ភ្នំពេញ៖ តំណាងមូលនិធិកូហ្វី អាណាន់ (Kofi Annan Foundation) លោក អាឡាន់ ដូហ្វ (Alan Doss) លើកឡើង ថា លោកចង់ឃើញដំណើរការបោះឆ្នោតមានភាពយុត្តិធម៌ ពោលគឺចង់ឃើញស្ថាប័ន គ.ជ.ប មួយប្រកបដោយភាពឯករាជ្យ។ ជាងនេះលោកក៏ទទូចឱ្យយុវជនទើបគ្រប់អាយុបោះឆ្នោត ចូលរួមការបោះឆ្នោតឱ្យបានច្រើននាពេលខាងមុខនេះ។
ការលើកឡើងរបស់តំណាងមូលនិធិកូហ្វី អាណាន់ នេះ គឺក្រោយជំនួបបិទទ្វារជាមួយលោកព្រុំ សុខា រដ្ឋលេខាធិការក្រសួងមហាផ្ទៃនៅថ្ងៃទី ២៥ ខែឧសភានេះ។ ក្នុងជំនួបនោះលោកព្រុំ សុខា ឆ្លើយតបថាក្រសួងមហាផ្ទៃបានពន្លឿនការធ្វើអត្តសញ្ញាណបណ្ណជូនដល់ប្រជាជនបានប្រមាណ ៨ លានហើយគិតមកទល់ពេលនេះ។
ក្នុងជំនួបបិទទ្វារជាងមួយម៉ោងនៅបន្ទប់ប្រជុំពិសេសនាក្រសួងមហាផ្ទៃលោកអាឡាន់ ដូហ្វ មិនបានជជែកអំពីករណីអគ្គលេខាធិការរង គ.ជ.ប លោកនី ចរិយា ដែលកំពុងជាប់ឃុំនោះទេ។ តែយ៉ាងណាលោកបញ្ជាក់ថា ក្នុងករណីលោកនី ចរិយា នេះ ភាគីពាក់ព័ន្ធត្រូវពិភាក្សាគ្នាឡើងវិញ។
លោក អាឡាន់ ដូហ្វ បានបញ្ជាក់ថាដំណើរទស្សនកិច្ចរបស់លោកមានរយៈពេលខ្លីពេកនេះ គឺលោកមិនអាចវាយតម្លៃស្ថានការណ៍បោះឆ្នោតនៅកម្ពុជា បានគ្រប់ជ្រុងជ្រោយនោះទេ ប៉ុន្តែអ្វីដែលលោកចាប់អារម្មណ៍គឺការប្រកាន់ជំហរឯករាជ្យរបស់ស្ថាប័នបោះឆ្នោត និង ការជួយជំរុញឱ្យយុវជនបានទៅចុះឈ្មោះបោះឆ្នោតបានគ្រប់ៗគ្នា គឺជាពិសេសយុវជនទើបអាយុបោះឆ្នោត។
ឆ្លើយតបនឹងតំណាងមូលនិធិកូហ្វី អាណាន់នេះ លោកព្រុំ សុខា រដ្ឋលេខាធិការក្រសួងមហាផ្ទៃនិយាយថា ក្រសួងពាក់ព័ន្ធបានខិតខំរៀបចំកម្លាំងសន្តិសុខ ដើម្បីសណ្តាប់ធ្នាប់និងបង្កនូវបរិយាកាសបោះឆ្នោតមួយប្រកបដោយត្រឹមត្រូវ សេរី និង យុត្តិធម៌ ជាពិសេសនោះគឺការរៀបចំនូវរដ្ឋបាលនៃការបោះឆ្នោត ដែលធ្វើយ៉ាងណាបង្កលក្ខណងាយស្រួលដល់ប្រជាពលរដ្ឋក្នុងការចុះឈ្មោះបោះឆ្នោត។
លោក ព្រុំ សុខា៖ «ក្រសួងមហាផ្ទៃ បាននឹងកំពុងធ្វើកិច្ចការរបស់ខ្លួនក្នុងដែនសមត្ថកិច្ចរបស់ខ្លួន ដើម្បីជួយជ្រោមជ្រែង និងបង្កលក្ខណឱ្យការបោះឆ្នោតមួយនាពេលខាងមុខនេះ ប្រព្រឹត្តិទៅដោយសេរី និងយុត្តិធម៌»។
ជាមួយគ្នានេះសម្ដេចហ៊ុន សែន ក្នុងពិធីចែកសញ្ញាបត្រនិស្សិតអាស៊ីអឺរ៉ុប នៅរាជធានីភ្នំពេញ កាលពីព្រឹកថ្ងៃនេះដែរ សម្ដេចក៏បានទទូចឱ្យពលរដ្ឋត្រូវដែលមិនទាន់មានអត្តសញ្ញណប័ណ្ណ ត្រូវទៅធ្វើអត្តសញ្ញាប័ណ្ណ ហើយសមត្ថកិច្ចត្រូវជួយសម្រួលឱ្យបានឆាប់ ដើម្បីបានចុះឈ្មោះបោះឆ្នោតខាងមុខនេះ ។
សម្ដេច ហ៊ុន សែន៖ «អាជ្ញាធររបស់យើងដែលទទួលបន្ទុកចេញអត្តសញ្ញាណប័ណ្ណត្រូវធ្វើអត្តសញ្ញាណប័ណ្ណដែលសេសសល់ប្រមាណជាង ២ លាននាក់ឱ្យមានលឿនបំផុតដើម្បីឱ្យពួកគាត់មានលទ្ធភាពទៅចុះឈ្មោះបោះឆ្នោត»។
សូមបញ្ជាក់ថា គណៈប្រតិភូមូលនិធិកូហ្វី អាណាន់ (Kofi Annan Foundation) របស់អតីតអគ្គលេខាធិការអង្គការសហប្រជាជាតិ (អ.ស.ប) បានមកធ្វើទស្សនកិច្ចស្វែងយល់ពីការបោះឆ្នោតពីលទ្ធិប្រជាធិបតេយ្យនិងសន្តិសុខនៅកម្ពុជា ចាប់ពីថ្ងៃទី ២២ ដល់ថ្ងៃទី ២៥ ខែឧសភា ។
គណៈប្រតិភូនេះបានជួបពិភាក្សាស្វែងយល់ការងារ ជាមួយភាគីពាក់ព័ន្ធមួយចំនួនដូចជា គ.ជ.ប អង្គការក្រៅរដ្ឋាភិបាលជាតិនិងអន្តរជាតិ គណបក្សនយោបាយ បណ្ដាស្ថាប័នទូត និងរដ្ឋាភិបាល។
ប្រទេសកម្ពុជានឹងមានការបោះឆ្នោត សំខាន់ៗចំនួន ២ គឺការបោះឆ្នោតក្រុមប្រឹក្សាឃុំសង្កាត់ឆ្នាំ២០១៧ ដែលគេថា អំណាច សហវិមជ្ឈការ ឬប្រជាធិបតេយ្យមូលដ្ឋាន និង ការបោះឆ្នោត សភានិតិកាលទី ៦ នៅឆ្នាំ ២០១៨ ដែលជាការជ្រើសរើសតំណាងពលរដ្ឋថ្នាក់ជាតិ ៕
