ភ្នំពេញ៖ យុវជនមួយចំនួនបានបង្ហាញក្តីកង្វល់របស់ខ្លួនជុំវិញការបញ្ចេញមតិតាមរយៈប្រព័ន្ធអនទ្បាញ នាថ្ងៃទី ២២ ឧសភា ក្នុងវេទិកាស្តីពីវិធីសាស្ត្រស្វែងរកការគាំទ្រមតិតាមរយៈយុទ្ធនាការអនទ្បាញ និងការផ្សព្វផ្សាយពីគេហទំព័រ «សំឡេងយុវជន» នៅសាកលវិទ្យាល័យអាស៊ីអ៊ឺរ៉ុប។ ការព្រួយបារម្ភនេះខណៈដែលមានយុវជនមួយចំនួនបានបង្ហោះរឿងនយោបាយនៅក្នុងបណ្តាញសង្គមនាពេលកន្លងមក ត្រូវបានចាប់ដាក់ពន្ធនាគារ ជាហេតុធ្វើឱ្យពួកគេមានការភ័យខ្លាច។
យុវជនចំនួន ៣១១ នាក់ បានចូលរួមវេទិកាមួយស្តីពីវិធីសាស្ត្រស្វែងរកការគាំទ្រមតិតាមរយៈយុទ្ធនាការអនទ្បាញនិងការផ្សព្វផ្សាយពីគេហទំព័រ «សំឡេងយុវជន» ដោយពួកគេបានលើកទ្បើងថា ការចូលរួមរបស់យុវជនបញ្ចេញមតិតាមរយៈប្រព័ន្ធអនទ្បាញ មានសារៈសំខាន់ណាស់ក្នុងការរួមចំណែកអភិវឌ្ឍន៍សង្គមជាតិ។ ទន្ទឹមនឹងសារៈសំខាន់នេះ យុវជនមួយចំនួនបានបង្ហាញក្តីកង្វល់របស់ខ្លួននៅពេលបញ្ចេញមតិតាមប្រព័ន្ធអនទ្បាញ។
យុវជនម្នាក់ក្នុងចំណោមយុវជនជាច្រើនរយនាក់លោកនាង ស៊ីណេន ដែលបច្ចុប្បន្នជានិស្សិតឆ្នាំទី ០៤ នៅសាកលវិទ្យាល័យបញ្ញាសាស្ត្រ ផ្នែកទំនាក់ទំនងអន្តរជាតិ បានលើកទ្បើងថា លោកចូលរួមវេទិកានៅថ្ងៃនេះដើម្បីចង់ដឹងពីការបញ្ចេញមតិរបស់យុវជនតាមប្រព័ន្ធផ្សព្វផ្សាយថា តើគួរធ្វើយ៉ាងណាដើម្បីបញ្ចេញមតិទៅមិនធ្វើឱ្យប៉ះពាល់ទៅដល់សង្គមជាតិ ?
យុវជន ស៊ីណេន បន្តថា ការចូលរួមរបស់យុវជនតាមរយៈប្រព័ន្ធអនទ្បាញមានសារៈសំខាន់ណាស់ ក្នុងការរួមចំណែកអភិវឌ្ឍន៍ប្រទេសជាតិឱ្យកាន់តែមានការរីកចម្រើន។ «យើងរស់នៅក្នុងសង្គមហ្នឹងពិតជាមានការព្រួយបារម្ភមែនទែនដោយសារតែហេតុអ្វី ទី០១ គឺច្បាប់រដ្ឋធម្មនុញយើងបានផ្តល់សិទ្ធិឱ្យពលរដ្ឋគ្រប់គ្រាន់ក្នុងការបញ្ចេញមតិឬក៏យោបល់តាមរយៈប្រព័ន្ធផ្សព្វផ្សាយអីប៉ុន្តែជាក់ស្តែងនៅក្នុងសង្គមយើងរាល់ការបញ្ចេញមតិតាមប្រព័ន្ធអនទ្បាញឬតាមប្រព័ន្ធ Media មានហានិភ័យ..»។
ចំណែកឯយុវតីដែលជានិស្សិតឆ្នាំទីពីរនៅសាកលវិទ្យាល័យភូមិន្ទភ្នំពេញ ផ្នែកគ្រប់គ្រងអភិវឌ្ឍន៍ធនធានធម្មជាតិគឺយុវតីម៉ន ចន្ធូ បានលើកទ្បើងដែរថា ការបញ្ចេញមតិរិះគន់ទៅលើអ្វីមួយនៅក្នុងសង្គមតាមប្រព័ន្ធអនទ្បាញរបស់យុវជន បានដើរតួនាទីយ៉ាងសំខាន់ក្នុងការផ្លាស់ប្តូរពីផលអវិជ្ជមាន ដែលមាននៅក្នុងសង្គមឱ្យទៅជាផលវិជ្ជាមានវិញ។
យុវតីរូបនេះក៏មានការព្រួយបារម្ភចំពោះការបញ្ចេញមតិតាមប្រព័ន្ធអនទ្បាញផងដែរ ជាពិសេសការចែករម្លែកព័ត៌មានទាក់ទងនឹងរឿងនយោបាយជាដើម ។ «ពេលខ្លះយើងក៏មានអារម្មណ៍ថាយើងគួរឱ្យភ័យខ្លាចដែរដោយសារតែដូចជាយើងបានឃើញហើយឥលូវហ្នឹង អញ្ចឹងពេលបញ្ចេញអ្វី ភាគច្រើនល្មមៗគឺតែងតែមានគំនិតវិជ្ជមានពីខាងគេ សុំសំណូមពរវិញខ្ញុំគិតថារាជរដ្ឋាភិបាលគួរលើកទឹកចិត្តទៅដល់ពួកគេនៅពេលដែលពួកគេបញ្ចេញមតិយោបល់តាមហ្វេសប៊ុក.. »។
ជុំវិញបញ្ហានេះ នាយកប្រតិបត្តិនៃអង្គការកម្មវិធីអភិវឌ្ឍន៍ធនធានយុវជន ហៅកាត់ថា (YRDP) លោកជាង សុខា បានផ្តល់បទសម្ភាសន៍ជាមួយអ្នកសារព័ត៌មាននៅថ្ងៃនេះថា ការចែករម្លែកព័ត៌មានតាមរយៈប្រព័ន្ធអនទ្បាញពិតជាមានសារៈសំខាន់ក្នុងការផ្តល់ព័ត៌មានទៅដល់ប្រជាពលរដ្ឋ ។
លោកជាង សុខា បន្តទៀតថា យុវជនបានដើរតួនាទីយ៉ាងសំខាន់ក្នុងការចែករំលែកព័ត៌មានតាមអនទ្បាញទៅគ្រប់ភាគីពាក់ព័ន្ធផ្សេងៗមានដូចជារាជរដ្ឋាភិបាលនិងគបក្សនយោបាយជាដើម ។ លើសពីនេះទៀតលោកបន្ថែមថា យុវជនមិនត្រូវមានក្តីកង្វល់ពីបញ្ហានេះពេកទេ មិនមានក្តីកង្វល់ដោយលោកបញ្ជាក់ថាប្រសិនបើយុជនចែករំលែកព័ត៌មានពិតប្រាកដ និងចែករំលែកព័ត៌មានប្រកបដោយក្រមសីលធម៌នោះនឹងមិនធ្វើឱ្យមានបញ្ហានោះទេ។
ទោះបីជាយ៉ាងនេះក្តីលោកក៏ទទួលស្គាល់ថា ស្ថានភាពនយោបាយបច្ចុប្បន្នអាចនឹងធ្វើឱ្យប៉ះពាលទៅដល់ការអារម្មណ៍របស់យុវជនដែលនាំឱ្យពួកគេរារែកក្នុងការចែករំលែកព័ត៌មានតាមប្រព័ន្ធអនទ្បាញ។ «បើយើងក្រទ្បែកទៅមើលនៅក្នុងក្របខណ្ឌច្បាប់វាមិនមានគួរអីព្រួយបារម្ភខ្លាំងនោះទេព្រោះកាលណាយើងប្រើប្រាស់ឈរទៅលើក្រមសីលធម៌ត្រឹមត្រូវ យើងឈរទៅលើមូលដ្ឋានច្បាប់ រាល់ព័ត៌មានដែលយើងប្រើប្រាស់សុទ្ធតែព័ត៌មានដែលមានវិទ្យាសាស្ត្រ..»។
សូមបញ្ជាក់ផងដែរថាវេទិកា ស្តីពីវិធីសាស្ត្រស្វែងរកការគាំទ្រមតិតាមរយៈយុទ្ធនាការអនទ្បាញ និងការផ្សព្វផ្សាយពីគេហទំព័រ «សំឡេងយុវជន» ធ្វើទ្បើងក្នុងគោលបំណងដើម្បីពង្រឹងនិងកសាងសមត្ថភាពយុវជនពីរបៀបប្រើប្រាស់និងបង្កើតយុទ្ធនាការអនទ្បាញតាមរយៈគេហទំព័រសំឡេងយុជន។ ក្នុងនោះដែរមានដូចជា ការកំណត់បញ្ហាជាអាទិ៍ភាព និងបង្ហាញពីរបៀបរៀបចំយុទ្ធនាការអនទ្បាញប្រកបដោយប្រសិទ្ធភាព ផ្តល់ឱកាសឱ្យយុវជនលើកទ្បើងពីបញ្ហារបស់ពួកគេនៅលើប្រព័ន្ធអេទ្បិចត្រូនិច ដើម្បីបង្កើនការយកចិត្តទុកដាក់ពីភាគីពាក់ព័ន្ធ៕
