ភ្នំពេញ៖ អង្គការក្រៅរដ្ឋាភិបាលចំនួន ០៥ នឹងរួមគ្នាបង្កើតព្រឹត្តិការណ៍អ៊ិនធឺណិតបើកទូលាយ នៅថ្ងៃទី ១២ ខែមិថុនាស្អែកនេះ ក្រោមប្រធានបទ «យុគ្គសម័យអ៊ិនធឺណិត និង សិទ្ធិមនុស្ស» ។ ការបង្កើតឱ្យមានព្រឹត្តិការណ៍នេះ ក្នុងគោលបំណងដើម្បីផ្តល់ឱកាសយុវជន និងអ្នកប្រើប្រាស់អ៊ិនធឺណិតបានយល់ដឹងពីសិទ្ធិក្នុងការប្រើប្រាស់អ៊ិនធឺណិត យល់ដឹងពីសារៈប្រយោជន៍នៃការប្រើប្រាស់អ៊ិនធឺណិត ដើម្បីលើកកម្ពស់សិទ្ធិមនុស្សនៅក្នុងសង្គមកម្ពុជាជាដើម។
នាពេលកន្លងមកនេះក្រុមយុវជន និងអង្គការសង្គមស៊ីវិលធ្លាប់បានលើកទ្បើងថា ការប្រើប្រាស់អ៊ិនធឺណិតបានដើរតួនាទីយ៉ាងសំខាន់ក្នុងការរួមចំណែក និងការលើកកម្ពស់សិទ្ធិមនុស្សនៅក្នុងសង្គមកម្ពុជា ជាពិសេសគេសង្កេតឃើញថា យុវជនកម្ពុជាភាគច្រើនមានចំណេះដឹងក្នុងការប្រើប្រាស់ប្រព័ន្ធអ៊ិនធឺណិត ដូចជា ហ្វេសប៊ុក ទ្បាញជាដើម ដើម្បីធ្វើការទំនាក់ទំនងគ្នា។ ម្យ៉ាងវិញទៀត ពួកគេក៏អាចធ្វើសេចក្តីរាយការណ៍ព័ត៌មានមួយចំនួនដែលពួកគេបានជួប បានដឹងពីភាពមិនប្រក្រតីណាមួយ ដែលបានកើតទ្បើងនៅក្នុងសង្គម ដើម្បីរាយការណ៍ទៅដល់ស្ថាប័នពាក់ព័ន្ធឱ្យជួយអន្តរាគមន៍ផងដែរ។
ប្រធានបណ្តាញយុវជនកម្ពុជា ហៅកាត់ថា CYN លោកទឹម ម៉ាទ្បៃ បានផ្តល់បទសម្ភាសន៍ជាមួយវិទ្យុស្ត្រីថា ការប្រើប្រាស់អ៊ិនធឺណិតរបស់យុវជនមានការវិវត្តន៍គួរឱ្យកត់សម្គាល់ មានន័យថា យុវជនមានការយល់ដឹងច្រើនពីរបៀបនៃការប្រើប្រាស់អ៊ិនធឺណិតដើម្បីធ្វើការទំនាក់ទំនងជាមួយគ្នាទៅវិញទៅមក។
លោកទឹម ម៉ាទ្បៃ លើកទ្បើងទៀថា ការប្រើប្រាស់ប្រព័ន្ធអ៊ិនធឺណិត មានសារៈប្រយោជន៍ច្រើនទៅដល់សង្គមទាំងមូល ហើយជាងនេះទៅទៀត ការប្រើប្រាស់អ៊ិនធឺណិតក៏នឹងជួយឱ្យមានការលើកកម្ពស់សិទ្ធិសេរីភាព និងចូលរួមជួយកាត់បន្ថយភាពអវិជ្ជមានមួយចំនួនដែលបានកើតទ្បើងនៅក្នុងសង្គមផងដែរ។
លោកទឹម ម៉ាទ្បៃ បន្ថែមទៀតថា ដោយសារតែការប្រើប្រាស់ប្រព័ន្ធអ៊ិនធឺណិតមានសារៈសំខាន់នេះហើយ ទើបអង្គការក្រៅរដ្ឋាភិបាលចំនួន៥នឹងរួមគ្នាបង្កើតព្រឹត្តិការណ៍អ៊ិនធឺណិតបើកទូលាយនៅថ្ងៃទី ១២ ខែមិថុនាស្អែកនេះ នៅសាលារៀនអន្តរទ្វីបអាមេរិកាំង សាខាទួលគោក ចាប់ពីម៉ោង ៨:០០ នាទីព្រឹក ដល់ ១២:០០ ថ្ងៃត្រង់។
អង្គការទាំង ០៥ ដែលសហការគ្នាបង្កើតឱ្យមានព្រឹត្តិការណ៍នេះ រួមមាន បណ្តាញយុវជនកម្ពុជា (CYN) , សមាគមន៍ធាងត្នោត, អង្គការ ActionAid , អង្គការគណៈកម្មាធិការសហប្រតិបត្តិការដើម្បីកម្ពុជា (CCC) , និងអង្គការមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថាសុងត្រាល់(Central) ។
គួរបញ្ជាក់ដែរថា ការបង្កើតឱ្យមានព្រឹត្តិការណ៍នេះ មានគោលបំណងសំខាន់បីចំណុច រួមមាន ៖ ទីមួយ ផ្តល់ឱកាសឱ្យយុវជន និងអ្នកប្រើប្រាស់អ៊ិនធឺណិតយល់ដឹងអំពីសិទ្ធិ រួមនឹងសារៈប្រយោជន៍នៃការប្រើប្រាស់អ៊ិនធឺណិត ចូលរួមលើកកម្ពស់សិទ្ធិមនុស្សនៅក្នុសង្គម ទីពីរ ចូលរួមចំណែកក្នុងការលើកកម្ពស់សិទ្ធិសេរីភាពនូវសិទ្ធិឯកជនភាពប្រើប្រាស់អ៊ិនធឺណិត និង ទីបីផ្តល់ឱកាសឱ្យអ្នកចូលរួមស្វែងយល់ពីបញ្ហាប្រឈមមួយចំនួនក្នុងការប្រើប្រាស់អ៊ិនធឺណិត នៅក្នុងប្រទេសកម្ពុជានាពេលបច្ចុប្បន្ន៕
