ភ្នំពេញ៖ រដ្ឋមន្ត្រីក្រសួងមហាផ្ទៃទទូចឱ្យមន្ត្រីទាំងអស់បង្កើនយុត្តិធម៌សង្គម ដើម្បីឱ្យពលរដ្ឋទទួលយកបាន ទើបគ្មានបដិវត្តន៍ពណ៌។ ការថ្លែងរបស់សម្តេចក្រឡាហោម ស ខេង បានធ្វើឡើងក្នុងឱកាសខួបអនុស្សាវរីយ៍លើកទី ៧១ នៃថ្ងៃកំណើតនគរបាលជាតិកម្ពុជា នាទីស្តីការក្រសួងមហាផ្ទៃ នៅថ្ងៃចន្ទទី ១៦ ឧសភានេះ។
ការថ្លែងពីបដិវត្តន៍ពណ៌របស់រដ្ឋមន្ត្រីមហាផ្ទៃ ធ្វើឡើងជាការឆ្លើយថ្មីទៀត ចំពោះសកម្មជនដីធ្លីមួយចំនួន បានស្លៀកពាក់ខ្មៅនៅថ្ងៃចន្ទនេះ ដើម្បីទាមទារឱ្យមានការដោះលែងមន្ត្រីអាដហុក ០៤ នាក់ និងសង្គមស៊ីវិលម្នាក់ដែលត្រូវបានឃុំខ្លួនពាក់ព័ន្ធនឹងការស៊ូកប៉ាន់សាក្សីករណីកញ្ញា ស្រីមុំ ។
សម្តេច ស ខេង បានបញ្ជាក់ថា ៖ «បដិវត្តន៍ពណ៌ ឬ បដិវត្តន៍ប្រជាជនអាចនឹងកើតមាននោះ គឺដោយសារមានភាពអសកម្មរបស់សមត្ថកិច្ច ។ បើការគ្រប់គ្រងការដឹកនាំរបស់សមត្ថកិច្ច មិនបានល្អទេ វានឹងធ្វើឱ្យមានបដិវត្តពណ៌ហើយបើធ្វើល្អគឺគ្មានអ្វីកើតឡើងទេ»។
សម្តេចរដ្ឋមន្ត្រីមហាផ្ទៃក៏បានជំរុញឱ្យមន្ត្រីសមត្ថកិច្ច ទទួលយកការទិតៀនទាំងឡាយណា ដែលមានភាពត្រឹមត្រូវនិងសមហេតុផល ។
ក្រុមអ្នកវិភាគដែលវិទ្យុស្ត្រីសុំការពន្យល់អំពីបដិវត្តន៍កើតឡើងដោយសារអ្វី ។ ក្រុមអ្នកវិភាគនិយាយថា បដិវត្តន៍ឬបដិវត្តន៍ប្រជាជន កើតឡើងនៅកាលៈទេសៈណាដែលពួកគេ មិនទទួលយកអំពើអ្វីមួយពីការដឹកនាំ ឬពួកគេគិតថា គឺជាអំពើអយុត្តិធម៌ហួសហេតុ ឬមួយសង្គមមួយមានតែការជិះជាន់គាបសង្កត់អ្នកទន់ខ្សោយ ៕
