ភ្នំពេញ ៖ មេធាវីការពារក្តីឱ្យអ្នកតំណាងរាស្ត្រ២រូបនៃគណបក្សសង្គ្រោះជាតិ ដែលរងការវាយឱ្យរបួសធ្ងន់ មិនទាន់ទទួលយកសាលក្រម របស់សាលាដំបូងរាជធានីភ្នំពេញ ផ្ដន្ទាទោសជនល្មើសឱ្យមានទោស៤ឆ្នាំ និងព្យួរទោស ៣ឆ្នាំ ហើយពិន័យជាប្រាក់៦លានរៀល ។
លោក សំ សុគង់ ដែលបានចូលរួមស្តាប់ការប្រកាសសាលក្រមនេះ លើកឡើងថាលោកមិនទាន់ពេញចិត្តនឹងការសម្រេចរបស់តុលាការនៅពេលនេះបានទេ ព្រោះមិនសមហេតុផល ។ លោកបន្តថា លោកនឹងពិចារណាពិភាក្សាជាមួយកូនក្តី ដើម្បីប្តឹងឧទ្ធរណ៍បន្តទៀត ។
ការថ្លែងរបស់លោកមេធាវី សំ សុគង់ ធ្វើឡើងនៅសាលាដំបូងរាជធានីភ្នំពេញ នៅថ្ងៃទី២៧ខែឧសភានេះ គឺភ្លាមៗបន្ទាប់ពីបានទៅស្ដាប់ ការអានសាលក្រម របស់មន្ត្រីតុលាការរាជធានីភ្នំពេញ នៅព្រឹកថ្ងៃសុក្រទី២៧ ឧសភា ។
ជនជាប់ចោទទាំង៣នាក់ដែលបានបង្កហិង្សាវាយលើអ្នកតំណាងបក្សប្រឆាំងគឺលោក គង់ សភា និងលោក ញ៉យ ចំរើន កាលពី ចុងខែតុលាឆ្នាំ២០១៥ គឺមានឈ្មោះ សុត វណ្ណនី ,ម៉ៅ ហឿន និង ចាយ សារិទ្ធ ។ ពួកគេត្រូវបានចោទបង្កររបួស្នាម និងធ្វើឱ្យខូចទ្រព្យសម្បត្តិជនរងគ្រោះ ។
បទចោទធ្វើឲ្យខូចខាតទ្រព្យសម្បតិ្តដោយចេតនាមានស្ថានទម្ងន់ទោស ត្រូវតុលាការសម្រេចទម្លាក់ចោលវិញ ។
ក្នុងពេលប្រកាសសាលក្រមនោះ តុលាការក៏សម្រេចឱ្យជនជាប់ចោទ ទាំង៣នាក់នេះត្រូវបង់សំណងជម្ងឺចិត្តដល់អ្នកតំណាងរាស្ត្រទាំង២រូប ចំនួន៨០លានរៀល ។
សូមរំលឹកថា តំណាងរាស្ត្រទាំងពីររូប គឺលោក ញ៉យ ចំរើន និងលោក គង់ សភា ត្រូវបានជនមួយក្រុមព្រួតគ្នាវាយនៅពេលបើករថយន្តចេញពីប្រជុំនៅមន្ទីររដ្ឋសភា កាលពីថ្ងៃទី២៦ខែតុលា ឆ្នាំ២០១៥ គឺ ពួកគេ ត្រូវបានវាយចំពេលបាតុករប្រមូលផ្ដុំគ្នា ទម្លាក់លោក កឹម សុខា ពីអនុប្រធានទី១នៃរដ្ឋសភា ដែលគេថា ក្រុមបាតុករជាសមត្ថកិច្ច របស់រដ្ឋ ។
តំណាងរាស្ត្រគណបក្សសង្គ្រោះជាតិទាំងពីរ ធ្លាប់បានដាក់ពាក្យប្ដឹងក្រុមបាតុករតាមរយៈមេធាវីរបស់ខ្លួនទៅសាលាដំបូងរាជធានីភ្នំពេញ ពីបទប៉ុនប៉ងឃាតកម្មគិតទុកជាមុន និងធ្វើឲ្យខូចខាតទ្រព្យសម្បត្តិដោយចេតនា មានស្ថានទម្ងន់ទោស ព្រមទាំងទាមទារសំណងជាទឹកប្រាក់ម្នាក់ៗចំនួន ១០០លានរៀល ៕
