ភ្នំពេញ៖ អង្គការសិទ្ធិមនុស្សអន្តរជាតិមួយដែលមានមូលដ្ឋាននៅប្រទេសជប៉ុន បានទទូចឱ្យរដ្ឋាភិបាលកម្ពុជាដោះលែង អ្នកការពារសិទ្ធិមនុស្ស និងមន្ត្រី គ.ជ.ប ដែលពួកគាត់ត្រូវបានឃុំខ្លួនករណីនាង ខុម ចាន់តារាទី ហៅស្រីមុំ ហើយត្រូវ បញ្ចប់ហិង្សានយោបាយ។
សេចក្ដីថ្លែងការណ៍របស់អង្គការសិទ្ធិមនុស្សជប៉ុន Human rights now ដែលបានផ្ញើមកកាន់សារអ៊ីម៉ែនរបស់មណ្ឌលព័ត៌មាន ស្ត្រីកម្ពុជានៅថ្ងៃពុធទី៨ មិថុនា នេះ បានទទូចឱ្យអាជ្ញាធរកម្ពុជាប្រកាន់យកនូវ ៤ចំណុច ខាងក្រោមនេះ៖
-ត្រូវដោះលែងលោក នី សុខា លោក ណៃ វង់ដា លោក យី សុខសាន លោកស្រី លឹម មុនី លោក នីចរិយា និង ទម្លាក់ចោល បទចោទប្រឆាំងលោក សឹន សាលី មន្ត្រីអង្គការសហប្រជាជាតិ ។
-ត្រូវធានាថាអ្នកការពារសិទ្ធិមនុស្សនៅកម្ពុជា មានលទ្ធភាពបំពេញការងាររបស់ពួកគេ ដោយគ្មានការភ័យខ្លាច។
-ត្រូវអនុវត្តតាមអនុសាសន៍របស់ស្នងការសិទ្ធិមនុស្ស របស់អង្គការសហប្រជាជាតិដែលបានស្នើឱ្យកម្ពុជាអនុវត្តក្រៅពីបាន លើកឡើងខាងនេះ អង្គការសិទ្ធិមនុស្សជប៉ុនបានហៅការចាប់ខ្លួនអ្នកការពារសិទ្ធិមនុស្ស ដែលមកពីសមាគមការពារសិទ្ធិមនុស្សអាដហុក និងការធ្វើទុកបុកម្នេញនយោបាយថា ជាបំពានធ្ងន់ធ្ងរ សន្ធិសញ្ញាអន្តរជាតិ ដែលកម្ពុជាជាភាគីហត្ថលេខី មួយដែរនោះ ។
ជាមួយគ្នានេះ Human rights now ក៏បានរិះគន់អង្គភាពប្រឆាំងអំពើពុករលួយ ថាអនុវត្តតួនាទីរបស់ខ្លួនដោយក្រោមឥទ្ធិពល នយោបាយ ។
វិទ្យុស្ត្រីមិនទាន់សុំការឆ្លើយតបពីប្រធានអង្គភាពប្រឆាំងអំពើពុករលួយបានភ្លាមទេ នៅរសៀលថ្ងៃនេះ ។
ករណីរបស់មន្ត្រីសិទ្ធិមនុស្សសមាគមអាដហុក និងមន្ត្រី គ.ជ.ប មានអង្គការសិទ្ធិមនុស្សជាតិ អន្តរជាតិ និងសហភាពអឺរ៉ុប សហអាមេរិក អង្គការសហប្រជាជាតិ ក៏បានទាមទារឱ្យកម្ពុជាដោះលែងអ្នកទាំងនេះ ដែរ ៕
