ភ្នំពេញ៖ សម្ព័ន្ធនិស្សិតបញ្ញាវន្តកម្ពុជាបានចេញសេចក្តីអំពាវនាវដល់សមាជិក សមាជិកា សិស្ស និស្សិត យុវជន ទូទាំងប្រទេស ក្នុងការប្រើសិទ្ធិស្របច្បាប់របស់ខ្លួនធ្វើបាតុកម្មអហិង្សាករណីចាប់ខ្លួន លោក កឹម សុខា ប្រធានស្តីទីគណបក្សសង្គ្រោះជាតិ ។
សេចក្តីអំពាវនាវរបស់សម្ព័ន្ធនិស្សិតបញ្ញាវន្តកម្ពុជានេះ បានធ្វើឡើងនៅព្រឹកថ្ងៃទី៣១ខែឧសភា នេះ ដោយបានទាមទារឲ្យរដ្ឋាភិបាល និងតុលាការបញ្ឈប់ជាបន្ទាន់នូវការរំលោភអភ័យឯកសិទ្ធិអ្នកតំណាងរាស្ត្រដែលធានាដោយរដ្ឋធម្មនុញ្ញ ។
កាលពីថ្មីៗនេះ សហជិពសេរីកម្មករនៃព្រះរាជាណាចក្រកម្ពុជា ដឹកនាំដោយលោក ជា មុនី្ន និង សមាគមគ្រូបង្រៀន កម្ពុជាឯករាជ្យ បានអំពាវនាវ ដូចនេះដែរ ឱ្យសមាជិករបស់ខ្លួន ធ្វើបាតុកម្ម ឬកូដកម្ម មិនចូលធ្វើការ ប្រសិនមានការចាប់ខ្លួន លោក កឹម សុខា ។
ជុំវិញការប៉ុនប៉ងចាប់ខ្លួន លោក កឹម សុខា ប្រធានស្តីទីគណបក្សសង្គ្រោះជាតិបញ្ចូនទៅតុលាការនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន្ត មានប្រសាសន៍ថា គណបក្សប្រជាជនកម្ពុជា គ្មានឈ្លោះ ជាមួយគណបក្សសង្គ្រោះជាតិឡើយ ។ លោក លើកឡើងថា សមត្ថកិច្ចមានវិធានការចាប់ខ្លួន លោក កឹម សុខា ធ្វើឡើងទៅតាមច្បាប់ ព្រោះថាជាការល្មើសច្បាប់ដែលប្រព្រឹត្តឡើងដោយ ប្រធានស្តីទីគណបក្សសង្គ្រោះជាតិរូបនេះ ។ លោកអះអាងថា ការចេញសេចក្ដីថ្លែងការណ៍ព្រមានណាមួយគឺ សិទ្ធិរបស់ ក្រុមនោះ ប៉ុន្តែប្រយ័ត្ន អាជ្ញាធរបង្ក្រាប ប្រសិនបើ ខុសច្បាប់ ។
មកដល់ថ្ងៃអង្គារទី៣១ ឧសភា គឺជាថ្ងៃទី៦ ហើយ ដែល លោកកឹម សុខា នៅតែលាក់ខ្លួន នៅឡើយ ៕
