ភ្នំពេញ៖ អាជ្ញាធរជាតិប្រយុទ្ធប្រឆាំងគ្រឿងញៀន នឹងរៀបចំពិធីអបអរសាទរទិវាអន្ដរជាតិប្រយុទ្ធប្រឆាំងនិងគ្រឿងញៀន ដែលមានមនុស្សចូលរួម ៥០០០នាក់ នៅថ្ងៃទី ២៦ មិថុនា ខាងមុខនេះ ។
សេចក្ដីជូនដំណឹងរបស់អាជ្ញាធរជាតិប្រយុទ្ធប្រឆាំងគ្រឿងញៀន ចុះនៅថ្ងៃទី ០៣ មិថុនា ២០១៦ នេះ បានឱ្យដឹងថា សម្រាប់ឆ្នាំ២០១៦ អាជ្ញាធរជាតិប្រយុទ្ធប្រឆាំងគ្រឿងញៀន នឹងរៀបចំប្រារព្ធពិធីនេះ នៅរាជធានីភ្នំពេញ ក្រោមអធិបតីភាពលោក កែវ គឹមយ៉ាន ឧបនាយករដ្ឋមន្ដ្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន ។
តាមសេចក្ដីជូនដំណឹង អ្នកចូលរួមមាន ថ្នាក់ដឹកនាំជាន់ខ្ពស់រដ្ឋាភិបាល និងតំណាងអង្គទូតបណ្ដាប្រទេសនានាប្រចាំកម្ពុជា មន្ដ្រីរាជការ ព្រះសង្ឃ កងកំលាំងប្រដាប់អាវុធគ្រប់ប្រភេទ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋគ្រប់មជ្ឈដ្ឋាន ដោយរួមទាំងក្រុមគោលដៅ ជនងាយរងគ្រោះសរុប ប្រមាណ ៥០០០នាក់ ។
យោងតាមសេចក្ដីជូនដំណឹងដដែលនេះគឺ ក្រៅពីការរៀបចំនៅរាជធានីភ្នំពេញ ក៏មាននៅ ខេត្តក្រុង ទូទាំងប្រទេស ឲ្យរៀបចំប្រារព្ធពិធីនេះដែរ ក្នុងដែនដីរបស់ខ្លួន ទៅតាមកាលបរិច្ឆេទ ដើម្បី បង្ការ និងទប់ស្កាត់ រាល់បញ្ហាគ្រោះថ្នាក់នានា ពាក់ព័ន្ធជំងឺអេដស៍ និងជំងឺឆ្លងផ្សេងៗទៀត ដែលកើតមាននៅក្នុងចំណោមអ្នកប្រើប្រាស់គ្រឿងញៀនផងដែរ ។
កម្ពុជា ជាប្រភពជួញដូរគ្រឿងសំខាន់មួយដែរ នៅក្នុងតំបន់ ។ គ្រឿងញៀន ហូរមកពីប្រទេស ឡាវ ភូមា និង ថៃ ។
គ្រឿងញៀនមាន ច្រើនប្រភេទ មានដូចជា អាភៀន ហេរ៉ូអ៊ិន តាំហ្វេតាមីន យ៉ាម៉ា និងកញ្ឆាជាដើម ៕
