ភ្នំពេញ ៖ ក្រោយបញ្ចប់កិច្ចប្រជុំគណៈកម្មាធិការអចិន្រៃ្តយ៍រដ្ឋសភា នៅព្រឹកថ្ងៃទី ២៧ខែឧសភានេះ តំណាងរាស្ត្រសំលេងភាគច្រើន ក្នុងរដ្ឋសភា មកពីគណបក្សប្រជាជនកម្ពុជា លោក ឈាង វុន មានប្រសាសន៍ជុំវិញករណីសម្ថកិច្ចស្វែងរកចាប់ខ្លួន ប្រធានស្តីទីគណបក្សសង្គ្រោះជាតិថា ប្រសិនបើ លោក កឹម សុខា ចូលខ្លួនទៅបំភ្លឺនៅតុលាការ តាមការកោះហៅរបស់ព្រះរាជអាជអាជ្ញា នោះគ្មានអ្នកណាចាប់ខ្លួនលោកឡើយ ។ លោកបញ្ជាក់ថា ដោយសារតែលោក កឹម សុខា រឹងទទឹងទើបធ្វើអោយអំនាចតុលាការមិនអាចទៅមុខបាន ។
លោក កឹម សុខា បានបដិសេធ មិនចូលខ្លួនទៅតុលាការរាជធានីភ្នំពេញ ចំនួនបីលើកមក ហើយ ទាក់ទិនទៅនឹងការបំភ្លឺ សញ្ចារកម្ម ករណី កញ្ញា ខុម ចាន់តារាទី ហៅស្រីមុំ ។ ក្រុមមេធាវីរបស់លោក កឹម សុខា បានអះអាងថា កូនក្ដីខ្លួន មានអភ័យឯកសិទ្ធិសភា ដែលមិនចាំបាច់ ចូលខ្លួន ឬអោយមានការចាប់ខ្លួននោះទេ ហើយពួកគេអះអាងបែបនេះ ដោយ យោងលើ មាត្រា៨០ នៃរដ្ឋធម្មនុញ្ញា ចែងការពារអភ័យឯកសិទ្ធិរបស់អ្នកតំណាងរាស្ដ្រ ៕
