ភ្នំពេញ ៖ តំណាងរាស្ត្រគណបក្សកាន់អំណាចនៅព្រឹកថ្ងៃចន្ទនេះ បានបោះឆ្នោតគាំទ្រឲ្យតុលាការបន្តនីតិវិធីលើលោក កឹម សុខា ប្រធានស្តីទីគណបក្សសង្គ្រោះជាតិដែលលោក សម រង្ស៊ី បានហៅការអនុម័តដូចនេះថារំលោភរដ្ឋធម្មនុញ្ញ ។
តាមសេចក្ដីរាយការណ៍ការបោះឆ្នោតនេះធ្វើឡើងដោយសំឡេង៦៨លើ៦៨ គឺតំណាងរាស្ត្រមកពីគណបក្សកាន់អំណាច ដោយពុំមានវត្តមានរបស់បក្សប្រឆាំង ។
ស្របពេលជាមួយគ្នានេះ លោក សម រង្ស៊ី បានសរសេរលើហ្វេសប៊ុកលោកថា គឺជាទង្វើរំលោភរដ្ឋធម្មនុញ្ញនៃព្រះរាជាណាចក្រកម្ពុជាដោយបោះឆ្នោតលើកដៃសម្រេចឲ្យសមត្ថកិច្ចតុលាការចាត់ការលើលោក កឹម សុខា ប្រធានស្ដីទីគណបក្សសង្គ្រោះជាតិ ។
កាលពីសប្តាហ៍មុន តំណាងអយ្យការនៃសាលាដំបូងរាជធានីភ្នំពេញបានចោទប្រកាន់លោក កឹម សុខា ថាបានប្រព្រឹត្តបទល្មើសជាក់ស្តែងករណីមិនចូលបំភ្លឺតាមការកោះហៅរបស់តុលាការចំនួន២លើក ដោយលោកអាចប្រឈមជាប់ពន្ធនាគារពី១ខែទៅ៦ខែ ។
គណបក្សសង្គ្រោះជាតិបានព្រមានថានឹងប្រើប្រាស់សិទ្ធិធ្វើមហាបាតុកម្មអហិង្សា ក្នុងករណីដែលមានការចាប់ខ្លួនលោក កឹម សុខា ។
ទោះជា យ៉ាងណាអ្នកច្បាប់ឯករាជ្យមួយចំនួន បានបកស្រាយថារដ្ឋធម្មនុញ្ញ មិនបានចែងឱ្យមានសំឡេង 50 បូក ១ បើកផ្លូវឱ្យតុលាការចាត់ការរឿងនេះទេ ។ តាមមាត្រា ៨០ នៃរដ្ឋធម្មនុញ្ញ រដ្ឋសភាត្រូវការសំឡេង 3/៤ ស្មើនិងចំនួន៩៣ រូបឡើងទៅ ដើម្បីបញ្ឈប់អំណាចរបស់តុលាការ ។ តាមមាត្រាដដែលនេះ មុនការចាប់ខ្លួនអ្នកតំណាងរាស្ត្រគឺគេត្រូវ សំឡេង ២/៣ដើម្បីដកអភ័យឯកសិទ្ធិអ្នកតំណាងរាស្ត្រ ។ បើយើងតាមាត្រា៨៨ ការប្រជុំរដ្ឋសភា ត្រូវធ្វើជាសាធារណៈ ។ រដ្ឋសភា អាចប្រជុំសម្ងាត់បានតាមការស្នើសុំ ពីប្រធាន ឬសមាជិក ចំនួន ១/១០ យ៉ាងតិចពីព្រះមហាក្សត្រ ឬពីនាយករដ្ឋមន្ត្រី ។ ការប្រជុំរដ្ឋសភា នឹងយកជាបានការលុះត្រាតែ កុរ៉ុមលើសពី២/៣នៃចំនួនសមាជិករដ្ឋសភាទាំងមូល សម្រាប់ការអនុម័ត ទាំងឡាយណា ដែលតម្រូវឱ្យយកមតិភាគច្រើន ២/៣នៃចំនួនសមាជិករដ្ឋសភាទាំងមូល ៕
