ភ្នំពេញ៖ សាលាដំបូងរាជធានីភ្នំពេញ បានសម្រេចបញ្ចូនសំនុំរឿងជំនុំជម្រៈករណីលោក រ៉ុង ឈុន ដឹកនាំកម្មករតវ៉ាទាមទារប្រាក់ខែសមរម្យនៅលើផ្លូវវេងស្រេង កាលពីឆ្នាំ ២០១៤ ដែលលោក រ៉ុង ឈុន អតីតប្រធានសហជីព និងជាប្រធានសមាគមគ្រូបង្រៀនកម្ពុជាឯករាជ្យ ហើយបច្ចុប្បន្នជាសមាជិក គ ជ ប ។
នៅក្នុងលិខិតជូនដំណឹងរបស់សាលាដំបូងរាជធានីភ្នំពេញ ចុះតាំងថ្ងៃទី ២៦ ខែមេសា ឆ្នាំ២០១៦ ដែលវិទ្យុស្ត្រីទើបទទួលបានបញ្ជាក់ថា ចៅក្រមស៊ើបសួរសាលាដំបូងរាជធានីភ្នំពេញលោក សាន សុផាត បានសម្រេចបញ្ចូនសំណុំរឿងជំនុំជម្រះករណីលោក រ៉ុ ឈុន ជាជនត្រូវចោទក្នុងរឿងព្រហ្មទណ្ឌកាលគ្រានោះ លោក រ៉ុង ឈុន នៅជាប្រធានសហជីពធ្វើបាតុកម្មទារទារការដំឡើងប្រាក់ឈ្នួលកម្មករ ។
ប៉ុន្តែក្នុងលិខិតជូនដំណឹងនោះ ពុំបានបញ្ជាក់ពីពេលវេលាជាក់លាក់ថានឹងជំនុំជម្រៈនៅពេលណានោះទេ។ លោក រ៉ុង ឈុន បានបញ្ជាក់ថា លោកពិតជាទទួលបានលិខិតជូនដំណឹងនេះមែន។ លោកយល់ថា តុលាការសម្រេចបញ្ចូនសំនុំរឿងជំនុំ ជម្រះឡើងវិញនេះ គឺជាការបន្ទុចបង្អាក់ការបំពេញការងាររបស់លោកនៅក្នុងស្ថានប័ន គ.ជ.ប ។ លោក រ៉ុង ឈុន មានប្រសាសន៍ថា៖«តាមការពិតទៅនៅក្នុងសង្គមកម្ពុជាយើង យើងតែងតែឃើញ រឿងជាបន្តបន្ទាប់ហើយខុសទៅនិងនីតិវិធី គ្រាន់ធ្វើ ដើម្បីជារំខាន់ដល់ការងាររបស់យើងនោះបាទ»។
ចំណែកលោក គល់ បញ្ញា នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅថា ខុម ហ្វ្រែល មានប្រសាសន៍ថា ការសម្រេចបញ្ចូនសំនុំរឿងជំនុំជម្រះករណីលោក រ៉ុង ឈុន របស់សាលាដំបូងរាជធានីភ្នំពេញនៅពេលនេះ គឺជាការគំរាមកំហែងដល់សុវត្តិភាព និងការបំពេញភារកិច្ចរបស់លោករ៉ុងឈុននៅក្នុងស្ថាប័ន គ.ជ.ប អាចនឹងធ្វើឱ្យស្ថាប័ននេះមិនឯករាជ្យនិងអព្យាក្រឹត្យ។ លោក គល់ បញ្ញា ៖«ប៉ះពាល់សុវត្ថិភាព បង្កើតការភ័យខ្លាចដល់សមាជិកគ.ជ.ប មិនស្របទៅនិងច្បាប់គ.ជ.ប។ ច្បាប់គ.ជ.បថា នៅកំឡុងគាត់ធ្វើការសមាជិក គ.ជ.ប មិនត្រូវទទួលការបំភិតបំភ័យគម្រាមគំហែង ហើយរឿងធំគឺធានាភាពឯករាជ្យភាពរបស់គាត់»។
កាលពីឆ្នាំ ២០១៤ កន្លងទៅលោក រ៉ុង ឈុន ដែលកាលនោះលោកជាប្រធានសមាគមគ្រូបង្រៀន ត្រូវបានសាលាដំបូងរាជធានីភ្នំពេញចេញដីការហៅមកបំភ្លឺ ជុំវិញករណីលោកដឹកនាំកម្មករទាមទារប្រាក់ជូនកម្មករនៅក្នុងវិស័យកាត់ដេរសម្លៀកបំពាក់នៅកម្ពុជា។ ប៉ុន្តែសំនុំរឿងនេះ បានស្ងប់ ឬគេហៅថាព្យួរចោលបន្ទាប់ពីមានដំណោះស្រាយនយោបាយរួមគ្នានៅថ្ងៃទី ២២ កក្ដដា ៕
