ភ្នំពេញ ៖ សហជីពសេរីកម្មករនៃព្រះរាជាណាចក្រកម្ពុជា បានជូនដំណឹងដល់កម្មករ កម្មការិនីទាំងអស់ឱ្យត្រៀមខ្លួន ធ្វើបាតុកម្មករអហឹង្សា ប្រសិនបើមានការចាប់ខ្លួនប្រធានស្តីទីគណបក្សសង្គ្រោះជាតិ លោក កឹម សុខា ទាំងមានអភ័យឯកសិទ្ធិ ។សេចក្តីជូនដំណឹងនេះ បន្ទាប់ពីមានកងកម្លាំងប្រដាប់អាវុធ ឃាត់រថយន្តលោក កឹម សុខា និងចុះទៅដល់ទីស្នាក់ការកណ្តាលរបស់គណបក្សសង្គ្រោះជាតិ កាលពីម្សិលមិញ ។
ក្នុងសេចក្តីជូនដំណឹងរបស់សហជីពសេរីកម្មករនៃព្រះរាជាណាចក្រកម្ពុជា បានជូនដំណឹងដល់សមាជិក សមាជិកា សហជីពនៅតាមបណ្តារោងចក្រ ទូទាំងរាជធានីខេត្ត ឱ្យចូលរួមប្រើប្រាស់សិទ្ធិរបស់ខ្លួនឱ្យមានប្រសិទ្ធភាពក្នុងការធ្វើកូដកម្ម មិនចូលធ្វើការងាររបស់ខ្លួន បើមានការចាប់ឃាត់ខ្លួន លោក កឹម សុខា អ្នកតំណាងរាស្ត្រមណ្ឌលខេត្តកំពង់ចាម ដែលកំពុងមានអភ័យឯកសិទ្ធសភានោះ ។
« សូមបងប្អូន កម្មករ កម្មការិនីមេត្តាជ្រាប និងត្រៀមខ្លួនប្រើប្រាស់សិទ្ធិស្របច្បាប់របស់ខ្លួនតាមការជូនដំណឹងនេះ ដើម្បីជំរុញឱ្យមានការអនុវត្តច្បាប់នៅកម្ពុជា ពាក់ព័ន្ធនឹងអភ័យឯកសិទ្ធិសភាតំណាងរាស្ត្រ» ។
ឆ្លើយតបទៅនឹងការអំពាវនាវនេះ រដ្ឋមន្ត្រីក្រសួងការងាលោក អ៊ិត សំហេង បានប្រកាស តាមរយៈ Fresh News ថា លោកនឹងរំលាយក្រុមសហជីពនេះចោល បើមានការធ្វើកូដកម្មពិតមែននោះ ។ លោកបានទទួចឱ្យកម្មករ កម្មការិនីទាំងអស់រក្សាភាពស្ងប់ស្ងាត់ ក្នុងការបំពេញការងារ ដើម្បីបញ្ជៀសចលាចលនានា ។
ទាក់ទងនឹងបញ្ហានេះដែរ កញ្ញាធី សុវណ្ណថា ក៏បានប្រកាសនៅលើបណ្តាញសង្គមផងដែរ ថា កញ្ញានឹងដឹកនាំក្រុមបាតុកម្មធ្វើការគាំទ្រ ចំពោះចំណាត់ការរបស់តុលាការ ទៅលើលោក កឹម សុខា ដោយអះអាងថា មានសមាជិក គាំទ្រប្រមាណ១ម៉ឺននាក់ ៕
