ភ្នំពេញ ៖ សាលាឧទ្ធរណ៍សម្រេចទាត់ចោលសំណើសុំនៅក្រៅឃុំរបស់លោក អ៊ុំ សំអាន តំណាងរាស្ត្រគណបក្សសង្គ្រោះជាតិ ដែលត្រូវបានអាជ្ញាធរចាប់ឃុំខ្លួនពីបទបង្កការ ញុះញង់ពាក់ព័ន្ធនឹងបញ្ហាព្រំដែនជាមួយប្រទេសវៀតណាម ។ មេធាវីការពារក្តីលោក អ៊ុំ សំអាន សម្តែងការខកចិត្តចំពោះការសម្រេច របស់ឧទ្ធរណ៍ថា មិនសមហេតុផល និងហៅការចាប់ខ្លួនកូនក្តីលោកថាបានរំលោភទៅនិងរដ្ឋធម្មនុញ្ញ ។ តែបែបនេះក្ដីសកម្មជន ព្រំដែនរូបនេះ សង្ឃឹមថាលោកនឹងត្រូវបាន ដោះលែង មានសេរីភាព តាមរយៈការសម្របសម្រួល នយោបាយ ។ លោក ធូ វិរៈ រាយការណ៍ព័ត៌មាននេះ ៖
ដោយទឹកមុខ រឹងមាំ ទោះបីដៃជាប់ខ្នោះ និងត្រូវគេ ឱ្យស្លៀកពាក់អាវពណ៌ស្លាទុំ ជាអាវអ្នកទោស លោកអ៊ុំសំអាន នៅចាត់ទុករឿងរបស់លោក ជាបញ្ហានយោបាយ ដែលលោកថាលោកអាចនឹងត្រូវដោះលែង ឱ្យមានសេរីភាពឡើងវិញ ។ លោកបានឆ្លើយ ដូចនេះនៅពេលលោកត្រូវបានសមត្ថកិច្ចនាំខ្លួន ចូលរថយន្ត ត្រឡប់ទៅកាន់ពន្ធនាគារព្រៃសវិញ បន្ទាប់ពីលោកចូលសវនាការសុំនៅក្រៅឃុំហើយត្រូវបានបដិសេធ ។
លោក អ៊ុំ សំអាន ៖« តើឯកត្តមមានសង្ឃឹមទេថា បើមានការសម្របសម្រួលផ្នែកនយោបាយ ធ្វើឲ្យឯកឧត្តមអាចនៅក្រៅឃុំបានទេ? ខ្ញុំសង្ឃឹមថាអញ្ចឹង» ។
តែបែបនេះក្ដី លោកបានហៅការចាប់ខ្លួន គឺជាការរំលោភអភ័ឯកសិទ្ធិរបស់លោកត្រង់មាត្រា ៨០ នៃរដ្ឋធម្មនុញ្ញ ដែលធានាការពារតំណាងរាស្ត្រ ពីការចាប់ចងណាមួយ ដែលមិនមែនជាបទឧក្រិដ្ឋជាក់ស្តែង ។
លោក អ៊ុំ សំអាន ៖ «អ្នកតំណាងរាស្ត្រមានអភ័យឯកសិទ្ធិ ហើយសភាបានអនុម័ត ៥០+១ ដែលបានរំលោភមាត្រ៨០ នៃរដ្ឋធម្មនុញ្ញ»។ ប៉ុនយ៉ាងណាក៏ដោយ លោក ហ៊ុន សែនក៏បានរំលោភទៅលើមាត្រា៨០ នៃរដ្ឋធម្មនុញ្ញដែរ» ។
កាលពីព្រឹកមិញនេះសភាស៊ើបសួរនៃសាលាឧទ្ធរណ៍បានបើកសវនាការ អស់រយៈពេលជិត៣ម៉ោង នៅព្រឹកថ្ងៃទី១៧ខែឧសភាឆ្នាំ២០១៦នេះ បានសម្រេចបដិសេធសំណើរសុំនៅក្រៅឃុំ របស់លោក អ៊ុំ សំអាន ក្រោមហេតុផលថា ការស៊ើបអង្កេតរបស់សាលាដំបូងរាជធានីភ្នំពេញ នៅមិនទាន់បញ្ចប់នីតិវិធី និងខ្លាច លោក អ៊ុំ សំអាន បង្កភាពវឹកវរក្នុងសង្គមជាតិ ។
ប៉ុន្តែហេតុផលនេះ លោក ជួង ជូងី មេធាវីការពារក្តីលោក អ៊ុំ សំអាន បានចាត់ទុកថា ជាការបកស្រាយមួយ មិនសមហេតុផល ។ លោកបន្តថា កូនក្តីរបស់លោកជាតំណាងរាស្ត្រមានអភ័យឯកសិទ្ធិ និងធានាមិនគេចវេសពីនីតិវិធីរបស់តុលាការឡើយ ។
ជាការកត់សម្គាល់ សវនាការ លោក អ៊ុំ សំអាន សុំនៅក្រៅឃុំនៅសាលាឧទ្ធរណ៍ព្រឹកមិញនេះ គឺគ្មានវត្តមានតំណាងរាស្ត្រមកពីគណបក្សប្រឆាំង ឬសង្គមស៊ីវិលកាពារសិទ្ធិមនុស្សណាទៅឃ្លាំមើលដំណើរការរបស់សភាស៊ើបសួរនៃសាលាឧទ្ធរណ៍ឡើយ ប៉ុន្តែមានអ្នកគាំទ្រប្រមាណ១០នាក់ប៉ុណ្ណោះ ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានហៅការចាប់ខ្លួនអ្នកតំណាងរាស្ត្រមកពីគណបក្សសង្គ្រោះជាតិទាំងនៅមានអភ័យឯកសិទ្ធិគឺ ជាទង្វើខុសទៅច្បាប់ និងរដ្ឋធម្មនុញ្ញយ៉ាងពិតប្រាកដ ។
លោក យឹម សុវណ្ណ មានប្រសាសន៍ថា៖«គឺច្បាស់ណាស់ការឃាត់ខ្លួនអ្នកតំណាងរាស្ត្រ កន្លងមកចាប់សមាជិកព្រឹទ្ធសភាគឺជា ទង្វើខុសច្បាប់ ខុសរដ្ឋធម្មនុញ្ញគឺចាប់ខ្លួនអ្នកតំណាងរាស្ត្រកំពុងមានអភ័យឯកសិទ្ធិ សូម្បីតែអគ្គលេខាធិការរដ្ឋសភាក៏បានបញ្ជាក់ថាមានអភ័យឯកសិទ្ធិ ប៉ុន្តែចាប់គេដាក់គុក គ្រាន់តែពាក្យថាមានអភ័យឯកសិទ្ធិមួយនិងចាប់ដាក់ទៅពន្ធនាគារវាខុសបាត់ទៅហើយ» ។
ទោះបីយ៉ាងនេះក្តី គណបក្សប្រជាជនកម្ពុជាបានចាត់ទុកថា ករណី លោក អ៊ុំ សំអាន តំណាងរាស្ត្រនៃគណបក្សជំទាស់ បានបង្ហោះផែនទីក្លែងក្លាយ នឹងករណីសន្ធិសញ្ញាព្រំដែនជាមួយប្រទេសវៀតណាម នៅលើទំព័រហ្វេសប៊ុករបស់លោកតាំង ឆ្នាំ ២០១៥ថា ជាបទល្មើសជាក់ស្តែង ត្រូវចាប់ខ្លួនដោយមិនបាច់ដកអភ័យឯកសិទ្ធិជាមុនឡើយ ។
បន្ទាប់ពីបរាជ័យក្នុងការស្នើសុំនៅក្រៅឃុំ លោក ជួង ជូងី មេធាវីការពារក្តីលោក អ៊ុំ សំអាន គ្រោងដាក់លិខិតស្នើទៅតុលាការកំពូលបន្តទៀត ដើម្បីប្តឹងសារទុក្ខសេចក្តីសម្រេចរបស់សាលាឧទ្ធរណ៍ ។
លោក អ៊ុំ សំអាន ត្រូវបានចាប់ខ្លួនកាលពីយប់ថ្ងៃទី១០មេសា នៅខេត្តសៀមរាប គឺភ្លាមៗបន្ទាប់ពីលោកបានចុះពីលើយន្តហោះមកពីសហរដ្ឋអាមេរិក ។ លោកត្រូវបានចោទដោយអាជ្ញាធររដ្ឋកម្ពុជា ពីបទក្លែងឯកសារដែលលោកបានបង្ហោះផែនទីកម្ពុជា លើទំព័រហ្វេសប៊ុក ដោយចោទរដ្ឋាភិបាលថា ប្រើប្រាស់ផែនទីក្លែងក្លាយក្នុងការបោះបង្គោលព្រំដែនជាមួយវៀតណាម ។ ករណីនេះនាំឱ្យរដ្ឋាភិបាលចោទលោកមួយករណីទៀត បីបទញុះញង់ឱ្យមានការរើសអើស ។
ករណីរបស់លោក អ៊ុំ សំអាន ត្រូវបានអ្នកច្បាប់មួយចំនួនអះអាងថា អាជ្ញាធរបានរំលោភលើរដ្ឋធម្មនុញ្ញមាត្រា៨០ ដែលការពារតំណាងរាស្ត្រឱ្យរួចផុតពីការចាប់ចង និងចោទប្រកាន់ ។ ជាមួយគ្នានេះ គណបក្សសង្គ្រោះជាតិ បានថ្កោលទោសយ៉ាងខ្លាំង ចំពោះការចាប់ខ្លួនតំណាងរាស្ត្រ ដោយមិនទាន់បានដកអភ័យឯកសិទ្ធិនៅឡើយនេះ ។
ករណីបញ្ហាព្រំដែនជាមួយប្រទេសវៀតណាមនេះ សមាជិកព្រឹទ្ធសភាម្នាក់ពីគណបក្ស សម រង្ស៊ី គឺលោក ហុង សុខហួរ ក៏ត្រូវបានចាប់ខ្លួន និង ចោទប្រកាន់ដូចលោក អ៊ុំ សំអាននេះដែរ ៕
