ភ្នំពេញ៖ សំណើសុំនៅក្រៅឃុំរបស់លោក អ៊ុំ សំអាន តំណាងរាស្ត្រគណបក្សសង្គ្រោះជាតិ ត្រូវបានសាលាឧទ្ធរណ៍សម្រេចទាត់ចោលហើយ បន្ទាប់ពីសភាស៊ើបសួរសាលាឧទ្ធរណ៍បានបើកសវនាការអស់រយៈពេលជិត៣ម៉ោង នៅព្រឹកថ្ងៃទី ១៧ខែឧសភាឆ្នាំ២០១៦នេះ ។
ការសម្រេចបដិសេធរបស់សាលាឧទ្ធរណ៍នេះ ដោយសំអាងហេតុផលថា សំនុំរឿងរបស់លោក អ៊ុំ សំអាន មិនទាន់បញ្ចប់នីតិវិធីស៊ើបអង្កេតនៅសាលាដំបូង និងខ្លាចលោក អ៊ុំ សំអាន បង្កភាពវឹកវរក្នុងសង្គមជាតិពេលនៅក្រៅឃុំ ។ តំណាងរាស្ត្រមណ្ឌលសៀមរាបមកពីគណបក្សសង្គ្រោះជាតិ លោក អ៊ុំ សំអាន សម្តែងការខកចិត្តយ៉ាងខ្លាំង នៅពេលដែលដើរចេញពីបន្ទប់សវនាការ ខណៈសាលាឧទ្ធរណ៍សម្រេចទាត់ចោលសំណើសុំនៅក្រៅឃុំរបស់លោក ។
លោក អ៊ុំ សំអាន ដែលគេដឹងថាជាតំណាងរាស្ត្រសកម្មខាងកិច្ចការព្រំដែន បានថ្លែងទៅកាន់អ្នកសារព័ត៌មាន ក្រោយបញ្ចប់សវនាការនៃសាលាឧទ្ធរណ៍ថា ការសម្រេចនេះគឺបានរំលោភលើមាត្រា៨០ នៃរដ្ឋធម្មនុញ្ញ ដែលធានាការពារតំណាងរាស្ត្រ ពីការចាប់ចងណាមួយ ដែលមិនមែនជាបទឧក្រិដ្ឋជាក់ស្តែង ។
សាលាឧទ្ធរណ៍បានសម្រេចបដិសេធសំណើសុំនៅក្រៅឃុំរបស់លោក អ៊ុំ សំអាន ដោយសំអាងហេតុផលចំនួន២៖ ទី១ ដោយសំនុំរឿងរបស់លោក អ៊ុំ សំអាន នៅមិនទាន់បញ្ចប់ការស៊ើបអង្កេតរួចរាល់នៅសាលាដំបូងរាជធានីភ្នំពេញ, និង ទី២ គឺសាលាឧទ្ធរណ៍ព្រួយបារម្ភចំពោះលោក អ៊ុំ សំអាន ខ្លាចលោកបង្កអសន្តិសុខជាតិ និងអស្ថេរភាពជាតិជាថ្មី នៅពេលអនុញ្ញាតឱ្យលោកនៅក្រៅឃុំ ។
មេធាវីការពារក្តីលោក អ៊ុំ សំអាន គឺ ជួង ជូងី បញ្ជាក់ថា ហេតុផលរបស់សភាស៊ើបសួរសាលាឧទ្ធរណ៍ទាំងពីរ គឺជាលេសនយោបាយ ដែលការប្រការនេះលោកថា មិនសមហេតុផលនោះទេ ។ លោកបន្តថា កូនក្តីរបស់លោកជាតំណាងរាស្ត្រមានអភ័យឯកសិទ្ធិ និងធានាមិនគេចវេសពីនីតិវិធីរបស់តុលាការនោះឡើយ ។
សូមជំរាបថាលោក អ៊ុំ សំអាន ត្រូវបានចាប់ខ្លួនកាលពីយប់ថ្ងៃទី១០មេសា នៅខេត្តសៀមរាប គឺភ្លាមៗបន្ទាប់ពីលោកបានចុះពីលើយន្តហោះមកពីសហរដ្ឋអាមេរិក ។ លោកត្រូវបានចោទដោយអាជ្ញាធររដ្ឋកម្ពុជា ពីបទក្លែងឯកសារដែលលោកបានបង្ហោះផែនទីកម្ពុជា លើទំព័រហ្វេសប៊ុក ដោយចោទរដ្ឋាភិបាលថា ប្រើប្រាស់ផែនទីក្លែងក្លាយក្នុងការបោះបង្គោលព្រំដែនជាមួយវៀតណាម។ ករណីនេះនាំឱ្យរដ្ឋាភិបាលចោទលោកមួយករណីទៀត បីបទញុះញង់ឱ្យមានការរើសអើស។
ករណីរបស់លោក អ៊ុំ សំអាន ត្រូវបានអ្នកច្បាប់មួយចំនួនអះអាងថា អាជ្ញាធរបានរំលោភលើរដ្ឋធម្មនុញ្ញមាត្រា៨០ ដែលការពារតំណាងរាស្ត្រឱ្យរួចផុតពីការចាប់ចង និងចោទប្រកាន់។ ជាមួយគ្នានេះ គណបក្សសង្គ្រោះជាតិ បានថ្កោលទោសយ៉ាងខ្លាំង ចំពោះការចាប់ខ្លួនតំណាងរាស្ត្រ ដោយមិនទាន់បានដកអភ័យឯកសិទ្ធិនៅឡើយនេះ។
ករណីបញ្ហាព្រំដែនជាមួយប្រទេសវៀតណាមនេះ សមាជិកព្រឹទ្ធសភាម្នាក់ពីគណបក្ស សម រង្ស៊ី គឺលោក ហុង សុខហួរ ក៏ត្រូវបានចាប់ខ្លួន និង ចោទប្រកាន់ដូចលោក អ៊ុំ សំអាននេះដែរ ៕
