ភ្នំពេញ៖ ភ្លាមៗបន្ទាប់ពីត្រូវបានខ្លួនឡើងរថយន្តត្រឡប់ទៅពន្ធនាគារព្រៃសវិញ ក្រោយពីនាំខ្លួនចូលសវនាការ នៅតុលា ការកំពូលកាលព្រឹកថ្ងៃពុធទី ៨ មិថុនានេះ លោកសមាជិកព្រឹទ្ធសភា ហុង សុខហួរ បានស្រែកបា្រប់អ្នកសារព័ត៌មានថា លោកនឹងបាននៅក្រៅឃុំ បើសិនមានដំណោះស្រាយនយោបាយ ។ តែអ្នកវិភាគមិនមានជំនឿចិត្តដូចលោកសមាជិក ព្រឹទ្ធសភាបក្សប្រឆាំងនេះលើកឡើងនោះទេ ។
លោកសមាជិកព្រឹទ្ធសភា ហុង សុខហួរ ដែលស្ថិតក្នុងសំលៀកបំពាក់អ្នកទោសពណ៌លឿងទំ ពាក់វែនតាញ៉ូម បានស្រែក ប្រាប់ទៅកាន់អ្នកសារព័ត៌មានថា ខ្ញុំនឹងបាននៅក្រៅឃុំ ឆាប់ៗនេះ ។លោក ហុង សុខហួរ៖ «រឿងនេះ (ការបាននៅក្រៅឃុំ) គឺអាស្រ័យទៅលើ គណបក្សនយោបាយទាំងពីរ បើគណបក្សទាំងពីរ (ឯកភាពគ្នាក្នុងការដោះស្រាយបញ្ហា ) យើងសង្ឃឹមថា យើងនឹងបាននៅក្រៅឃុំបើសិនជាមឆន្ទៈទាំងសងខាង»។
លោក ហុង សុខហួរ ក៏បានថ្លែងនៅចំពោះចៅក្រមជំនុំជម្រះថា រូបលោកគឺជាសមាជិកព្រឹទ្ធសភាដែលមានអភ័យឯកសិទ្ធិ មួយរូប ។ លោកថាសមត្ថកិច្ចបែរជារំលោភរដ្ឋមនុញ្ញដោយចាប់គាត់ ដែលបទល្មើសចោទនោះមិនមែនជាបទល្មើសជាក់ ស្ដែង។ លោក ហុង សុខហួរ បានស្នើសុំឲ្យចៅក្រមជំនុំជម្រះពិនិត្យឡើងវិញនូវមាត្រាច្បាប់ ចែងពីការការពារអ្នកតំណាង រាស្រ្ដដែលមានអភ័យឯកសិទ្ធិ ដើម្បីផ្ដល់យុត្ដិធម៌ជូនលោកឲ្យបាននៅក្រៅឃុំ។
ជាមួយគ្នានេះដែរលោកមេធាវី ជួង ជុងី ដែលការពារក្ដីឲ្យលោក ហុង សុខហួរ មានប្រសាសន៍ថា លោកមិនទាន់អាចសន្និ ដ្ឋានបានទេថាតើ នៅថ្ងៃទី ២២ ខែ មិថុនា ខាងមុខតុលាការកំពូលអាចនឹងអនុញ្ញាតឲ្យកូនក្ដីរបស់លោក បាននៅក្រៅឃុំ ឬយ៉ាងណានោះទេ។
លោក ជួង ជួងី មានប្រសាសន៍បន្ថែមថា ទាំងតុលាការ និង នគបាលយុត្ដិធម៍ ដែលសម្រេចចាប់ខ្លួននិងឃុំខ្លួនលោក ហុង សុខហួរ នោះគឺជាការធ្វើដោយបំពាននីតិវិធីច្បាប់ ទាំងដែលទង្វើរបស់កូនក្ដីលោកមិនមែនជាបទល្មើសជាក់ស្ដែងឡើយ ។លោក ជួង ជួងី៖«សម្រាប់ខ្ញុំជាមេធាវីក៏ដូចជាលោក ហុង សុខហួរ ដែរគឺឃើញថា ទាំងនគបាលយុត្ដិធម៍ដែលចាប់ខ្លួនគាត់ ទាំងតំណាងអយ្យការដែលចោទប្រកាន់គាត់ ទាំងចៅក្រមស៊ើបសួរសម្រេចឃុំខ្លួនគាត់ហ្នឹងគឺបំពាននិតិវិធីទាំងអស់»។
ចំណែកលោកសាស្រ្ដាចារ្យវិទ្យាសាស្រ្ដនយោបាយលោក សូ ចន្ថា បានមានប្រសាសន៍ប្រាប់វិទ្យុស្រ្ដីនៅថ្ងៃទី ០៨ មិថុនានេះ ថា បើតាមការសង្កេតមើល ពីស្ថានការណ៍នយោបាយបច្ចុប្បន្ននេះ លោកគិតថា ទាំងគណបក្សប្រជាជនកម្ពុជា និង គណ បក្សសង្រ្គោះជាតិគឺមិនអាចនឹងវិលចូលរកតុចរចារបានទេ ព្រោះតែគណបក្សទាំងពីរនេះហាក់បង្ហាញជំហរចង់ឈ្នះរៀងៗ ខ្លួន។
លោក សូ ចន្ថា យល់ថា ប្រសិនជាបក្សកាន់អំណាច និង បក្សប្រឆាំងនៅតែបន្ដឲ្យជម្លោះជាប់គាំងបែបនេះ អ្នកដែល ចាញ់ពីជម្លោះអ្នកនយោបាយពិតប្រាកដពុំមែនបក្សទាំងពីរទេ គឺប្រទេសជាតិជាអ្នកចាញ់ ហើយខាតបង់ផលប្រយោជន៍ យ៉ាងច្រើន ។ លោកថា បក្សទាំងពីរគួរតែបង្ហាញពីភាពចាស់ទុំខាង នយោបាយដាក់គ្នាជាជាង ការបង្ហាញសាច់ដុំដាក់គ្នា បែបនេះតទៅមុខទៀត។
សម្រាប់លោក សូ ចន្ថា បញ្ជាក់ថា កម្ដៅនយោបាយ មិនមានភាពធូរស្រាល ប្រសិនជាគ្មានស្ថាប័នអន្ដរជាតិធំៗជួយធ្វើជា អាជ្ញាកណ្ដាលបញ្ចប់ការទាស់ទែងគ្នារវាងអ្នកនយោបាយនៅកម្ពុជានេះ។ លោក សូ ចន្ថា៖«ខ្ញុំគិតថាអ្នកនយោបាយកម្ពុជា បើខ្មែរដូចគ្នាមិនសូវជាស្ដាប់គ្នាប៉ុន្មានទេ តែបើមានសហគមអន្ដរជាតិចូលរួម ជម្រុញឲ្យមានការចរចារណ៍គ្នា ខ្ញុំជឿថានេះ ជាដំណោះស្រាយលឿន អាចជម្រុញឲ្យមានការឯកភាពជាតិបាន»។
លោក ហុង សុខហួរ ត្រូវបានសមត្ថកិច្ចចាប់ខ្លួន កាល ថ្ងៃទី១៥ ខែសីហា ឆ្នាំ២០១៥ បន្ទាប់ពីលោកបានបង្ហោះ ឯកសារសន្ធិ សញ្ញាព្រំដែនកម្ពុជា-វៀតណាម លើគណនេយ្យ Facebook របស់លោក សម រង្ស៊ី ។ ករណីនេះ តុលាការបានសម្រេចឃុំខ្លួន លោកដាក់ពន្ធនាគារព្រៃស ក្រោមបទចោទចំនួន ៣ បទល្មើសនេះ។
ការចាប់ខ្លួនលោក ហុង សុខហួរ ធ្វើឡើង មួយសប្ដាហ៍បន្ទាប់ពីសម្ដេច ហ៊ុន សែន បានប្រកាសឱ្យចាប់ខ្លួន បន្ទាប់ពីលោក ចោទអតីតសមាជិកព្រឹទ្ធសភាបក្សប្រឆាំងរូបនេះ ថា ក្បត់ជាតិ ទាក់ទិនការបង្ហោះសន្ធិសញ្ញាព្រំដែនកម្ពុជា-វៀតណាម ឆ្នាំ ១៩៧៩៕
