ភ្នំពេញ៖ នៅថ្ងៃទី ០១ ខែមិថុនានេះ សម្តេចនាយករដ្ឋមន្ត្រី ហ៊ុន សែន ដឹកនាំគណៈប្រតិភូជាន់ខ្ពស់កម្ពុជា ទៅចូលរួម«វេទិកាសេដ្ឋកិច្ចពិភពលោកលើកទី ២៥ ស្តីពីអាស៊ាន»នៅទីក្រុងគួឡាឡាំពួរ ប្រទេសម៉ាឡេស៊ី តាមការអញ្ជើញរបស់លោក ណាជីប រ៉ាហ្ស៉ាកនាយករដ្ឋមន្ត្រីម៉ាឡេស៊ី។ នេះបើយោងតាមសេចក្តីជូន ដំណឹងរបស់ក្រសួងការបរទេស និងសហប្រតិបត្តិការអន្តរជាតិកម្ពុជា។
សេចក្តីជូនដំណឹងរបស់ក្រសួងការបរទេស និងសហប្រតិបត្តិការអន្តរជាតិកម្ពុជាបានឱ្យដឹងថា គណៈប្រតិភូអមដំណើររួមមានលោក ប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិលោក អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូន រួមទាំងមន្ត្រីរដ្ឋាភិបាលមួយចំនួនទៀត។
សេចក្តីជូនដំណឹងដដែលបានឱ្យដឹងទៀតថា បន្ទាប់ពីចូលរួមវេទិកាសេដ្ឋកិច្ចពិភពលោកលើកទី ២៥ ស្តីពីអាស៊ាន សម្តេចនាយករដ្ឋមន្ត្រី ហ៊ុន សែន នឹងជួបសមភាគីម៉ាឡេស៊ីដើម្បីលើកកម្ពស់ថែមទៀត នូវទំនាក់ ទំនងមិត្តភាពដ៏យូរអង្វែង និងកិច្ចសហប្រតិបត្តិការលើកគ្រប់វិស័យរវាងប្រទេស និងប្រជាជនទាំងពីរ។
ក្នុងអំឡុងពេលទស្សនកិច្ចផ្លូវការនេះសម្តេច ហ៊ុន សែន និងជួបចរចាផ្លូវការជាមួយលោក ណាជីប រ៉ាហ្ស៉ាក នឹងចុះហត្ថលេខាលើឯកសារមួយចំនួនដូចជា៖
១.អនុស្សរណៈយោគយល់ ស្តីពីកិច្ចសហប្រតិបត្តិការវិស័យព័ត៌មាន និងការផ្សាយតាមរលកធាតុអាកាស
២.អនុស្សរណៈយោគយល់ ស្តីកម្មវិធីអ្នកស្ម័គ្រចិត្តអន្តរជាតិ MYCORPS នៅកម្ពុជា៕
