ភ្នំពេញ ៖ រដ្ឋបាលជលផលប្រកាសហាមឃាត់ចំពោះឧបករណ៍នេសាទធំៗចំនួន៧មុខ នៅក្នុងរដូវបិទនេសាទ ដែលនឹងចាប់ផ្តើមឡើងនៅថ្ងៃទី 0១ខែមិថុនានេះ ។ ឧបករណ៍ចំនួន៧មុខ ដែលត្រូវបានហាមឃាត់ក្នុងរដូវបិទនេសាទនេះ មានដូចជា អួន ម៉ាញ់ ចៃរ៉ា ជន សាប នាម និងឈ្នក់ ។
ដោយឡែកប្រជាពលរដ្ឋអាចនេសាទជាលក្ខណៈគ្រួសារដូចធម្មតា ។ អាជ្ញាធរពង្រឹងវិធានការបង្ក្រាបបទល្មើសនេះ ដើម្បីធានាបានធនធានមច្ឆជាតិឱ្យកាន់តែសម្បូរ ក្នុងការផ្គត់ផ្គងដល់តម្រូវការម្ហូបអាហារនៅកម្ពុជា ។
លោក អេង ជាសាន ប្រតិភូររាជរដ្ឋាភិបាលទទួលបន្ទុកជាប្រធានរដ្ឋបាលជលផល បានមានប្រសាសន៍តាមរយៈ AKP នាព្រឹកថ្ងៃទី0១ខែមិថុនា ថាក្នុងរដូវបិទនេសាទនេះសម្រាប់ការនេសាទជា លក្ខណៈគ្រួសារនៅតែប្រព្រឹត្តទៅជាធម្មតាដោយសារតែឧបករណ៍ទាំងនោះមានទ្រង់ទ្រាយតូចៗ មិនបង្កមហន្តរាយដល់ធនធានមច្ឆជាតិឡើយ ។
លោកបានបញ្ជាក់ទៀតថា ការហាមឃាត់មិនឱ្យមានការនេសាទទ្រង់ទ្រាយធំនៅរដូវបិទនេសាទនេះ ដោយសារតែវាជារដូវត្រីពង ហើយទឹកទន្លេចាប់ផ្តើមឡើងដូច្នេះត្រូវតែទុកលទ្ធភាពអោយ ត្រីបានធ្វើដំណើរទៅកាន់ព្រៃលិចទឹកនៅតាមស្ទឹងបឹងបួរដោយបង្កកំណើតភ្ញាស់កូនឱ្យបានកាន់តែច្រើន ។
សូមបញ្ជាក់ថា រដូវបិទនេសាទសម្រាប់ការនេសាទនៅក្នុងដែនទឹកសាប គឺត្រូវបានកំណត់ជា២ ដំណាក់កាល ក្នុងនោះដំណាក់ទី១ ចាប់ពីថ្ងៃទី០១ខែមិថុនា ដល់ថ្ងៃទី៣០ខែកញ្ញា ចំពោះដែនទឹកសាប ដែលស្ថិតនៅខាងជើងខ្សែស្របទន្លេចតុមុខ ។ ដំណាក់ទី២ គឺចាប់ពីថ្ងៃទី0១ខែកក្កដា ដល់ថ្ងៃទី៣១ខែតុលា ចំពោះដែនទឹកសាបដែលស្ថិតនៅខាងត្បូងខ្សែស្របទន្លេចតុមុខ ។
ដោយឡែកក្នុងរយៈពេល ៥ខែឆ្នាំ២០១៦ រដ្ឋបាលជលផលបានបង្ក្រាបបទល្មើសនេសាទខុសច្បាប់បានចំនួនជាង៣០០ករណី ប្រហាក់ប្រហែលនឹងឆ្នាំ២០១៥កន្លងទៅ ប៉ុន្តែការចាប់បញ្ជូនជនល្មើសទៅកាន់តុលាការ មានការកើនឡើងរហូតដល់៦០ករណី ក្នុងនោះផ្តន្ទាទោសដាក់ពន្ធនាគារមានចំនួនជាង៥០នាក់ ៕
