ភ្នំពេញ៖ គម្រោងកែលម្អសួនច្បារព្រះសក្យមុនីចេតីយមុខស្ថានីយរថភ្លើង ត្រូវបានមន្ទីរសាធារណការនិងដឹកជញ្ជូនរាជធានីភ្នំពេញ គ្រោងនឹងបញ្ចប់ការសាងសង់ឱ្យរួចរាល់នៅខែក្រោយនេះ ដើម្បីរៀបចំសោភ័ណភាពនិងការទាក់ទាញភ្លៀវទេសចរឱ្យមកកម្សាន្ដនៅក្នុងរាជធានីភ្នំពេញ ។ នេះបើតាមការចុះផ្សាយរបស់ទីភ្នាក់ងារសារព័ត៌មានកម្ពុជា AKP ។
យោងតាម AKP ដកស្រង់សម្តី លោក សាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ បានបញ្ជាក់ថា រហូតមកដល់ពេលនេះ ការដ្ឋានកែលម្អសួនច្បារព្រះសក្យមុនីចេតីយមុខស្ថានីយរថភ្លើងបានសម្រេចលទ្ធផល ៨៥ ភាគរយហើយ ដែលគម្រោងនឹងត្រូវបញ្ចប់ការសាងសង់នៅសល់មួយខែទៀត។
លោកបានបន្ដថា គម្រោងកែលម្អនេះ មានការកសាងអាងបាញ់ទឹកជុំវិញព្រះសក្យមុនីចេតីយ និងមានបំពាក់ដោយភ្លើង LED ព្រមទាំងរៀបកម្រាលថ្មក្រានីតរៀបចំសួនច្បារផ្កាស្មៅ ដាំដើមរំដួល និងដាក់បង់អង្គុយកម្សាន្តក្នុងគោលបំណងដើម្បីរួមចំណែកលម្អសោភ័ណភាពក្រុងឱ្យកាន់តែមានភាពស្រស់ស្អាត និងទាក់ទាញភ្ញៀវទេសចរណ៍បន្ថែមទៀត។
លោក អាង គឹមអៀង ប្រធានសមាគមទីភ្នាក់ងារទេសចរណ៍កម្ពុជា ចាត់ទុកថាការរៀបចំសួនច្បារព្រះសក្យមុនីចេតីយនិងការកែលម្អកន្លែងសំខាន់ៗនៅក្នុងរាជធានីភ្នំពេញ នឹងធ្វើឱ្យមានការទាក់ទាញភ្ញៀវទេសចរជាតិនិងអន្ដរជាតិមកកម្សាន្ដកាន់តែច្រើនបន្ថែមទៀត ពិសេសលើកកម្ពស់សោភ័ណភាពបរិស្ថាននៅក្នុងរាជធានីភ្នំពេញ។
សូមរម្លឹកថា ការដ្ឋានសាងសង់សួនច្បារព្រះសក្យមុនីចេតីយមុខស្ថានីយរថភ្លើងនេះ បានចាប់ផ្ដើមបើកការដ្ឋានសាសង់កាលពីថ្ងៃទី ០២ ខែមេសា ឆ្នាំ ២០១៦ ហើយនឹងបញ្ចប់ការសាងសង់នៅចុងខែមិថុនា ឆ្នាំ ២០១៦ ខាងមុខ៕
