ភ្នំពេញ ៖ គណបក្សសង្គ្រោះជាតិបដិសេធចំពោះសេចក្ដីសម្រេចរបស់គណបក្សប្រជាជនកម្ពុជា ដែល អនុម័តឱ្យតុលាការ បន្ដនីតិវិធីនាំខ្លួន លោក កឹម សុខា ប្រធានស្ដីទីរបស់គណបក្សប្រឆាំងនេះ មកកាន់តុលាការ ខណៈពួកគេត្រៀមហែរញតិ្តថ្វាយព្រះមហាក្សត្រនៅរសៀលថ្ងៃនេះ ។
អ្នករាយការណ៍នៃមណ្ឌលព័ត៌មានស្ដ្រីកម្ពុជា បានឱ្យដឹងថា ការបដិសេធរបស់គណបក្ស សង្គ្រោះជាតិធ្វើឡើង ដោយ លោក ស៊ុន ឆ័យ ប្រធានក្រុមអ្នកតំណាងរាស្ដ្រនៃគណបក្សសង្គ្រោះជាតិ នៅក្នុងសន្និសីទសារព័ត៌មាន នៅម៉ោង១១ ព្រឹក ថ្ងៃទី ៣០ខែឧសភានេះ ។
លោក ស៊ុន ឆ័យ បានថ្លែងបញ្ជាក់ថា គណបក្សសង្គ្រោះជាតិ ប្រកាន់ចំហរ ជាដាច់ខាត រារាំង ការចាប់ខ្លួន អ្នកតំណាងរាស្ដ្រដែល លោកថា ធ្វើឡើងមិនស្របតាមស្មារតីរដ្ឋធម្មនុញ្ញ ។
បើតាមលោក ស៊ុន ឆ័យ និងលោក អេង ឆៃអ៊ាង នៅម៉ោង២រសៀលនេះ អ្នកតំណាងរាស្ដ្រ និងអ្នកតំណាងពលរដ្ឋ ត្រូវយកញតិ្ត ទៅថ្វាយព្រះមហាក្សត្រ ដើម្បីឱ្យព្រះអង្គ ជួយអន្ដរាគម ករណី ដែលតុលាការ កំពុងរកនីតិវិធីនាំខ្លួន លោក កឹម សុខា ។ បើតាមប្រភពដដែលនេះ ញតិ្តដាក់ថ្វាយព្រះមហាក្សត្រ នឹងមានស្នាមមេដៃពលរដ្ឋ ២០ម៉ឺននាក់ ។
សូមរំឭកថា តំណាងរាស្ដ្រគណបក្សសង្គ្រោះជាតិ ចំនួន៥៣រូប បានថ្វាយលិខិតទៅព្រះ មហាក្សត្រ សុំអន្ដរាគមន៍ ចំនួនពីរដងមកហើយ ក្នុងករណី ដែលគណបក្សប្រឆាំងនេះ ទទូច ថា អោយព្រះអង្គជួយបន្ថយកម្ដៅនយោបាយនៅកម្ពុជា ។
តែមកដល់ពេលនេះ មិនទាន់មានការឆ្លើយតបពី ព្រះបរមរាជវាំងនៅឡើយទេ ។ ដូចគ្នានេះ គណបក្សប្រឆាំងបានដាក់លិខិតទៅអគ្គលេខាធិការអង្គការសហប្រជាជាតិ ឱ្យកោះប្រជុំ ប្រទេសហត្ថលេខី នៃកិច្ចព្រមព្រៀងសន្ថិភាព ទីក្រុងប៉ារីស ដើម្បី ជួយស្ដារសិទ្ធិមនុស្ស និង លទ្ធិប្រជាធិបតេយ្យឡើងវិញនៅកម្ពុជា ៕
