ភ្នំពេញ ៖ គណៈកម្មការគ្រប់គ្រងគ្រោះមហន្តរាយ បានទទួចឱ្យពលរដ្ឋបង្កើនការប្រុងប្រយ័ត្នខ្ពស់ ចំពោះគ្រោះធម្មជាតិដោយសារ ផ្គររន្ទះ ដែលអាចបង្ករឱ្យមានគ្រោះថ្នាក់ដល់អាយុជីវិត ស្របពេលអាកាសធាតុកំពុងមានការប្រែប្រួល កំដៅសីតុណ្ហភាពកើនឡើងខ្លាំង ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក កែវ រី បានមានប្រសាសន៍នៅថ្ងៃទី១១ ខែឧសភាឆ្នាំ២០១៦ជាមួយ ទីភា្នកងារព័ត៌មានជាតិកម្ពុជាថា គ្រោះថ្នាក់ដែលបង្កដោយផ្គររន្ទះ គឺអាចបណ្តាលមកពីការប្រែប្រួលអាកាសធាតុខ្លាំង ព្រោះថាពេលដែលមានភ្លៀងធ្លាក់ម្តងៗ គឺបាននាំមកនូវខ្យល់កន្តាក់ និងផ្គររន្ទះមកជាមួយគ្នា ជាហេតុបង្កឱ្យមានគ្រោះថ្នាក់ដល់ពលរដ្ឋគ្រប់រូប ដែលខ្វះការប្រុងប្រយ័ត្ន ។
លោកបានឱ្យដឹងទៀតថា គ្រោះថ្នាក់ដោយសារផ្គររន្ទះនេះ ដំបូងត្រូវធ្វើការសង្គ្រោះជាបឋម តាមរយៈចលនាបេះដូងដល់អ្នករងគ្រោះ និងបញ្ជូនទៅមន្ទីរពេទ្យឱ្យបានឆាប់រហ័ស ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយរូបនេះ បានបង្ហាញពីវិធីការពារពេលមានភ្លៀងធ្លាក់ថា «ប្រជាពលរដ្ឋត្រូវត្រូវបិទទូរស័ព្ទ វិទ្យុ និងទូរទស្សន៍ នៅពេលដែលមានភ្លៀងធ្លាក់ និងមិនត្រូវជ្រកក្រោមដើមឈើធំៗ ជៀសវាងការឆ្លងចរន្តអគ្គិសនីនៅពេលដែលមានរន្ទះ» ។
គួរបញ្ជាក់ថា គិតចាប់ពីខែមករា រហូតមកដល់សប្តាហ៍ទី១ នៃខែឧសភា ខ្យល់ព្យុះបានបណ្តាលឱ្យពលរដ្ឋស្លាប់៧នាក់ និងរងរបួស៧១នាក់ ។ ចំណែកគ្រោះរន្ទះបាញ់ មានអ្នកស្លាប់១៥នាក់ និងរបួស១៦នាក់ ព្រមទាំងងាប់គោ-ក្របីចំនួន១២ក្បាល ។ ចំណែកគ្រោះមហន្ដរាយដោយខ្យល់ព្យុះបានកើតឡើងចំនួន៨៥ លើកក្នុងរាជធានី-ខេត្តចំនួន២០ ដែលបង្កឱ្យ ផ្ទះខូចខាតធ្ងន់ធ្ងរចំនួន៤៧៣ខ្នង និងផ្ទះខូចខាតជាមធ្យមចំនួន២៤៣៣ខ្នង ៕
