ភ្នំពេញ៖ គណបក្សសង្គ្រោះជាតិ នៅរសៀលថ្ងៃច័ន្ទនេះបានចេញសេចក្ដីថ្លែងការណ៍ ដោយបញ្ជាក់ថា លោក កឹម សុខា ប្រធានស្ដីទីរបស់គណបក្សនេះ នឹងបន្តមិនចូលខ្លួនតាមដីការបង្គាប់របស់ចៅក្រមស៊ើបសួរ នៃសាលាដំបូងរាជធានីភ្នំពេញដែលត្រូវឱ្យចូលខ្លួននៅថ្ងៃអង្គារទី១៤ មិថុនា ។
សេចក្ដីប្រកាសព័ត៌មានរបស់គណបក្សសង្គ្រោះជាតិ នៅថ្ងៃទី១៣ ខែមិថុនា ឆ្នាំ២០១៦ ដដែល បានឱ្យដឹងបន្ថែមទៀតថាការមិនចូលខ្លួន តាមដីការបង្គាប់របស់ចៅក្រមសាលាដំបូងរាជធានីភ្នំពេញនេះ ដោយសំអាងលើលោក កឹម សុខា មានអភ័យឯកសិទ្ធិសភា ។
យោងសេចក្ដីប្រកាសព័ត៌មានរបស់គណបក្សសង្គ្រោះជាតិ លោក កឹម សុខា បានប្រគល់សិទ្ធិឲ្យក្រុមមេធាវី ចូលទៅកាន់តុលាការតាមកាលបរិច្ឆេទរបស់តុលាការ ដើម្បីនាំយកលិខិតជូនដំណឹង អំពីមូលហេតុសមស្របនៃការមិនអាចចូលខ្លួនរបស់លោក កឹម សុខា និងលិខិតស្នើសុំដែលជាសារណា របស់ក្រុមមេធាវី ទៅជូនចៅក្រមស៊ើបសួរដោយផ្ទាល់ ។
សូមរំលឹកថា លោក កឹម សុខា មិនបានចូលខ្លួន ចំនួន២លើកករណី សញ្ជារកម្ម ក្នុងសំនុំ រឿង នាង ខុម ចាន់តារាទី ហៅស្រីមុំ ហើយដីការចូលខ្លួននៅថ្ងៃទី១៤មិថុនា គឺករណី ដែលលោកបដិសេធ ការមិនចួលខ្លួន ករណីសញ្ជារកម្ម ។
តុលាការរាជធានីភ្នំពេញបានចោទលោក ពីបទព្រហ្មទណ្ឌជាក់ស្ដែង ដែលអ្នកសង្កេតការណ៍ព្រមានថា លោក កឹម សុខា អាចនឹងត្រូវតុលាការឃាត់ខ្លួន ។ នៅថ្ងៃទី១៤ មិថុនានេះ គណបក្សសង្គ្រោះជាតិបាន ប្រកាសឱ្យពលរដ្ឋគាំទ្រខ្លួន មកកាន់សា្នក់ការបក្សនៅសង្កាត់ចាក់អង្រែលើ រាជធានីភ្នំពេញដើម្បីការពារលោក កឹម សុខា ពីការចាប់ខ្លួន ៕
