អន្តរជាតិ ៖ ប្រធានាធិបតីសហរដ្ឋអាមេរិក លោក ប៉ារ៉ាក់ អូបាម៉ា បានទៅដល់ប្រទេសវៀតណាមហើយ ដើម្បីបំពេញទស្សនកិច្ចរយៈពេល៣ថ្ងៃ ដែលជាលើកដំបូងរបស់មេដឹកនាំអាមេរិក ទៅកាន់ ប្រទេសអតីតសត្រូវ នៃសង្គ្រាម វៀតណាម ។
តាម BBC ការបំពេញទស្សនកិច្ចរបស់ប្រមុខដឹកនាំកំពូលអាមេរិកលើកនេះ ក្នុងគោលដៅពង្រឹងទំនាក់ទំនងជាមួយប្រទេសនៅអាស៊ី ទាំងសេដ្ឋកិច្ច និងពាណិជ្ជកម្ម ។ ប៉ុន្តែមន្ត្រីសេតវិមានអាមេរិកនិយាយថា បញ្ហាដែលត្រូវផ្ដោតលើដំណើរទស្សនកិច្ចរបស់លោក អូបាម៉ា ទៅកាន់ប្រទេសវៀតណាម គឺបញ្ហាសិទ្ធិមនុស្សអាចជារបៀបវារៈសំខាន់មួយដែរ ក្នុងចំណោមបញ្ហាជាច្រើន ។
តាមលោក Ben Rhodes ទីប្រឹក្សារងសន្តិសុខជាតិរបស់សេតវិមាន បញ្ហាសិទ្ធិមនុស្សអាចត្រូវបានលើកឡើង ស្របពេលមេដឹកនាំអាមេរិករូបនេះ និយាយទៅដល់ការលុបចោលបំរាមលក់អាវុធទៅឱ្យវៀតណាម ។
ក្រោយពីបំពេញទស្សនកិច្ចរយៈពេល៣ថ្ងៃនេះ លោកប្រធានាធិបតីសហរដ្ឋអាមេរិក នឹងទៅកាន់ប្រទេសជប៉ុន ដើម្បីចូលរួមកិច្ចប្រជុំ G7 រួមទាំងទៅទស្សនកិច្ចដែលមិនធ្លាប់មាន នៅកោះ ហ៊ីរ៉ូហ្ស៊ីម៉ា ។
អាមេរិកនិងវៀតណាម មានទំនាក់ទំនងជាធម្មតាជាមួយគ្នាឡើងវិញ នៅចុងទសវត្ស ១៩៩០ គឺបន្ទាប់ពី ប្រទេសអតីតសត្រូវសង្គ្រាមត្រជាក់នឹងគ្នានេះ បានយល់ព្រមស្ដារទំនាក់ទំនងទ្វេភាគីដើម្បីការអភិវឌ្ឍសេដ្ឋកិច្ចរវាងប្រទេសទាំង២ ៕
ប្រភព:BBC
