តុលាការ ប្រទេសបង់ក្លាដេស នៅថ្ងៃនេះបានព្យូរក មេដឹកនាំគណបក្សឥស្លាមម្នាក់ បន្ទាប់ពី រកឃើញកំហុស ក្នុងបទឧក្រិដ្ឋប្រឆាំងមនុស្សជាតិ ក្នុងអំឡុងប្រទេសនេះមានសង្គ្រាមជាមួយប្រទេសប៉ាគិស្ថាននៅឆ្នាំ ១៩៧១ ។
តាមបណ្ដាញផ្សាយព័ត៌មានBBC ឧក្រិដ្ឋជននេះ មានឈ្មោះ Motiur Rahman Nizami អាយុ៧៣ឆ្នាំ ត្រូវបានព្យួរកនៅព្រឹកព្រលឹមថ្ងៃពុធនេះ ។ បុរសនេះ រងបទចោទចំនួន ៣ គឺ ប្រល័យពូជសាសន៍ ចាប់រំលោភ និងធ្វើទារុណកម្ម ។
ប្រជាជនបង់ក្លាដេស ជាច្រើនពាន់នាក់ ដែលជាជនរងគ្រោះដោយសារបុរសនេះ បានសាទរ ចំពោះ សេចក្ដីសម្រេចរបស់តុលាការ ។ លោក Motiur Rahman Nizami គឺជាបុរសទី៥ ដែលត្រូវព្យួរក ករណីដូចនេះ ។
ប្រទេសអាស៊ីខាងត្បូងមួយនេះ ជួបវិបត្តិមួយ ដ៏ធ្ងន់ធ្ងរកាលពីអំឡុងសង្គ្រាម គឺការសម្លាប់រង្គាល ដែលជាទង្វើរបស់មេដឹកនាំឥស្លាម និយមប៉ាគិស្ថាន ។ ក្នុងគ្រានោះមនុស្សស្លាប់ប្រហែលជា ៥០ម៉ឺននាក់ ៕ ប្រភព:BBC
