ភ្នំពេញ៖ តំណាងរាស្ត្រគណបក្សសង្គ្រោះជាតិ នឹងធ្វើពហិកាមិនចូលរួមប្រជុំគណៈកម្មាធិការអចិន្ត្រៃយ៍រដ្ឋសភានៅថ្ងៃចន្ទស្អែកនោះទេ។ នេះជាការលើកឡើងរបស់លោកអេង ឆៃអ៊ាង តំណាងរាស្ត្រគណបក្សសង្គ្រោះជាតិនៅព្រឹកថ្ងៃអាទិត្យទី ២៩ ខែឧសភានេះ។
តំណាងរាស្ត្រគណបក្សសង្គ្រោះជាតិ លោកអេង ឆៃអ៊ាង បានថ្លែងចំពោះមុខសកម្មជននៅទីស្នាក់ការកណ្តាលបក្សថា តំណាងរាស្ត្ររបស់គណបក្សសង្គ្រោះជាតិទាំងអស់នឹងមិនចូលរូមប្រជុំគណៈកម្មាធិការអចិន្ត្រៃយ៍រដ្ឋសភានៅថ្ងៃចន្ទ ទី ៣០ ឧសភាស្អែកនេះទេ។ ការមិនចូលរួម ព្រោះតំណាងរាស្ត្រ គណបក្សសង្គ្រោះជាតិ យល់ថាការប្រជុំនោះធ្វើឱ្យប៉ះពាល់ទៅដល់លោកកឹម សុខា ដែលជាប្រធានស្តីទីគបក្សសង្គ្រោះជាតិ។
តំណាងរាស្ត្ររូបនេះបញ្ជាក់ថា ព្រឹត្តិការណ៍ថ្ងៃស្អែកជារឿងសំខាន់ព្រោះរដ្ឋសភានឹងលើកយករឿងលោកកឹម សុខា ទៅប្រជុំ ដោយមិនទាន់អាចដឹងថានឹងមានស្ថានការណ៍ប្រែប្រួលយ៉ាងណានោះទេ ជុំវិញកិច្ចប្រជុំនោះ។ តាមរយៈព្រឹត្តិការណ៍នេះដែរ លោកអេង ឆៃអ៊ាង បានស្នើឱ្យអ្នកដែលគាំទ្រគណបក្សសង្គ្រោះជាតិ តាមដានស្ថានការណ៍ជុំវិញកិច្ចប្រជុំរបស់រដ្ឋសភាថាតើនឹងសម្រេចយ៉ាងណាជុំវិញកិច្ចប្រជុំរបស់ខ្លួននោះ។
អ្នកគាំទ្រគណបក្សសង្គ្រោះជាតិនៅរាជធានីភ្នំពេញអ្នកស្រីសុខ បូលីម៉ា បាននិយាយថា ការស្វែងរកចាប់ខ្លួនលោកកឹម សុខា ប្រធានស្តីទីគណបក្សសង្គ្រោះជាតិនេះ អ្នកស្រីទទួលយកមិនបាននោះទេ។
ពលរដ្ឋរូបនេះយល់ថាលោកកឹម សុខា មានអភ័យឯកសិទ្ធិជាតំណាងរាស្ត្រនៅទ្បើយ ជាពិសេសការសម្រេចចោទប្រកាន់លោកថាមិនចូលបំភ្លឺនៅតុលាការជាបទល្មើសជាក់ស្តែងនោះ វារឹតតែមិនសមហេតុផលទៅទៀត។
អ្នកគាំទ្ររូបនេះ ក៏បានឈរលើគោលជំហររបស់ខ្លួនថា ប្រសិនបើរដ្ឋសភាថ្ងៃស្អែកសម្រេចថាឱ្យតុលាការបន្តនីតិវិធីរបស់ខ្លួនចាប់លោកកឹម សុខានោះ អ្នកស្រីរួមទាំងសកម្មជនទាំងអស់នឹងធ្វើបាតុកម្មទ្រង់ទ្រាយធំ។ ប៉ុន្តែអ្នកស្រីលើកទឹកចិត្តទៅដល់គណបក្សទាំងពីរថាគួរតែបន្តវប្បធម៌សន្ទនាឱ្យអស់ពីលទ្ធភាពតាមដែលអាចធ្វើទៅបាន ដើម្បីសម្រេចជាលទ្ធផលល្អប្រសើរ។
ទាក់ទងនឹងបញ្ហានេះដែរ សាស្ត្រាចារ្យផ្នែកវិទ្យាសាស្ត្រនយោបាយលោកសូ ចន្ថា បានផ្តល់បទសម្ភាសន៍ជាមួយវិទ្យុស្ត្រីនៅថ្ងៃនេះថា ការសម្រេចពហិកាមិនទៅចូលរួមប្រជុំរដ្ឋសភារបស់គណបក្សសង្គ្រោះជាតិ គឺជាសិទ្ធិរបស់អ្នកតំណាងរាស្ត្រ។ មានន័យថា ប្រសិនបើតំណាងរាស្ត្រគណបក្សណាមួយយល់ថាការប្រជុំនោះមិនមានអត្ថប្រយោជន៍ឬប៉ះពាល់ទៅគណបក្សរបស់ខ្លួននោះ ពួកគេមានសិទ្ធិធ្វើពហិកាមិនចូលរួមប្រជុំដែលវាជាក្របខណ្ឌលទ្ធិប្រជាធិបតេយ្យសម្រាប់គ្រប់គណបក្សទាំងអស់។
លោកសូ ចន្ថា បន្តទៀតថា ការធ្វើពហិកាមិនចូលរួមប្រជុំនេះ ប្រហែលមកពីមានការរំលោភបំពានទៅលើអភ័យឯកសិទ្ធិតំណាងរាស្ត្ររបស់គណបក្សសង្គ្រោះជាតិ ។ លោកសូ ចន្ថាបន្ថែមទៀតថា ប្រសិនបើរដ្ឋសភាសម្រេចឱ្យតុលាការធ្វើទៅតាមនីតិវិធីរបស់ខ្លួនក្នុងចាប់ខ្លួនលោកកឹម សុខា នោះស្ថានការបែកបាក់ជាតិនឹងនៅតែបន្តទៀតមិនខាន។
ទោះយ៉ាងណា លោកស្នើឱ្យគណបក្សនយោបាយនៅកម្ពុជាគួរយកវប្បធម៌នយោបាយថ្មីប្រកួតប្រជែងគ្នាដោយស្មោះត្រង់ស្របតាមលទ្ធិប្រជាធិបតេយ្យ ជាពិសេសត្រូវត្រទ្បប់ងាកមករកតុចចារគ្នាវិញចៀសវាងឱ្យខាងតែបាននូវការប្រើប្រាស់ហិង្សាដាក់គ្នា។
ជុំវិញបញ្ហានេះ វិទ្យុស្ត្រីមិនទាន់អាចសុំការអត្ថាធិប្បាយពីអ្នកនាំពាក្យរដ្ឋសភា លោកទ្បេង ប៉េងទ្បុង បាននៅទ្បើយនោះទេ ជុំវិញការធ្វើពហិការរបស់គណបក្សសង្គ្រោះជាតិមិនចូលរួមប្រជុំគណៈកម្មាធិការអចិន្ត្រៃយ៍រដ្ឋសភានៅថ្ងៃស្អែកនោះ។
សូមបញ្ជាក់ផងដែរថា នៅព្រឹកថ្ងៃទី ២៩ ខែឧសភានេះ គណបក្សសង្គ្រោះជាតិក៏បានចេញសេចក្តីប្រកាសព័ត៌មានរបស់ខ្លួនថា ប្រជាពលរដ្ឋខ្មែរទាំង ២៥ រាជធានី-ខេត្ត ដែលគាំទ្រគណបក្សសង្គ្រោះជាតិ និងធ្វើការដង្ហែញត្តិដើម្បីទាមទារឱ្យមានការដោះលែងអ្នកនយោបាយនិងមន្ត្រីអង្គការសង្គមស៊ីវិល បញ្ឈប់ការប្រើប្រាស់ស្ថាប័នរដ្ឋដើម្បីគំរាមកំហែង កុំដាក់សម្ពាធលើអង្គការសង្គមស៊ីវិលនិងគណបក្សប្រឆាំង បញ្ឈប់ការប្រើប្រាស់អំណាចរដ្ឋដោយមានស្តង់ដារពីរ និងចំណុចចុងក្រោយឱ្យបញ្ឈប់ការប្រើប្រាស់អំណាចតុលាការរំលោភបំពានលើអំណាចនីតិបញ្ញាត្តិ ជាពិសេសរំលោភលើអភ័យឯកសិទ្ធិសភាជាដើម ៕
