ភ្នំពេញ៖ កញ្ញា ធី សុវណ្ណថា បានប្រកាសស្វែងរកស្នាមមេដៃពីអ្នកគាំទ្រឱ្យបាន១លាននាក់ ដើម្បីទម្លាក់លោក កឹម សុខា ប្រធានស្តីទីគណបក្សនេះចេញពីតំណែង ខណៈលោក ស្រី ចំរើន ដែលដឹកនាំក្រុមទាមទារឱ្យលោក កឹម សុខា បកស្រាយរឿងស្នេហាជាមួយ កញ្ញាខុមចាន់តារាទីហៅស្រីមុំ អះអាងថា លោកចូលរួមជាមួយយុទ្ធនាការនេះដែរ។ ផែនការរបស់យុវជនទាំងពីរនេះ បានធ្វើឡើងនៅក្នុងវេទិកាមួយលើប្រធានបទ «តើលោកកឹម សុខា គួរលាលែងតំណែងឬទេ?» នៅសណ្ឋាគារសាន់វេនារសៀល ថ្ងៃទី ១៣ ខែឧសភា ឆ្នាំ ២០១៦នេះ។
ថ្លែងនៅក្នុងវេទិកានេះ កញ្ញា ធី សុវណ្ណថា បានអះអាងថា យុទ្ធនាការប្រមូលស្នាមមេដៃនឹងចាប់ផ្តើមបន្ទាប់ពីក្រុមរបស់នាង រួមទាំងក្រុមពាក់ព័ន្ធផ្សេងទៀត ពិភាក្សាគ្នាម្តងទៀត។ ប៉ុន្តែកញ្ញាធី សុវណ្ណថា ទទូចថាបើគណបក្សសង្គ្រោះជាតិដកតំណែងលោក កឹម សុខា ចេញនោះគឺកញ្ញានិងយុវជននឹងបោះឆ្នោតឲ្យសង្គ្រោះជាតិ ។
មកដល់ពេលនេះ គណបក្សសង្គ្រោះជាតិ ក៏ដូចលោក កឹម សុខា មិនបានប្រតិកម្មឬចេញសេចក្ដីថ្លែងការណ៍ឆ្លើយតបអ្វីឡើយ ។
អ្នកសង្កេតការណ៍មួយចំនួន បានហៅទង្វើរបស់យុវជនទាំងពីរនេះថា មានយុទ្ធសាស្ត្រច្បាស់លាស ប៉ុន្តែមានអ្វីមួយនៅពីក្រោយ ពួកគេដែលផ្ដើមឱ្យមានចលនាបែបនេះ ។ តែបែបនេះក្ដីអ្នកសង្កេតការណ៍ថាមិនបានជោគជ័យឡើយ ៕
