ភ្នំពេញ៖ សម្តេច ហ៊ុន សែន នាយករដ្ឋមន្ត្រីនៃកម្ពជាបានប្រកាសគោរពជនរួមជាតិមួយរយៈខ្លី ចាប់ពីថ្ងៃទី ១៦ ឧសភា ដែលលោកត្រូវទៅកានប្រទេសរស្ស៊ី ក្នុងដំណើរចូលរួមកិច្ចប្រជុំកំពូលអាស៊ាន-រុស្ស៊ី។ តាមប្រភពព័ត៌មាន សម្ដេច ហ៊ុន សែន និងប្រតិភូកម្ពុជាត្រូវទៅកាន់ ក្រុងម៉ូស្គូ នៅយប់ថ្ងៃទី ១៦ ឧសភា នៅម៉ោង ៩ និង ៣០ នាទី។
សេចក្តីជូនដំណឹងរបស់ក្រសួងការបរទេសកម្ពុជា បានឲ្យដឹងថា សម្តេចនាយករដ្ឋមន្ត្រីនឹងចាប់ផ្តើមចូលរួមកិច្ចប្រជុំកំពូលរំលឹកខួបអាស៊ាន-រុស្ស៊ី នៅទីក្រុងម៉ូស្គូនិងទីក្រុងសូឈី ពីថ្ងៃទី ១៧ ដល់ថ្ងៃទី ២១ ខែឧសភា ឆ្នាំ ២០១៦។
ក្រសួងការបរទេសកម្ពុជា បញ្ជាក់ថា នៅពេលទស្សនកិច្ចនេះ សម្តេច ហ៊ុន សែន នឹងជួបពិភាក្សាការងារជាមួយលោកប្រធានាធិបតីរុស្ស៊ី វ្លាឌីមៀរ ពូទីន និងជួបចរចាទ្វេភាគីជាមួយនាយករដ្ឋមន្ត្រីរបស់ប្រទេសនេះផងដែរ។
ទន្ទឹមនឹងនោះមានឯកសារសំខាន់ៗមួយចំនួន នឹងត្រូវចុះហត្ថលេខា ដើម្បីពង្រឹងនិងពង្រីកនូវកិច្ចសហប្រតិបត្តិការរវាងកម្ពុជានិងរុស្ស៊ី។ គណៈប្រតិភូអមដំណើរសម្ដេចនាយករដ្ឋមន្ត្រីមាន លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា និងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងសមាជិករាជរដ្ឋាភិបាលកម្ពុជាដទៃទៀត។
សម្ដេចនាយកករដ្ឋមន្ត្រីបញ្ជាក់លើ Facebook ថា៖ « នេះជាដំណើរទស្សនកិច្ចដើម្បីពង្រឹងចំណងទាក់ទងរវាងប្រទេសទាំងពីរផង និងចូលរួមប្រជុំកិច្ចប្រជុំកំពូលរំលឹកខួប ២០ ឆ្នាំនៃទំនាក់ទំនងរវាងអាស៊ាននិងរុស្ស៊ីផង»។
កម្ពុជានិងរុស្ស៊ីមានទំនាក់ទំនងជិតស្និទ្ធនឹងគ្នាតាំងពីសម័យសង្គមរាស្ត្រនិយម ។ ប្រទេសមហាអំណាចនេះ បានផ្ដល់សមិទ្ធផលមួយចំនូននៅកម្ពុជាដូចជាមន្ទីរពេទ្យរុស្ស៊ីជាដើម ។ ស្ថានទូតប្រទេសនេះមានទំហំធំមួយដែរបើប្រៀបធៀបជាមួយស្ថានទូតអាមេរិក និងស្ថានទូតចិន នៅរាជធានីភ្នំពេញ៕
