ភ្នំពេញ៖ យោងតាមទីភ្នាក់ងារសារព័ត៌មានកម្ពុជា (AKP) ចុះផ្សាយនៅថ្ងៃនេះថា រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ លោកអ៊ិត សំហេង បានអះអាងថា វិស័យកីឡារបស់ប្រទេសកម្ពុជានាពេលបច្ចុប្បន្នស្ទើរតែគ្រប់ផ្នែកកំពុងមានការរីកចម្រើនគួរឱ្យកត់សម្គាល់។ ការលើកឡើងបែបនេះនៅក្នុងពិធីបើកការប្រកួតបាល់ទាត់ពានរង្វាន់ មិត្តភាពយុវជនក្រសួងការងារនិងបណ្ដុះបណ្ដាលវិជ្ជាជីវៈ លើកទី ២ ឆ្នាំ ២០១៦ នៅទីលានបាល់ទាត់ Real Soccer Sport Club ជិតរង្វង់មូលខាំកូស៊ីធី កាលពីល្ងាចថ្ងៃទី ២៨ ខែឧសភា ឆ្នាំ២០១៦ ។
លោកអ៊ិត សំហេង បានថ្លែងថា រយៈពេលកន្លងមកនេះ វិស័យបាល់ទាត់ ពិតជាមានការរីកចម្រើនគួរឱ្យ កត់សម្គាល់ បើប្រៀបធៀបទៅនឹងវិស័យផ្សេងៗ។ ដោយឡែកនៅប្រទេសកម្ពុជា ឃើញថាមានការរីកចម្រើនខ្លាំង ស្ទើរតែគ្រប់ផ្នែក ដោយសារមានព្រឹត្តិការណ៍ប្រកួតជាលក្ខណៈអន្តរជាតិម្ដងៗ កីឡាករ កីឡាការិនី តែងតែចូលរួមខំប្រឹងប្រែងប្រកួតប្រកបដោយបច្ចេកទេសនិងទេពកោសល្យខ្ពស់ ទើបនាំឱ្យប្រទេសកម្ពុជា ទទួលបានជ័យជម្នះក្នុងការប្រកួតជាបន្តបន្ទាប់៕
