ភ្នំពេញ ៖ លោក អ៊េង ឆៃអ៊ាង តំណាងរាស្ត្រគណបក្សសង្គ្រោះជាតិបានថ្លែងសាទរសេចក្ដីថ្លែងការណ៍របស់សហភាពអឺរ៉ុបនិងអង្គការសហប្រជាតិ ដែលទទូចឱ្យកម្ពុជាបញ្ចប់ហិង្សា នយោបាយ លើបក្សប្រឆាំង ។
ការថ្លែងរបស់លោក អ៊េង ឆៃអ៊ាង ធ្វើឡើងនៅស្នាក់កាកណ្តាល គណបក្សសង្គ្រោះជាតិ ចក្រអង្រែលើដែលចូលដល់ថ្ងៃទី៦ នៅថ្ងៃអង្គារទី៣១ឧសភា នៅចំពោះមុខអ្នកគាំទ្រ បក្សនេះជាច្រើនរយនាក់ បានបន្តឡើងមក ការពារ លោក កឹមសុខា មិនឱ្យអាជ្ញាធរ នាំខ្លួនទៅកាន់តុលាការ ករណីកញ្ញា ខុម ចាន់តារាទី ហៅស្រីមុំ ។
ការសារទរបស់លោក អ៊េង ឆៃអ៊ាង ធ្វើឡើងភ្លាមៗ បន្ទាប់ពីសហភាពអឺរ៉ុបនិងអង្គការសហប្រជាតិ បានចេញសេចក្តីថ្លែងការណ៍ដាច់ដោយឡែកពីគ្នា កាលថ្ងៃទី៣០ខែឧសភា ដោយសម្តែងការសោកស្តាយយ៉ាងខ្លាំងចំពោះការកើនឡើងកំដៅនយោបាយក្នុងរយៈពេលប៉ុន្មានថ្ងៃថ្មីៗនេះ ដែលគេហៅថាស្ថិតក្នុងស្ថានភាពគ្រោះថ្នាក់ ។
សហភាពអឺរ៉ុបបានអំពាវនាវឲ្យបញ្ឈប់ការយាយីតាមផ្លូវតុលាការ ទៅលើប្រធានស្តីទីគណបក្សសង្គ្រោះជាតិ លោក កឹម សុខា រួមទាំងតំណាងអង្គការសង្គមស៊ីវិល ។
សេចក្ដីថ្លែងការណ៍នោះក៏បាន ទទូចឲ្យគណបក្សនយោបាយធំៗទាំងពីរវិលមករកតុចរចារ ក្នុងន័យស្ថាបនា ដោយសន្តិវិធីឲ្យបានឆាប់តាមដែលអាចធ្វើទៅបាន មុនការបោះឆ្នោតនាពេលខាងមុខ ។
លោក អ៊េង ឆៃអ៊ាង ថ្លែងថាការអន្តរាគមន៍របស់សហគមន៍អន្តរជាតិនឹងមានឆាប់ៗនេះ ហើយសង្ឃឹមថា ជួយបន្ថយ កំដៅនយោបាយ នៅកម្ពុជា ។
ឆ្លើយតបទទៅនិងសេចក្តីថ្លែងការណ៍របស់សហភាពអឺរ៉ុបនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន្ត បានថ្លែងថា សេចក្តីថ្លែងការណ៍របស់សហភាពអឺរ៉ុបបានលូកដៃចូលកិច្ចនយោបាយកម្ពុជា ។ លោក សុខ ឥសាន្ត បានបដិសេធថា គណបក្សប្រជាជនកម្ពុជា គ្មានឈ្លោះជាមួយគណបក្សសង្គ្រោះជាតិឡើយ ។
លោក លើកឡើងថា សមត្ថកិច្ចមានវិធានការចាប់ខ្លួន លោក កឹម សុខា ធ្វើឡើងទៅតាមច្បាប់ និងជាការល្មើសច្បាប់របស់ប្រធានស្តីទីគណបក្សសង្គ្រោះជាតិរូបនេះ ៕
