ប្រធានាធិបតីសហរដ្ឋអាមេរិកបារ៉ាក់ អូបាម៉ា ជាមេដឹកនាំអាមេរិកលើកដំបូងដែលបានធ្វើទស្សនៈកិច្ចនៅប្រទេសវៀតណាមបានអំពាវនាវឲ្យភាគីមានជម្លោះទាំងអស់នៃដែនទឹកសមុទ្រចិនខាងត្បូងចូលរួមដោះស្រាយជម្លោះជាមួយគ្នាដោយសន្ដិវិធីខណៈលោកថាចិនជាប្រទេសធំមិនត្រូវរំលោភប្រទេសតូចជាងខ្លួន។
ការអំពាវនាវរបស់លោកអូបាម៉ា បានធ្វើឡើងនៅក្នុងជំនួបជាមួយនិងប្រធានាធិបតីវៀតណាមកាលពីថ្ងៃអង្គារ៍ទី ២៤ ឧសភា នៅទីក្រុងហាណូយនិងនៅចំពោះមុខសមាជិកជាន់ខ្ពស់នៃបក្សកុម្មុនីសវៀតណាមប្រមាណជាង ២ ពាន់នាក់ដែលបានចូលរួមស្ដាប់សុន្ទកថារបស់លោក។
ការថ្លែងរបស់លោកអូបាម៉ា បានទទួលការទះដៃអបអរសាទរពីសមាជិកបក្សកុម្មុយនីសវៀតណាមទាំងនោះ។ លោកអូបាម៉ាបានថ្លែងថា៖ «ប្រទេសធំមិនគួររំលោភលើប្រទេសតូចជាងខ្លួននោះទេហើយជំលោះគួរតែបានដោះស្រាយដោយសន្ដិវិធី»។
ប្រទេសដែលមានជម្លោះដែនទឹកសមុទ្រជាមួយចិនមាន វៀណាម ហ្វីលីពីន ម៉ាឡេស៊ី និងព្រុយណេ។ លោកអូបាម៉ាបានថែងទៀតថា បន្ទាប់ពីសង្គ្រាមត្រជាក់គឺអាមេរិកបានដាក់ចុះនៃការហាមលក់អាវុធទៅឲ្យប្រទេសនេះ ប៉ុន្តែពេលនេះអាមេរិកបានលុបចោលបម្រាមនេះដោយបើកឲ្យមានការនាំអាវុធចូលប្រទេសវៀតណាមឡើងវិញដែលលោកជាផ្នែកមួយនៃការជួយពង្រឹងសន្ដិសុខជាតិចំពោះប្រទេសវៀតណាម។
ទីក្រុងហាណូយនិងទីក្រុងវ៉ាស៊ីនតោនដែលបង្ហាញនូវភាពស្និទ្ធស្នាលនេះក៏ផ្ដើមឲ្យមានការព្រួយបារម្ភផងដែរពីសំណាក់ទីក្រុងប៉េកាំង។ ទីក្រុងប៉េកាំងបានប្រកាសស្វាគមន៍ដំណើរទស្សនៈកិច្ចរបស់លោកអូបាម៉ាមកកាន់ទីក្រុងហាណូយប៉ុន្ដែនៅគ្រានេះចិនទទូចឲ្យអាមេរិកកុំជ្រៀតជ្រែកកិច្ចការផ្ទៃក្នុងនៃជំលោះតំបន់៕
ប្រភព:CNA
