ភ្នំពេញ ៖ សមាគមខ្មែរកម្ពុជាក្រោមមួយចំនួនគ្រោងដាក់លិខិតទៅ លោក បារ៉ាក់ អូបាម៉ា ដើម្បីស្នើឲ្យ រដ្ឋវៀតណាមគោរពសិទ្ធិប្រជាពលរដ្ឋខ្មែរកម្ពុជាក្រោម ស្របពេលដំណើរទស្សនកិច្ច ប្រធានាធិបតីសហរដ្ឋអាមេរិករូបនេះ នៅប្រទេសវៀតណាម ។
ប្រធានាធិបតីសហរដ្ឋអាមេរិក លោក បារ៉ាក់ អូបាម៉ា បានទៅដល់ ប្រទេសវៀតណាមហើយ ដើម្បីបំពេញទស្សនកិច្ចរយៈពេល៣ថ្ងៃ ដែលជាលើកដំបូងរបស់មេដឹកនាំអាមេរិក ទៅកាន់ប្រទេសអតីតសត្រូវ នៃសង្គ្រាមវៀតណាម ។ ជុំវិញដំណើរទស្សនកិច្ចមេដឹកនាំអាមេរិកនេះ សមាគមខ្មែរកម្ពុជាក្រោមមួយចំនួនដែល វិទ្យុស្ត្រី សុំសម្ភាសន៍ពួកគាត់ អះអាងថា នឹងបញ្ជូនសេចក្ដីថ្លែងការណ៍ ទទូចលោក អូបាម៉ា គាបសង្កត់ វៀតណាម ឱ្យគោរពសិទ្ធិរបស់ខ្មែរក្រោម ដែលជាម្ចាស់ទឹកដី ។
លោក សឺន ជុំជួន នាយកកម្មវិធីសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍ និយាយថា សមាគមរបស់លោកគ្រោងនឹងជួបពិភាក្សាគ្នា ដើម្បីដាក់លិខិតទៅ លោក អូបាម៉ា ប្រធានាធិបតីអាមេរិក ក្នុងគោលបំណងជំរុញឲ្យអាជ្ញាធរវៀតណាមគោរពសិទ្ធិខ្មែរកម្ពុជាក្រោម ។ លោកសង្ឃឹមថា ប្រធានាធិបតីអាមេរិក នឹងលើកឡើងអំពីបញ្ហាសិទ្ធិមនុស្សជាមួយប្រទេសវៀតណាម ។
លោក សឺន ជុំជួន ៖«បញ្ហារឿងខ្មែរក្រោម នៅក្នុងនោះក៏ជារឿងសំខាន់មួយដែរ ពីព្រោះខ្មែរដើមជាជនជាតិភាគតិចមួយ រងការរំលោភបំពានច្រើនជាងគេបង្អស់» ។
ដូចគ្នានេះដែរ លោក ថាច់ សេដ្ឋា ប្រធានសមាគមខ្មែរកម្ពុជាក្រោមបញ្ជាក់ថា លោកនឹងដាក់លិខិតមួយផ្ញើរទៅ លោក បារ៉ាក់ អូបាម៉ា ដើម្បីជួយជំរុញអាជ្ញាធរមានវៀតឲ្យគោរពសិទ្ធិខ្មែរកម្ពុជាក្រោម ទោះបីជាលោកដឹងថា រដ្ឋាភិបាលវៀតណាមមិនដែលគោរពសិទ្ធិខ្មែរកម្ពុជាក្រោមក៏ដោយ តែយ៉ាងហោចណាស់លិខិតរបស់សមាគមបង្ហាញអំពីការរំលោភបំពានសិទ្ធិយ៉ាងធ្ងន់ធ្ងរ ត្រូវបានប្រធានាធិបតីអាមេរិកចាប់អារម្មណ៍ ។
ការបំពេញទស្សនកិច្ចរបស់ប្រមុខដឹកនាំកំពូលអាមេរិកលើកនេះ ក្នុងគោលដៅពង្រឹងទំនាក់ទំនងជាមួយប្រទេសនៅអាស៊ី ទាំងសេដ្ឋកិច្ច និងពាណិជ្ជកម្ម ។ ប៉ុន្តែមន្ត្រីសេតវិមានអាមេរិកនិយាយថា បញ្ហាដែលត្រូវផ្ដោតលើដំណើរទស្សនកិច្ចរបស់លោក អូបាម៉ា ទៅកាន់ប្រទេសវៀតណាម គឺបញ្ហាសិទ្ធិមនុស្សអាចជារបៀបវារៈសំខាន់មួយដែរ ក្នុងចំណោមបញ្ហាជាច្រើន ៕
