ភ្នំពេញ ៖ គិតត្រឹមថ្ងៃទី១៨ខែឧសភា ឆ្នាំ២០១៦ នេះដំណើរការជួសជុលឡើងវិញនូវទំនប់អាងទឹកតាកុយ ស្ថិតនៅក្នុងឃុំព្រៃគ្រី ស្រុកជលគិរី ខេត្តកំពង់ឆ្នាំង សម្រេចលទ្ធផលបានប្រមាណ ៩០ ភាគរយហើយ ។ នេះបើយោងតាមការចុះផ្សាយនៅលើទំព័រហ្វេសប៊ុកផ្លូវរបស់ក្រសួងធនធានទឹក និងឧតុនិយម ។
ទំនប់អាងទឹកតាកុយ ត្រូវបានក្រសួងធនធានទឹក និងឧតុនិយម បើកការដ្ឋានជួសជុលឡើងវិញ កាលពីថ្ងៃទី០១ខែកុម្ភៈ ឆ្នាំ២០១៦ ដោយមានទំហំការងារ ៖ ជួសជុលទំនប់អាងទឹក ប្រវែង ១.០៥០ ម៉ែត្រ, សាងសង់សំណង់បេតុងតួទំនប់ ប្រវែង ១.០៥០ ម៉ែត្រ, បេតុងជើងទេរ ប្រវែង ១.៧៧០ ម៉ែត្រ ។
ការដ្ឋាននេះ គ្រោងនឹងបញ្ចប់នៅអំឡុងខែមិថុនា ឆ្នាំ ២០១៦ ខាងមុខ ។
ក្រោយពេលជួសជុលរួច អាងទឹកតាកុយ នឹងមានលទ្ធភាពស្តុកទឹកបានប្រមាណ ៩.០០០.០០០ ម៉ែត្រគូប សម្រាប់បម្រើឱ្យការស្រោចស្រពលើផ្ទៃដីដំណាំស្រូវប្រាំង ចំនួន ៨៦០ ហិកតា និងដំណាំរួមផ្សំ ចំនួន ២០ ហិកតា ៕
