP រដ្ឋមន្ត្រីការបរទេសចិន Wang Yi បានថ្លែងនៅឯកិច្ចប្រជុំនៅថ្ងៃអង្គារនេះថាភាគីពាក់ព័ន្ធករណីជម្លោះដែនសមុទ្រគួរតែ មានគំនិតរួមគ្នាហើយផ្ដើមសហប្រតិបត្តិការជាមួយគ្នាដោយ ភាពរាក់ទាក់ ។
ប្រទេស ៤ក្នុងចំណោម១០ប្រទេសនៃសមាគមអាស៊ាន គឺប្រទេស ហ្វីលីពីន វៀតណាម ព្រុយណេ និង ម៉ាឡេស៊ី បានប្រកាសថាតំបន់សមុទ្រចិនខាងត្បូង គឺជាដែនទឹករបស់ពួកគេ ហើយ ចិនក៏ប្រកាសដែរថាគឺដែនទឹកប្រវត្តិសាស្ត្រចិន យូរពាន់ឆ្នាំហើយ ។
យ៉ាងណាក៏ដោយ ជំលោះនេះត្រូវបាន ក្រុងម៉ានីលនាំទៅកាន់មជ្ឈឹត្តការ អង្គការសហប្រជាជាតិ ដោយប្ដឹងក្រុងប៉េកាំង ថាបានរំលោភយកដែនទឹករបស់ខ្លួន ហើយពេលនេះ ក្រុងម៉ានីលកំពុងរង់ចាំសេចក្ដីសម្រេច របស់តុលាការអន្តរជាតិ ដែលគេរំពឹងថានឹងប្រកាសឱ្យដឹងនៅខាងមុខនេះ ខណៈចិន ថ្លែងបដិសេធថាមិនទទួលយកសេចក្ដីសម្រេច ណាមួយឡើយ ។
តំបន់កោះនៃសមុទ្រចិនខាងត្បូង ដែលចិនចូលលុកលុយបានខ្លះ គឺជាតំបន់មានធនធានរ៉ែ និង សំបូរដោយត្រីសមុទ្រ គ្រប់ប្រភេទ ៕ ប្រភព:CNA
