ភ្នំពេញ ៖ តំណាងរាស្ត្របក្សប្រឆាំងម្នាក់ ដែលត្រូវបានសមត្ថកិច្ច ចាប់ឃុំខ្លួនករណីបង្ហោះផែនទីក្លែងក្លាយ និងករណីសន្ធិសញ្ញាព្រំដែនជាមួយប្រទេសវៀតណាម មានសង្ឃឹមថាតុលាការសាលាឧទ្ធរណ៍នឹងអនុញ្ញាតឱ្យនៅក្រៅឃុំនៅពេលបញ្ចប់សវនាការនៅថ្ងៃអង្គារនេះ ។
លោក អ៊ុំ សំអាន តំណាងរាស្ត្រមណ្ឌលខេត្តសៀមរាប របស់គណបក្សសង្គ្រោះជាតិ ដែលសកម្មខាងកិច្ចការព្រំដែន បានថ្លែងបែបនេះទៅកាន់អ្នកសារព័ត៌មាន មុនពេលលោកដើរចូលបន្ទប់សវនាការនៃសាលាឧទ្ធរណ៍ ដោយដៃទាំងគូរបស់លោកជាប់ខ្នោះ ។ លោក អ៊ុំ សំអាន បានបញ្ជាក់ប្រាប់ថា ការចាប់ខ្លួនលោកគឺជាការបំពានលើរដ្ឋធម្មនុញ្ញមាត្រា៨០ ដែលធានាការពារអ្នកតំណាងរាស្ត្រ ពីការចាប់ចងណាមួយដែលមិនមែនជាបទឧក្រិដ្ឋជាក់ស្តែង ។ តំណាងរាស្ត្ររូបនេះបានបញ្ជាក់ទៀតថា បើយោងតាមអំណាចនៃរដ្ឋធម្មនុញ្ញ គឺលោកនឹងត្រូវបានអនុញ្ញាតឱ្យនៅក្រៅឃុំ ។
សូមជំរាបថាលោក អ៊ុំ សំអាន ត្រូវបានចាប់ខ្លួនកាលពីយប់ថ្ងៃទី១០ខែមេសា នៅខេត្តសៀមរាប គឺភ្លាមៗ បន្ទាប់ពីលោកបានចុះពីយន្តហោះមកពីសហរដ្ឋអាមេរិក ។ លោកត្រូវបានចោទដោយអាជ្ញាធរកម្ពុជា ពីបទក្លែងឯកសារ ដែលលោកបានបង្ហោះផែនទីកម្ពុជា លើទំព័រហ្វេសប៊ុកផ្លូវការរបស់លោក ដោយចោទរដ្ឋាភិបាលថា ប្រើប្រាស់ដែនទីក្លែងក្លាយក្នុងការបោះបង្គោលព្រំដែនជាមួយវៀតណាម ។ ករណីនេះនាំឱ្យរដ្ឋាភិបាលចោទលោកមួយករណីទៀត ពីបទញុះញង់ឱ្យមានការរើសអើស ។
ករណីរបស់លោក អ៊ុំ សំអាន ត្រូវបានអ្នកច្បាប់មួយចំនួនអះអាងថា អាជ្ញាធរបានរំលោភលើរដ្ឋធម្មនុញ្ញមាត្រា៨០ ដែលការពារតំណាងរាស្ត្រឱ្យរួចផុតពីការចាប់ចង និងការចោទប្រកាន់ ។ ជាមួយគ្នានេះ គណបក្សសង្គ្រោះជាតិ បានថ្កោលទោសយ៉ាងខ្លាំង ចំពោះការចាប់ខ្លួនអ្នកតំណាង ដោយមិនទាន់បានដកអភ័យឯកសិទ្ធិនៅឡើយ ។
ជុំវិញ ករណីព្រំដែនជាមួយប្រទេសវៀតណាមនេះ សមាជិកព្រឹទ្ធសភាម្នាក់មកពីគណបក្ស សម រង្ស៊ី គឺលោក ហុង សុខហួរ ក៏ត្រូវបានចាប់ខ្លួន និងចោទប្រកាន់ដូចលោក អ៊ុំ សំអាន នេះដែរ ៕
