ភ្នំពេញ៖ សាក្សីម្នាក់បាននិយាយប្រាប់វិទ្យុស្ត្រីថា មនុស្ស ០៥ នាក់ត្រូវបានសមត្ថកិច្ចនាំខ្លួនមកកាន់អធិការដ្ឋានខណ្ឌទួលគោកកាលពីម៉ោងប្រហែលជាង ៨ព្រឹក ដោយចាប់ខ្លួនពួកគាត់ នៅម្ដុំចេនឡាផ្សារដើមគ ខណៈពួកគេស្លៀកពាក់ឈុតខ្មៅ នៅថ្ងៃចន្ទទី ១៦ ឧសភានេះ។ សាក្សីរូបនេះគឺជាអ្នកសារព័ត៌មាន បានអះអាងថាមនុស្សទាំង ០៥ រូបនេះមកពីសហគមន៍បុរីកីឡា។
តាមគម្រោងថ្ងៃចន្ទនេះត្រូវគេហៅថា «ថ្ងៃចន្ទពណ៌ខ្មៅ» ជាទិវាដែលក្រុមសង្គមស៊ីវិល និងសហគមន៍មួយចំនួនកំណត់ថាជាទិវាសម្រាប់ពាក់ឈុតខ្មៅដើម្បីជាសញ្ញានៃការទាមទារឱ្យដោះលែងមន្ត្រីសិទ្ធមនុស្សអាដហុក ០៤ រូប និងមន្ត្រីគ.ជ.ប ម្នាក់ដែលកំពុងជាប់ឃុំដោយសារចោទថា ជាប់ពាក់ព័ន្ធករណីកញ្ញ ខុម ចាន់តារាទី ហៅស្រីមុំ ។
តាមប្រភពព័ត៌មាននានា មានសហគមន៍និងមន្ត្រីសង្គមស៊ីវិលមួយចំនួន បានពាក់ឈុតខ្មៅ នៅតាមផ្ទះឬតាមកន្លែងធ្វើការរបស់ពួកគេ ។ សេចក្ដីរាយការណ៍របស់បណ្ដាញផ្សាយអន្តរជាតិមួយរាយការណ៍ថា ពលរដ្ឋរស់នៅអាមេរិក ក៏បានពាក់ឈុតខ្មៅនៅថ្ងៃនេះ ដើម្បទាមទារឱ្យដោះលែងអ្នកទាំង ០៥ រូបមានសេរីភាពវិញ ។
កាលពីថ្ងៃចន្ទសប្តាហ៍មុន ក្រុមអង្គការសង្គមស៊ីវិល និង សកម្មជនដីធ្លីរាប់រយនាក់ បានធ្វើយុទ្ធនាការស្លៀកខ្មៅ ដើម្បីទាមទារឱ្យមានការដោះលែងដូចនេះ ប៉ុន្តែអំឡុងតវ៉ានេះសមត្ថកិច្ចឃាត់មនុស្ស ០៨ នាក់ ដើម្បីអប់រំឱ្យធ្វើកិច្ចសន្យា រួចហើយក៏ដោះលែងពួកគេ ឱ្យមានសេរីភាពវិញនៅយប់ថ្ងៃដដែល។
យុទ្ធនាការស្លៀកខ្មៅត្រូវបានហាមឃាត់ដោយរាជរដ្ឋាភិបាលកម្ពុជា ដោយសារតែមានចរឹតដូចទៅនឹងចលនាដែលបង្កអសន្តិសុខដល់ប្រទេសជាតិ។
នៅក្នុងពិធីចែកសញ្ញាបត្រដល់និស្សិតវិទ្យាស្ថានវ៉ាន់ដា កាលពីព្រឹកថ្ងៃទី ១០ ខែឧសភា ឆ្នាំ២០១៦ សម្តេច ហ៊ុន សែន បានព្រមានចាត់វិធានការរាល់សកម្មភាព និង ការធ្វើយុទ្ធនាការស្លៀកពាក់ខ្មៅនេះ ដើម្បីរក្សាសន្តិភាព ស្ថេរភាពនយោបាយ សណ្តាប់ធ្នាប់សង្គម និងពង្រឹងនីតិរដ្ឋ របស់ជាតិទាំងមូល។
សម្ដេចព្រមានថា ត្រូវចាប់ខ្លួនទាំងអស់មិនថាអ្នកឈុតខ្មៅ គឺពាក់ពណ៌អ្វីក៏ចាប់ដែរ ឱ្យតែជាប់ពាក់ព័ន្ធនិងធ្វើសកម្មភាពខុសច្បាប់របស់រដ្ឋ ៕
