ភ្នំពេញ៖ ឧបនាយករដ្ឋមន្ត្រីនិងជាអតីតរដ្ឋមន្ត្រីក្រសួងការបរទេសកម្ពុជា ហោ ណាំហុង បានជំរុញឱ្យអ្នកវិនិយោគគិនខេត្តយូណានប្រទេសចិន ទិញផលិតផលកសិកម្មពីកម្ពុជាឱ្យបានច្រើនថែមទៀត ខណៈដែលចិនបានទិញអង្ករពីកម្ពុជា ១សែនតោនក្នុង១ឆ្នាំហើយក៏ដោយ។ ការជំរុញរបស់លោកឧបនាយករដ្ឋមន្ត្រី ដូចនេះធ្វើទ្បើងនៅក្នុងជំនួបពិភាក្សាមួយរវាងលោកហោ ណាំហុង ជាមួយ លោកចាង បៃរូ អនុប្រធានប្រតិបត្តិនៃគណៈកម្មាធិការអចិន្ត្រៃយ៍សភាប្រជាជនខេត្តយូណាននៃប្រទេសចិនកាលព្រឹកថ្ងៃទី ២០ ខែឧសភា ឆ្នាំ ២០១៦ ម្សិលម៉ិញនេះ។
ខណៈដែលអនុប្រធានប្រតិបត្តិនៃគណៈកម្មាធិការអចិន្ត្រៃយ៍សភាប្រជាជនខេត្តយូណាននៃប្រទេសចិន លោកចាង បៃរូ (Zhang Bairu) មកធ្វើទស្សនកិច្ចនៅក្នុងប្រទេសកម្ពុជាចាប់ពីថ្ងៃទី ១៨-២១ ខែឧសភានេះ ឧបនាយករដ្ឋមន្ត្រីកម្ពុជាលោកហោ ណាំហុង បានជួបពិភាក្សាកិច្ចការមួយចំនួនជាមួយតំណាងរបស់ប្រទេសចិនរូបនេះ ដោយក្នុងជំនួបនោះដែរ លោកហោ ណាំហុង បានជម្រុញឱ្យប្រទេសចិនបន្តការទិញផលិតផលកសិកម្មកម្ពុជាឱ្យកាន់តែច្រើនថែមទៀត។
យោងតាមទំព័រហ្វេសប៊ុករបស់ឧបនាយករដ្ឋមន្ត្រីហោ ណាំហុង បានបង្ហោះកាលពីថ្ងៃទី ២០ ឧសភាម្សិលម៉ិញ បានឱ្យដឹងថា តបតាមការអញ្ជើញរបស់សម្តេចហេង សំរិន ប្រធានរដ្ឋសភាជាតិនៃព្រះរាជាណាចក្រកម្ពុជា លោក ចាង បៃរូ អនុប្រធានប្រតិបត្តិនៃគណៈកម្មាធិការអចិន្ត្រៃយ៍សភាប្រជាជនខេត្តយូណាន បានដឹកនាំគណៈប្រតិភូមកធ្វើទស្សនកិច្ចនៅព្រះរាជាណាចក្រកម្ពុជា ចាប់ពីថ្ងៃទី ១៨-២១ ខែឧសភា ឆ្នាំ ២០១៦។
ដំណើរទស្សនៈកិច្ចនេះ គោលបំណងដើម្បីអញ្ជើញឧបនាយករដ្ឋមន្ត្រីហោ ណាំហុង ទៅចូលរួមកិច្ចប្រជុំពេញអង្គនៅក្នុងប្រទេសចិន។ លោកឧបនាយករដ្ឋមន្ត្រី ក៏បានស្នើឲ្យចិនមកវិនិយោគនៅកម្ពុជាលើវិស័យទេសចរណ៍ ហេដ្ឋារចនាសម្ព័ន និងកសិឧស្សាហកម្មផងដែរ។
សូមជំរាបថា ខេត្តយូណានជាខេត្តមួយធំនៃប្រទេសចិនដែលមានប្រជាជនដល់ទៅជិត ៤៦ លាននាក់និងផលិតផលសរុបក្នុងស្រុក GDP ជាង ១៩១ ពាន់លានដុល្លាអាមេរិក ។
គូរបញ្ជាក់ផងដែរថាកិច្ចប្រជុំពេញអង្គដែលមន្ត្រីប្រទេសចិនគ្រោងនឹងអញ្ជើញលោកហោ ណាំហុង ចូលរួមនោះ មានកម្មវិធីមួយចំនួនដូចជា ការតាំងពិពណ៌ចិន-អាស៊ីខាងត្បូងលើកទី ៤ ដែលរួមទាំងពីប្រទេសអាស៊ានទាំង១០, ការតាំងពិពណ៌មុខទំនិញនាំចេញ-នាំចូលរបស់ចិន គុនមិញ លើកទី ២៤ ដែលនឹងប្រព្រឹត្តទៅពីថ្ងៃទី ១២ ដល់ថ្ងៃទី ១៧ ខែមិថុនា ឆ្នាំ២០១៦ នៅទីក្រុងគុនមិញ ខេត្តយូណាននៃប្រទេសចិន៕
