ភ្នំពេញ ៖ បើទោះជាកម្មវិធី The voice Cambodia ត្រូវបានទូរទស្សន៍ហង្សមាស នាំយកពីបរទេសក្តី ប៉ុន្តែសម្តេចនាយករដ្ឋមន្ត្រី មានការពេញចិត្តទៅនឹងកម្មវិធីនេះជាខ្លាំង ដោយលោកតែងតែលើកសរសើរមិនដាច់ពីមាត់ ។
សម្តេច ហ៊ុន សែន បានថ្លែងក្នុងពិធីចែកសញ្ញាបត្រដល់និស្សិតសាកលវិទ្យាល័យ IIC នៅវិទ្យាស្ថានជាតិអប់រំព្រឹកថ្ងៃទី១២ខែឧសភាយ៉ាងដូច្នេះថា «ឥលូវកម្មវិធី The voice គេកំពុងតែជំរុះ រវាងកូនក្រុម និងកូនក្រុម ការពិតកម្មវិធីនេះល្អ ក្រោយពីចេញប្រឡង គឺបានទៅច្រៀងនៅគ្រប់ទីកន្លែង ហើយច្រៀងបាននៅគ្រប់Model» ។
សម្តេចនាយករដ្ឋមន្ត្រីមានប្រសាសន៍ទៀតថា៖ «កម្មវិធីនេះ កើតក្នុងដំណាក់កាលខ្ញុំដឹកនាំ ខ្ញុំត្រូវតែយល់ពីវា មិនមែនកើតក្នុងដំណាក់កាលបក្សប្រឆាំងដឹកនាំឯណា! ខ្ញុំត្រូវសរសើរគ្រប់កម្មវិធី ខ្ញុំត្រូវមើលកម្មវិធីនេះហើយព្រោះកម្មវិធីនេះជក់ចិត្តដែរ» ។
ទន្ទឹមនឹងនេះ សម្តេចនាយករដ្ឋមន្ត្រី ក៏ត្រៀមខ្លួនចាំបោះឆ្នោតអោយបេក្ខជនមានសត្ថភាព ដែលលោកពេញចិត្តនៅវគ្គ Live Show ផងដែរ ៕
