ភ្នំពេញ ៖ អង្គការការពារសិទ្ធិមនុស្សក្នុងស្រុកមួយបានចេញរបាយការណ៍ ដោយសម្តែងក្តីបារម្ភអំពីចំនួនអ្នកទោសនយោបាយជាប់ពន្ធនាគារនៅក្នុងប្រទេសកម្ពុជា កាន់តែមានការកើនឡើងយ៉ាងខ្លាំង ។ តាមរបាយការណ៍របស់អង្គការនេះ គឺកម្ពុជាមានអ្នកទោសជាង២០នាក់ ។ ទោះជាយ៉ាងនេះក្ដីអ្នកវិភាគមួយចំនួន ដែលវិទ្យុស្ត្រីសុំសម្ភាសន៍ ពួកគាត់បានពិនិត្យឃើញថា ប្រជាធិបតេយ្យនៅកម្ពុជា ពិតជាដើរថយក្រោយ ឬធ្លាក់ចុះគួរឱ្យព្រួយបារម្ភពិតមែន ប៉ុន្តែមិនអាចដូចប្រទេសភូមា ព្រោះកម្ពុជាបានស្គាល់សន្តិភាពមកដល់ពេលនេះ គឺដោយសារតែសហគមន៍អន្តរជាតិ ។ ប៉ុន្តែមន្ត្រីរដ្ឋាភិបាលបដិសេធការលើកឡើងដែល ថាប្រជាធិបតេយ្យ ជួបគ្រោះថ្នាក់ ។ លោក ធូ វីរៈ លម្អិតព័ត៌មាននេះ ៖
តាមរបាយការណ៍ អង្គការការពារសិទ្ធិមនុស្សលីកាដូ (LICADHO) បញ្ជាក់ថា ចាប់តាំងពីខែឧសភា ឆ្នាំ២០១៥ រហូតមកដល់ពេលនេះ ចំនួនអ្នកទោសនយោបាយដែលបានជាប់ពន្ធនាគារនៅក្នុងប្រទេសកម្ពុជា កាន់តែមានការកើនឡើងយ៉ាងខ្លាំង ។
តាមរបាយការណ៍ លីកាដូ ជាក់ស្តែងសមាជិកព្រឹទ្ធសភា និងតំណាងរាស្ត្រគណបក្សសង្គ្រោះជាតិ អ្នកធ្វើយុទ្ធនាការផ្នែកបរិស្ថាន ព្រះសង្ឃ សិស្សនិស្សិត សកម្មជន និងអ្នកធ្វើការងារផ្នែកសិទិ្ធមនុស្សកំពុងជាប់ពន្ធនាគារ ដោយហេតុផលនយោបាយជាង២០នាក់ ។
បើនិយាយពីចំនួនអ្នកទោស នយោបាយ គឺគេត្រូវពិនិត្យឡើងវិញ ប្រទេសភូមា នៅក្នុងតំបន់ អាស៊ីអាគ្នេយ៌ជាមួយកម្ពុជាដែរនេះ ។ ប្រទេសនេះក្រោមការដឹកនាំដោយរបបយោធាអតីតប្រធានាធិបតី ថេន សេន បានដាក់គុកអ្នកទោសនយោបាយប្រមាណ៣ពាន់នាក់ ប៉ុន្តែពួកគេត្រូវបានដោះលែងវិញ ក្រោយពីមានប្រធានាធិបតីថ្មីដែលជាប់ឆ្នោត ។
ប្រហែលភ័យខ្លាចដូចប្រទេសភូមានេះហើយ បានជាអង្គការការពារសិទ្ធិមនុស្សលីកាដូ (LICADHO) សម្តែងក្តីបារម្ភអំពីចំនួនអ្នកទោសនយោបាយនៅកម្ពុជាកាន់តែកើនឡើង ។ តែបែបនេះក្ដី ក្រុមអ្នកវិភាគលើកឡើងប្រហាក់ប្រហែលគ្នាថា ប្រទេសកម្ពុជាមិនអាចដើរលើផ្លូវលំនាំតាម ប្រទេសភូមា ឬមីយ៉ានម៉ាដូចពេលអតីតកាលេរបស់ប្រទេសនេះឡើយ ។
សាស្ត្រចារ្យវិទ្យាសាស្ត្រនយោបាយ លោក សូ ចន្ថា មានសុទិដ្ឋិនិយមថា គ្មានសញ្ញាអាសន្នណាមួយដែលបញ្ជាក់ថា ដំណើរការដឹកនាំប្រទេសកម្ពុជា តាំងពីឆ្នាំ១៩៩៣ រហូតមកដល់ពេលបច្ចុប្បន្ននេះ ធ្វើដំណើរតាមកន្លងផ្លូវនៃប្រទេសភូមា ឬមីយ៉ានម៉ា ដែលដឹកនាំដោយរបបយោធាឡើយ ប៉ុន្តែអ្នកវិភាគរូបនេះ បញ្ជាក់ថា នេះជាបរិបទនយោបាយថ្មីមួយ ដែលរុញដំណើរការលិទ្ធិប្រជាធិបតេយ្យនៅកម្ពុជាកំពុងដើរលើផ្លូវខុសប៉ុណ្ណោះ ។
ចំណែកលោក បណ្ឌិត ចាន់ វិបុល អ្នកសិក្សាពីអភិបាលកិច្ចល្អ និងលទ្ធិប្រជាធិបតេយ្យ បានមានប្រសាសន៍ថា លោកពុំទាន់ឃើញសញ្ញាណណាមួយវិវត្តន៍ស្ថានភាពនយោបាយកម្ពុជាទៅរករបបយោធានិយមដូចប្រទេសភូមា ឬ មីយ៉ាន់ម៉ាទេ ។ ប៉ុន្តែលោកថា កម្តៅនយោបាយបច្ចុប្បន្ន បង្ហាញពីទិដ្ឋភាពនយោបាយបែបរក្សាអំណាច និងការដឹកនាំនយោបាយបែបចាស់កម្រិលប៉ុណ្ណោះ ។
លោក បណ្ឌិត ចាន់ វិបុល និយាយថា ៖ «ខ្ញុំនៅតែមានសុទិដ្ឋនិយមសម្រាប់សង្គមកម្ពុជារបស់ខ្ញុំថា អ្វីដែលយើងចង់ឃើញនៅឆ្នាំ ២០១៧ ២០១៨ គឺចង់ឃើញមេដឹកនាំម្នាក់ថ្មីមួយ អាចធានាថាលិទ្ធិប្រជាធិបតេយ្យនៅកម្ពុជា ត្រូវបានស្តារឡើងវិញ ពីព្រោះខ្ញុំបានឃើញថាលិទ្ធិប្រជាធិបតេយ្យក្នុងពេលបច្ចប្បន្ននេះកំពុងវិវត្តន៍ទៅរកផ្លូវអាក្រក់មួយធំបំផុត ហើយសម្រាប់សង្គមកម្ពុជា» ។
យ៉ាងណាក៏ដោយអ្នកវិភាគគិតថា ប្រទេសខុសភូមាត្រង់ កម្ពុជាមានសន្តិភាព មានការអភិវឌ្ឍន៍ មកទល់ពេលនេះ គឺដោយសារតែ សហគមន៍អន្តរជាតិជួយ ជ្រុំជ្រែងផងដែរ ។
ជុំវិញរបាយការណ៍អង្គការលីការដូរបង្ហាញថា អ្នកទោសនយោបាយមានការកើនឡើងនេះ មន្ត្រីរដ្ឋាភិបាលបានច្រាន់ចោលរបាយការណ៍នេះ ដោយចាត់ទុកថាមិនត្រឹមត្រូវនិងមានលក្ខណៈប្រឆាំងរដ្ឋាភិបាល ។ លោក ក៏មិនយល់ស្រប ការលើករបស់ក្រុមអ្នកវិភាគដែលថាលិទ្ធិប្រជាធិបតេយ្យនៅកម្ពុជាកំពុងដើរលើផ្លូវខុសដែរ ។
តែបែបនេះក្ដីអ្នកវិភាគទាំងពីរខាងលើនេះ បានផ្តល់អនុសាសន៍ថា ដើម្បីឲ្យកម្បុជាធ្វើដំណើរលើកន្លងលិទ្ធិប្រជាធិបតេយ្យត្រឹមត្រូវពិតប្រាកដ គឺរាជរដ្ឋាភិបាលត្រូវគោរសិទ្ធិមនុស្ស សិទ្ធិសេរីភាពសម្តែងមតិ កែទម្រង់ប្រព័ន្ធយុត្តិធម៌ និងរាជរដ្ឋាភិបាលត្រូវស្វែងរកបេក្ខជននាយករដ្ឋមន្ត្រីថ្មីដែលអាចធានាភាពសុខសាន្តនៃលិទ្ធិប្រជាធិបតេយ្យឡើងវិញ ៕
