ភ្នំពេញ ៖ រាជរដ្ឋាភិបាលបានចេញអនុក្រឹត្យ ដោយដាក់កំហិតឲ្យឧស្សាហកម្មថ្នាំជក់ និងអ្នកនាំចូល ចែកចាយផលិតផលថ្នាំជក់គ្រប់ប្រភេទ នៅក្នុងប្រទេសកម្ពុជា ត្រូវអនុវត្តបោះពុម្ពសារព្រមានសុខភាពជារូបភាព និងអក្សរជាភាសាខ្មែរ នៅលើកញ្ចប់ថ្នាំជក់ ឬបារី ទំហំ៥៥ភាគរយ ។
សង្គមស៊ីវិល បានធ្វើសន្និសីទសាព័ត៌មាន នៅព្រឹកថ្ងៃទី ២៦ខែឧសភានេះ សាទរទៅនិងបានលើកឡើងថា សារព្រមានសុខភាពដាក់នៅលើកញ្ចប់បារី អាចជួយទប់ស្កាត់មិនឲ្យ យុវជន ស្ត្រី និងកុមារ ចាប់ផ្តើមជក់បារីយ៉ាងមានប្រសិទ្ធភាព ។
អនុក្រឹត្យនេះ បានចេញកាលពីថ្ងៃទី ២២ខែតុលា ឆ្នាំ២០១៥ ដោយកំណត់ឲ្យឧស្សាហកម្មថ្នាំជក់ និងអ្នកនាំចូល ចែកចាយផលិតផលថ្នាំជក់គ្រប់ប្រភេទនៅក្នុងប្រទេសកម្ពុជា ត្រូវអនុវត្តបោះពុម្ពសារព្រមានសុខភាពជារូបភាព និងជាភាសាខ្មែរនៅលើកញ្ចប់ថ្នាំជក់ ឬបារី នៅទំហំ៥៥ភាគរយ ដោយត្រូវអនុវត្តជាធរមានចាប់ពី ខែកក្កដា ឆ្នាំ២០១៦នេះតទៅ ។ អង្គការសង្គមស៊ីវិលលើកឡើងថា សារព្រមានសុខភាពដាក់នៅលើកញ្ចប់បារី អាចជួយទប់ស្កាត់មិនឲ្យ យុវជន ស្ត្រី និងកុមារ ចាប់ផ្តើមជក់បារីយ៉ាងមានប្រសិទ្ធភាព ។
អនុក្រឹត្យរបស់រាជរដ្ឋាភិបាលនេះក៏តម្រូវឲ្យ ឧស្សាហកម្មថ្នាំជក់ ត្រូវបោះពុម្ពសារព្រមាននៅផ្នែកខាងលើនៃកញ្ចប់បារីទាំងខាងមុខ និងខាងក្រោយ និង តម្រូវឲ្យឧស្សាហកម្មថ្នាំជក់ត្រូវធានាបាននៅរូបភាពងាយមើល ច្បាស់លាស់ មិនហើរពណ៌ មិនរលុប និងមិនត្រួតគ្នា ។
រាល់ឧស្សាហកម្មថ្នាំជក់ មិនអនុវត្តតាមអនុក្រឹត្យនេះ នឹងត្រូវពិន័យជាប្រាក់ចាប់ពី ៤,០០០,០០០ រៀល(បួនលានរៀល) ។ ចំណែកអ្នកចែកចាយ និងលក់ដុំផលិតផលថ្នាំជក់ ដែលលក់ផលិតផលគ្មានសារព្រមានសុខភាពត្រឹមត្រូវតាមការកំណត់នឹងត្រូវពិន័យជាប្រាក់ ២,០០០,០០០(ពីលានរៀល) ។ ចំពោះអ្នកលក់រាយវិញនឹងត្រូវពិន័យជាប្រាក់ ១០.០០០រៀល(មួយម៉ឺនរៀល) ក្នុងករណីបទល្មើស ។
លោក វេជ្ជបណ្ឌិត មុំ គង់ អង្គការចលនា ដើម្បីសុខភាពកម្ពុជា បានមានប្រសាសន៍នៅក្នុងសន្និសីទសារព័ត៌មាន ស្តីពីការអនុវត្តមាត្រា ១១ នៃអនុសញ្ញាស្តីពីការត្រួតពិនិត្យថ្នាំជក់នៅព្រឹកថ្ងៃព្រហស្បត្តិ៍នេះថា ការបោះពុម្ពសារព្រមានសុខភាពជារូបភាពនៅលើកញ្ចប់បារីមានសារសំខាន់ណាស់ ក្នុងការអប់រំអ្នកជក់បារី និងទប់ស្កាត់ការចាប់ផ្តើមការជក់បារីរបស់កុមារ និងយុវជន ។
លោក វេជ្ជបណ្ឌិត មុំ គង់ និយាយថា៖«ការដាក់សារព្រមានសុខភាពមានគោលបំណង់សំខាន់មួយគឺ អប់រំទៅដល់អ្នកជក់ ព្រោះសារទាំងនេះនឹងរំលឹកគាត់បើគាត់បន្តជក់នឹងប្រឈមមុខជំងឺទាំងឡាយ។ ទី២ សារព្រមានទប់ស្កាត់មិនឲ្យកុមារ និតយុវជនចាប់ផ្តើមជក់បារីតាមរយៈសារជារូបភាព» ។
ដូចគ្នានេះដែរ លោក វេជ្ជបណ្ឌិត យ៉ិល ដារ៉ាវុធ តំណាងអង្គការសុខភាពពិភពលោកបានថ្លែងថា ការដាក់សារព្រមានទំហំ៥៥ភាគរយនៅលើកញ្ចប់បារី គឺជាយន្តការទប់ស្កាត់ និងអប់រំប្រជាពលរដ្ឋបានយ៉ាងមានប្រសិទ្ធភាពខ្ពស់ ដោយលោកពន្យល់ថា ប្រសិនបើអ្នកជក់បារី២០ដើមក្នុងមួយថ្ងៃ គេនឹងអាចមើលឃើញសារព្រមាននៅលើបារីជាង៧ពាន់ដងក្នុងមួយឆ្នាំ ដែលជាផ្នែកមួយអប់រំដល់ប្រជាពលរដ្ឋ ។
លោក វេជ្ជបណ្ឌិត យ៉ិល ដារ៉ាវុធថ្លែងថា ៖ «សារព្រមានជារូបភាពនេះ អាចធ្វើការ២៤ម៉ោងក្នុងមួយថ្ងៃ ៧ថ្ងៃក្នុង១សប្តាហ៍ ប្រសិនបើអ្នកជក់បារី២០ដើមក្នុងមួយថ្ងៃ យើងឃើញថាគេអាច ឃើញផលិតផលថ្នាំជក់នេះដែលសារនេះរហូតដល់៧៣០ដងក្នុងមួយឆ្នាំ ប្រសិនបើគាត់ជក់២០ដើមក្នុង១ថ្ងៃ អញ្ចឹងបង្ហាញថា ការសារជារូបភាពនេះ មានប្រសិនភាពជួយអប់រំប្រជាពលរដ្ឋឲ្យយល់ដឹងពីការប្រើប្រាស់ថ្នាំជក់» ។
សារធាតុគីមីប្រមាណ៧ពាន់ប្រភេទនៅក្នុងផលិតផលបារី នឹងបណ្តាលឱ្យអ្នកជក់កើតជំងឺជាច្រើនដូចជា ជំងឺមហារីកមាត់ ជំងឺមហារីកសួត ជំងឺមហារីកបំពង់ក រលាកផ្លូវដង្ហើមធ្ងន់ធ្ងរ ដាច់សរសៃឈាមខួរក្បាល និងបណ្តាលឲ្យរលូតកូនសម្រាប់ស្ត្រីមានផ្ទៃពោះជាដើម ។
ថ្មីៗនេះ ក្រសួងសុខាភិបាលមានវិធានការការហាមជក់បារី ឬការបង្ហុយផ្សែងបារី និងផលិតផលថ្នាំជក់នៅកន្លែងធ្វើការឬនៅកន្លែងសាធារណៈ ។
បើតាមច្បាប់ស្តីពីការត្រួតពិនិត្យផលិតផលថ្នាំជក់ ចែងថា ជនណាដែលបានជក់បារីនៅកន្លែងធ្វើការ ឬនៅកន្លែងសាធារណៈ និងត្រូវទទួលពិន័យអន្តរកាល គឺផាកពិន័យជាប្រាក់ចំនួន ២ ម៉ឺនរៀល ។ ចំណែកម្ចាស់ហាងដែលមិនបានបិទស្លាកសញ្ញាគឺត្រូវពិន័យជាប្រាក់ចំនួន ៥ ម៉ឺនរៀលផងដែរ ។
បច្ចុប្បន្ននេះ ក្នុងប្រទេស៧៧ នៅលើពិភពលោក មានសារព្រមានសុខភាពធំៗនៅលើកញ្ចប់ផលិតផលថ្នាំជក់ ក្នុងចំណោមប្រទេសអាស៊ានទាំង ១០ ។
សូមបញ្ជាក់ថា ប្រជាពលរដ្ឋ ៦ លាននាក់ បានស្លាប់ជារៀងរាល់ឆ្នាំ នៅលើពិភពលោក ក្នុងនោះមានអ្នកមិនជក់បារី ៦ សែននាក់ ដែលអ្នកទាំងនោះបានស្រូបផ្សែងបារីពីគេ ។ ដោយឡែកប្រទេសកម្ពុជា មានពលរដ្ឋ ៣០ នាក់ ក្នុងមួយថ្ងៃៗបានស្លាប់បណ្តាលមកពីជំងឺដែលបង្កដោយការជក់បារី ៕
